ယၢမ်းလဵဝ် ၵူၼ်းမူႇၸေႊ – ၼမ်ႉၶမ်း ယၢပ်ႇၽိုတ်ႇလိူဝ်ႁႅင်း လွင်ႈၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) ယွၼ်ႉတၢင်းၾင်ႇမိူင်းၶႄႇ ႁၢမ်ႈၶူဝ်းၵုၼ်ႇ တေႃႉၶဝ်ႈမႃးတၢင်းၾင်ႇမိူင်းတႆး။  

မိူဝ်ႈၼႆႉ ဝၼ်းတီႈ 30/10/2024 ယၢမ်းၵၢင်ၼႂ် ၵူၼ်းမူႇၸေႊ ဢွၼ်ၵၼ် ဢဝ်ၵႃး/ ရူတ်ႉၶိူင်ႈ ၵႂႃႇပႂ်ႉၶဝ်ႈထႅဝ် လုၵ်ႉဢဝ်တီႈပၢမ်ႉၼမ်ႉမၼ်းၸၢၵ်ႈ (သူၺ်ႇယႃႇၸႃႇ) တေႃႇထိုင် ၵၢင်ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၼႆယဝ်ႉ။

ၵူၼ်းမူႇၸေႊ ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵႃးတၢင်ႇၼမ်ႉမၼ်း တၢင်းမိူင်းၶႄႇ ၶဝ်ႈမႃးဢေႇ ဢေႃႈ။ ၵွပ်ႈၼႆလႄႈ ၼမ်ႉမၼ်းတၢင်းၾင်ႇၼႆႉ ဢေႇလူင်း။ မိူဝ်ႈၼႆႉ ၵူၼ်းဢွၼ်ၵၼ် ၵႂႃႇၶဝ်ႈထႅဝ်ပႂ်ႉ သိုဝ်ႉတီႈပၢမ်ႉၼမ်ႉမၼ်း သူၺ်ႇယႃႇၸႃႇၼၼ်ႉ ရူတ်ႉၵႃး ယၢဝ်းတေႃႇထိုင် ၵၢင်ဝဵင်းၼႆႉ တၢင်းယၢဝ်း တေမီးမွၵ်ႈၼိုင်ႈလၵ်းၼႆႉ။ တီႈပၢမ်ႉၼမ်ႉမၼ်းၼၼ်ႉ ၶဝ်သႂ်ႇပၼ် ရူတ်ႉၶိူင်ႈ 1 လမ်း 10,000 ပျႃး၊ ၵႃးဢွၼ်ႇ 1 လမ်း 30,000 ပျႃး။ ၵႃးလူင် 50,000 ပျႃး ၶဝ်မၵ်းတတ်း ၶၢႆပၼ်ၼင်ႇၼႆ။ ပေႃးဢဝ်ပုင်းၵႂႃႇသႂ်ႇတႄႉ ၶဝ်ဢမ်ႇၶၢႆပၼ်။ ယၢမ်းလဵဝ် ၶၼ်ၼမ်ႉမၼ်း 1 လိတ်ႊလႂ် 5,000 ပျႃး။ ၵွၼ်ႇၼႃႈၼႆႉ 3,000 ပျႃးပၢႆၵူၺ်း”- ဝႃႈ ၼႆ။

ဢိင်ၼိူဝ် လွင်ႈၼမ်ႉမၼ်းၸၢၵ်ႈၼႆႉသေ မၢင်ၸိူဝ်း တၼ်းဝႆး ဢဝ်ပုင်းလိူင် (20 လိတ်ႉ) ၼၼ်ႉ ၵႂႃႇသိုဝ်ႉၵဵပ်းဝႆႉၵေႃႈမီး။ သင်သိုဝ်ႉတီႈပၢမ်ႇၼမ်ႉမၼ်းၵမ်ႈသိုဝ်ႈၸိုင် 1 ပုင်းလႂ် 100,000 ပျႃး။ တူၵ်း 1 လိတ်ႊလႂ် 5,000 ပျႃး။ သင်ဢဝ်မႃး ၶၢႆတၢင်းၼွၵ်ႈသမ်ႉ 1 ပုင်း 300,000 ပျႃး။

“မၢင်ၸိူဝ်း လႅတ်းတႄႉ ဢဝ်ရူတ်ႉၶိူင်ႈ/ ၵႃး ၵႂႃႇသႂ်ႇသေ မႃးၸုပ်ႇဢွၵ်ႇဝႆႉတီႈႁိူၼ်း ပေႃးယဝ်ႉ ၵႂႃႇၶဝ်ႈထႅဝ် သိုဝ်ႉသႂ်ႇထႅင်ႈ ႁဵတ်းၼၼ်ၶႃႈဢေႃႈ တီႈမူႇၸေႊၼႆႉ။ တွၼ်ႈတႃႇ တေဢဝ်ၼမ်ႉမၼ်းၼၼ်ႉ ၶၢႆတၢင်းၼွၵ်ႈ၊ မၢင်ၵေႃႉၶၢႆ 1 လိတ်ႊ 8,500 ပျႃး – 9,000 ပျႃး ၸိူဝ်းၼႆႉ”- ၵူၼ်းမူႇၸေႊ သိုပ်ႇလၢတ်ႈၼႄၼင်ႇၼႆ။

ယွၼ်ႉၼမ်ႉမၼ်းၸၢၵ်ႈၼႆႉသေ ယၢမ်းလဵဝ် ပၢင်ႇၼမ်ႉမၼ်း တီႈဢိူင်ႇပၢင်ႇၶမ်းၵေႃႈ ပိုတ်ႇပၼ် တွၼ်ႈၵၢင်ၼႂ်ၵူၺ်း။ ၼၼ်ႉၵေႃႈ ၵူၼ်းမိူင်းႁိမ်ၵၼ်သိုဝ်ႉ သႂ်ႇပၼ်ရူတ်ႉၶိူင်ႈ ၼိုင်းလမ်းလႂ် 5,000 ပျႃး။ တီႈၵိင်ႇၽႄ ဝဵင်းမၢၼ်ႈႁဵဝ်းၵေႃႈ ၼမ်ႉမၼ်းၸၢၵ်ႈၶၢတ်ႇဝႆႉ ဝႃႈၼႆ။

ၵူၼ်းမၢၼ်ႈႁဵဝ်း ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တႃႇတေသူင်ႇဢေ ၵႂႃႇႁူင်း ႁဵၼ်း ယင်းယၢပ်ႇၸႂ်ယဝ်ႉ။ ၼမ်ႉမၼ်းတီႇၸေႇသမ်ႉ ပေႃးဢမ်ႇမီးဢမ်ႇၸၢင်ႈၸႂ်ႉၸၢၵ်ႈထႆၼႃး၊ ၽိူဝ်ၼႃး လႄႈ ဢမ်ႇသၢင်ႇထုၵ်ႇ ၼႃးၵေႃႈ ၸၢင်ႈႁၢမ်းဢေႃႈ ပေႃးပဵၼ်ၼႆၵႂႃႇ ၶၢဝ်းႁိုင်တႄႉ။ မိူဝ်ႈၵႆႈ ၶႃႈၵႂႃႇႁႃသိုဝ်ႉ ၼိုင်ႈတဝ်ႈ 18,000 ပျႃး ဢေႃႈ”- ဝႃႈၼႆ။

မိူၼ်ၼႆ ၼင်ႇၵဝ်ႇ တီႈဝဵင်းၼမ်ႉၶမ်းၵေႃႈ ၼမ်ႉမၼ်းၸၢၵ်ႈ 1 လိတ်ႊလႂ် 9,000 ပျႃး ထိုင် 9,500 ပျႃးယဝ်ႉ။  

တႄႇဢဝ် ဝၼ်းတီႈ 25/10/2024 ၼႆႉမႃး တၢင်းၾင်ႇမိူင်းၶႄႇ မၵ်းတတ်း ႁၢမ်ႈတေႃႉသူင်ႇ ၶူဝ်းၵုၼ်ႇ၊ ၶွင် ႁိၼ်ယႅမ်ႉ၊ ၶိူင်ႈၸႂ်ႉၾႆးၾႃႉ ၸိူဝ်းၼႆႉ ၶဝ်ႈမႃးၼႂ်းမိူင်းတႆး တၢင်းၽၵ်းတူၸၢင်ႉၽိူၵ်ႇ၊ ၽၵ်းတူလူင် (ႁေႃၶမ်းလူင်) ယွၼ်ႉဝႃႈ ၵွၼ်ႇ ၼႃႈၼၼ်ႉ လၢႆဝၼ်း ပလိၵ်ႈၶႄႇၶဝ် ၵူတ်ႇထတ်းတီႉလႆႈ သိူဝ်ႈၸီႇၵႃႇ (သိူဝ်ႈႁႄႉမၢၵ်ႇၵွင်ႈ)၊ သွၵ်းတိၼ်သိုၵ်း၊ ၶွမ်ႊပိဝ်ႊတိူဝ်ႊ ၸိူဝ်းၼႆႉ။

ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶဝ်ႁၢမ်ႈၼႆႉ ပဵၼ်ၶူဝ်းၵုၼ်ႇၶွင်ၵိၼ်ယႅမ်ႉ မိူၼ်ၼင်ႇ – မၼ်းဢႃႇလူး၊ ၶဝ်ႈသွႆႈႁႅင်ႈ၊ ၶွင်ၵိၼ်ႁႅင်ႈ ဢၼ်ၵိၼ်လႆႈၵမ်းလဵဝ်၊ ၼိူဝ်ႉပႃမူ။ ၶိူင်ႈၸႂ်ႉ မိူၼ်ၼင်ႇ – ၾႆးသႅင်လႅတ်ႇ၊ ၶွမ်ႊပိဝ်ႊတိူဝ်ႊ၊ တင်ႇၼင်ႈ ၸိူဝ်းၼႆႉ။ ၶွင်ၵိၼ်ယႅမ်ႉ ၶူဝ်းၵုၼ်ႇ တၢင်းၾင်ႇမိူင်းၶႄႇ ဢၼ်တေတေႃႉဢွၵ်ႇမႃးၼၼ်ႉ ၸဵမ်ၵႃးတၢင်ႇၵုၼ်ႇ၊ ရူတ်ႉၶိူင်ႈတၢင်ႇၵုၼ်ႇ ၸိူဝ်းၼႆႉ ၵိုတ်းၶပ်ႉယၢႆယၢဝ်းလူင်ဝႆႉၶႃႈ ဢေႃႈ တၢင်းၸေႊၵဝ်ႇၼၼ်ႉၵေႃႈ”- ဝႃႈၼႆ။

မိူၼ်ၼႆ ၼင်ႇၵဝ်ႇ တၢင်းၼႃႈလိၼ်ၵုမ်းၵမ် တပ်ႉသိုၵ်းဝႃႉ UWSA လႄႈ မိူင်းလႃး NDAA ၵေႃႈ ၺႃးၾင်ႇမိူင်းၶႄႇ ပိၵ်ႉ ဢိုတ်းၽၵ်းတူမိူင်းသေ ဢမ်ႇပၼ်တေႃႉၶူဝ်းၵုၼ်ႇလႄႈ ၼမ်ႉမၼ်းၸၢၵ်ႈ ၸိူဝ်းၼႆႉၶဝ်ႈမႃး။

ပူၼ်ႉမႃး မိူဝ်ႈႁၢင်လိူၼ်ဢေႃႊၵတ်ႊသ်ၼၼ်ႉ ႁူဝ်ၼႃႈ တပ်ႉသိုၵ်းဝႃႉတင်း ၽွင်းလူင် ၾၢႆႇၼွၵ်ႈမိူင်း မိူင်းၶႄႇ တဵင်ႉသျီႊၵျွၼ်ႊ(တိန့်ရှီကျွင်း) ႁူပ်ႉထူပ်းဢုပ်ႇဢူဝ်းၵၼ် လွင်ႈတႅပ်း 5 တႅပ်း တေႃႇတပ်ႉသိုၵ်းၵဝ်ႈၵၢင်ႉ MNDAA ဢၼ်ၵုမ်း ၵမ်ဝႆႉ မိူၼ်ၼင်ႇ ဝဵင်းလၢဝ်ႇၵၢႆး၊ ၵုၼ်လူင်၊ သႅၼ်ဝီလႄႈ လႃႈသဵဝ်ႈ ၸိူဝ်းၼႆႉသေ ၵွပ်ႈၼႆလႄႈ တၢင်းၾၢႆႇတပ်ႉသိုၵ်းဝႃႉ ၵေႃႈ ၺႃးၶႄႇ ပိၵ်ႉဢိုတ်းၽၵ်းတူလႅၼ်လိၼ်မႃး မိူၼ်ၵၼ်။ တႅပ်း 5 တႅပ်း ဢၼ်ဝႃႈၼၼ်ႉ မိူၼ်ၼင်ႇ – ၾႆးၾႃႉ၊ ၼမ်ႉ၊ ဢိၼ်ႊထိူဝ်ႊၼႅတ်ႊ၊ လွင်ႈၵမ်ႉၸွႆႈလႄႈ ႁႅင်းၵူၼ်းၵမ်ႉထႅမ် ၸိူဝ်းၼႆႉ။