မီးၵူၼ်းဢမ်ႇႁူႉၾၢႆႇ မႃးထိုမ်ႈမၢၵ်ႇပွမ်းသႂ်ႇ တီႈႁၢၼ်ႉ KTV ႁိမ်းပၢမ်ႉၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) ၶွင်ပျီႇတူႉ ၸိတ်ႉပၢၼ်းသေး 2 လုၵ်ႈ တီႈဝဵင်းမူႇၸေႊ။
ဝၼ်းတီႈ 30/10/2024 ယၢမ်းၵၢင်ၶမ်ႈ မီးၵူၼ်းဢမ်ႇႁူႉၾၢႆႇ ဢဝ်မၢၵ်ႇပွမ်းမႃးထိုမ်ႈသႂ်ႇ တီႈႁၢၼ်ႉ ROXY KTV ၼႂ်းပွၵ်ႉၸွၼ်ႊၸူဝ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ တင်းမူတ်း 2 လုၵ်ႈ။ ၼႂ်းၼၼ်ႉ တႅၵ်ႇလုၵ်ႈ ၼိုင်ႈ ဝႃႈၼႆ။
ၵူၼ်းပိုၼ်ႉတီႈ ၽူႈၸၢႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မီးၵူၼ်းမႃးပွႆႇမၢၵ်ႇၼႆၶႃႈဢေႃႈ တင်းမူတ်း 2 လုၵ်ႈ။ ၼႂ်းၼၼ်ႉ တႅၵ်ႇလုၵ်ႈၼိုင်ႈ ယၢမ်းၵၢင်ၶမ်ႈ 7 မူင်းပၢႆ။ ထႅင်ႈလုၵ်ႈၼိုင်ႈတႄႉ ဢမ်ႇတႅၵ်ႇ ထိုင်မႃး ယၢမ်းၵၢင်ၶမ်ႈ 8 မူင်း ၶိုင်ႈ ယူႇတီႈ ပျီႇတူႉၸိတ်ႉၶဝ် ယိုဝ်းတႅၵ်ႇပႅတ်ႈၼႆၶႃႈဢေႃႈ။ လွင်ႈတုမ်ႉတိူဝ်ႉ ၵူၼ်း မၢတ်ႇၸဵပ်းလူႉတၢႆလႄႈ လွင်ႈၶူဝ်း ၶွင် လူႉသုမ်း ၸိူဝ်းၼႆႉတႄႉ ဢမ်ႇလႆႈငိၼ်းဝႃႈႁိုဝ်ၶႃႈ” – ဝႃႈၼႆ။
ပၢမ်ႉၼမ်ႉမၼ်းၸၢၵ်ႈ ပျီႇတူႉၸိတ်ႉပၢၼ်းသေးၼႆႉ ပိုတ်ႇဝႆႉ တီႈပွၵ်ႉၸွၼ်ႊၸူဝ်ႇ ၼိူဝ်သဵၼ်ႈတၢင်းလူင် မူႇၸေႊ – ၼမ်ႉၶမ်း။ ဢိင်ၼိူဝ် ၵူၼ်းမႃးပွႆႇမၢၵ်ႇပွမ်းၼႆႉသေ ပဵၼ်ၼမ်ႉမိုဝ်းၽႂ် ၸုမ်းလႂ် မႃးပွႆႇတႄႉ ပႆႇႁူႉ ဝႃႈၼႆ။
မိူဝ်ႈဝၼ်းတီႈ 18/10/2024 ယၢမ်းၵၢင်ၼႂ် 8 မူင်းၶိုင်ႈ ၼၼ်ႉၵေႃႈ မီးၵူၼ်းဢမ်ႇႁူႉၾၢႆႇ ၶီႇရူတ်ႉၶိူင်ႈ မႃးထိုမ်ႈမၢၵ်ႇပွမ်း သႂ်ႇၼႂ်းဝၢင်းႁိူၼ်းၵူၼ်းမိူင်း တီႈပွၵ်ႉဢွင်ႇမႅတ်ႉတႃႇ ဝဵင်းၼမ်ႉၶမ်း လုၵ်ႈၼိုင်ႈ။ ႁိူၼ်းလင်ၼၼ်ႉ ယၢမ်ႈပဵၼ်ႁူဝ်ၼႃႈပျီႇတူႉၸိတ်ႉမႃး – ၵူၼ်းပိုၼ်ႉတီႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ