ၼႂ်းပီ 2024 ၸမ်သဵင်ႈၼႆႉ ၶူင်ႇႁိူဝ်းမိၼ်မိူင်းထႆး 6 ဢၼ် တေတႄႇၸႂ်ႉတိုဝ်း လွၵ်းလၢႆးပၢႆးပၺ်ႇၺႃႇ ဢၼ်မၢႆတွင်းဝႆႉ ႁၢင်ႈၾၢင်ၼႃႈတႃ ၵူၼ်းဢွၵ်ႇၶၢဝ်းတၢင်း (Facial Recognition Technology) ယဝ်ႉ ဝႃႈၼႆ။
ယွၼ်ႉတေၸႂ်ႉတိုဝ်းလွၵ်းလၢႆးဢၼ်ၼႆႉလႄႈ ၵူၼ်းၸိူဝ်းဢွၵ်ႇၶၢဝ်းတၢင်း တေလႆႈၼႄၶေႃႈမုလ်း ၽိုၼ်လိၵ်ႈလၢႆး ၼိုင်ႈၵမ်းၵူၺ်းယဝ်ႉၼႆ – ၶၢဝ်ႇ Bangkok Post ႁၢႆးငၢၼ်းဝႆႉ ၼႂ်းဝၼ်းတီႈ 28/10/2024 ၼင်ႇၼႆ။
လွၵ်းလၢႆးပၢႆးပၺ်ႇၺႃႇဢၼ်ၼႆႉ တေၸႂ်ႉတိုဝ်း တီႈၶူင်ႇႁိူဝ်းမိၼ်ၵူႈမိူင်းမိူင်း မိူၼ်ၼင်ႇ ၶူင်ႇႁိူဝ်းမိၼ် သုဝၼ်ၼၽုမ်းလႄႈ ၻွၼ်ႊမိူင်း ဝဵင်းၵုင်ႈထဵပ်ႈ၊ ၶူင်ႇႁိူဝ်းမိၼ် တီႈဝဵင်းၵဵင်းႁၢႆး၊ ဝဵင်းၽူးၵဵတ်ႇလႄႈ ႁၢတ်ႇယႂ်ႇ Hat Yai လႄႈ ၶူင်ႇႁိူဝ်းမိၼ် ၵူႈမိူင်းမိူင်း ဝဵင်းၵဵင်းမႂ်ႇ ဢၼ်မီးၵူၼ်းမိူင်းမၢၼ်ႈ ဢွၵ်ႇၶၢဝ်းတၢင်းၵႂႃႇမႃးၼမ် ၸိူဝ်းၼႆႉ။
တွၼ်ႈတႃႇ ၵူၼ်းဢွၵ်ႇၶၢဝ်းတၢင်းၼႂ်းမိူင်းၶဝ်တႄႉ တႄႇၸႂ်ႉတိုဝ်းၵႂႃႇလႆႈ ၼႂ်းဝၼ်းတီႈ 01/11/2024 ၼႆႉၵႂႃႇ။ ၵူၼ်း ဢွၵ်ႇၶၢဝ်းတၢင်း ၵူႈမိူင်းမိူင်းၶဝ်သမ်ႉ တေတႄႇၸႂ်ႉတိုဝ်းၵႂႃႇလႆႈ ၼႂ်းဝၼ်းတီႈ 01/12/2024 ၵႂႃႇ ဝႃႈၼႆ။
တႃႇတေၸႂ်ႉတိုဝ်းလွၵ်းလၢႆး ဢၼ်ၼႆႉ ၵွၼ်ႇတေၶဝ်ႈဝၢင်းႁိူဝ်းမိၼ်ၼၼ်ႉ တူဝ်ၵူၼ်းဢွၵ်ႇၶၢဝ်းတၢင်း တေလႆႈယိုၼ်ႈတၢင်ႇသဵၼ်ႈမၢႆ တႃႇတေၶီႇၶိူင်ႈမိၼ်ႁင်းၵူၺ်း။ ဝၢႆးလင်ၼၼ်ႉယဝ်ႉ ၶေႃႈမုလ်းသုၼ်ႇတူဝ် ၵူၼ်းဢွၵ်ႇၶၢဝ်းတၢင်း ၸိူဝ်းၼႆႉ ၶိူင်ႈၸၢၵ်ႈတေၵဵပ်းသိမ်းဝႆႉ။
ၵွပ်ႈၼၼ်လႄႈ မိူဝ်ႈၽွင်း တေၶီႇၶိူင်ႈမိၼ်ၼၼ်ႉ ဢမ်ႇလူဝ်ႇၼႄဝႂ်ၶၢမ်ႈမိူင်းလႄႈ ဝႂ်တႃႇတေၶီႇၶိူင်ႈမိၼ် ၼၼ်ႉထႅင်ႈယဝ်ႉ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ