ၸွမ်ၽွင်း လူင်မိူင်းတႆး ဢၼ်သိုၵ်းမၢၼ်ႈ ယုၵ်ႉတၢင်ႇဝႆႉၼၼ်ႉ တဵၵ်းၶၢၼ်း ၵူၼ်းဝဵင်းၵၢတ်ႇလေႃႉ ႁႂ်ႈႁဵတ်းပွႆးႁူင်းၾႆးမိၼ် (လိူၼ်သိပ်းသွင်) ၵိုၼ်းၶွၼ်ႈ ဝႃႈၼႆ။
ဝၼ်းတီႈ 28/10/2024 ၼႆႉ ယူႇတီႈ ၸွမ်ၽွင်းလူင် မိူင်းတႆး ၸီႉသင်ႇ ၵူၼ်းဝဵင်းၵၢတ်ႇလေႃႉ ၸႄႈတွၼ်ႈ တူၼ်ႈတီး ၸိုင်ႈတႆးပွတ်းၸၢၼ်း ၸတ်းႁဵတ်းပွႆးႁူင်းၾႆးမိၼ် ၵူၼ်းမိူင်းတႄႉ ဢမ်ႇၶႂ်ႈၸတ်းႁဵတ်း ယွၼ်ႉထူပ်းၽေးၼမ်ႉထူမ်ႈသေ ပႆႇၸၢင်ႈပူၵ်းပွင်ႁိူၼ်းယေး ႁႂ်ႈမိူၼ်ၵဝ်ႇ ပဵၼ်ဢၼ်ယၢပ်ႇၽိုတ်ႇဝႆႉ ဝႃႈၼႆ။
ၵူၼ်းပိုၼ်ႉတီႈ ဝဵင်းၵၢတ်ႇလေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၵၢင်လိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼၼ်ႉ ၼမ်ႉၼွင်းလုပ်ႇထူမ်ႈ တီႈဝဵင်းၵၢတ်ႇလေႃႉ ႁၢဝ်ႈႁႅင်း မီးလွင်ႈလူႉသုမ်းၼမ် တေႃႇထိုင်ယၢမ်းလဵဝ် ၵူၼ်းမိူင်း ပႆႇၸၢင်ႈပူၵ်းပွင်ႁႂ်ႈမိူၼ်ၵဝ်ႇလႆႈ ၽွင်းၼင်ႇၼႆ ၸွမ်ၽွင်းလူင်မိူင်းတႆးသမ်ႉ မႃးၸီႉသင်ႇ ႁႂ်ႈၸတ်းႁဵတ်းပွႆးလိူၼ်သိပ်းသွင် ၵူၼ်းမိူင်းတႄႉ ဢမ်ႇၶႂ်ႈႁဵတ်း ယွၼ်ႉႁႅင်းဢီးၶဝ်သေ တေဝၢင်းပၼ်ငိုၼ်း ၵွင်ၵၢင် 750 သႅၼ်သေ တဵၵ်းၶၢၼ်းၸႂ်ႉႁဵတ်းပွႆးႁူင်းၾႆးမိၼ် ”- ဝႃႈၼႆ။
ပွႆးႁူင်းၾႆးမိၼ် တီႈဝဵင်းၵၢတ်ႇလေႃႉၼႆႉ တေၸတ်းႁဵတ်း ဝၼ်းတီႈ 16-18/11/2024 ဝႃႈၼႆ။
တီႈဝဵင်းၵၢတ်ႇလေႃႉၼႆႉ ၺႃးၼမ်ႉလုပ်ႇထူမ်ႈႁႅင်း ၼႂ်းပွၵ်ႉ 4 လႄႈ ပွၵ်ႉ 2 ယဝ်ႉၵေႃႈ ၼႂ်းပွၵ်ႉ 3 ၵမ်ႈၽွင်ႈ။ ယွၼ်ႉၼမ်ႉထူမ်ႈၼႆႉသေ တုမ်ႉတိူဝ်ႉၵူၼ်းမိူင်းလူႉတၢႆ ၸွမ်းၵမ်ႈၽွင်ႈ ဝႃႈၼႆ။
ဝၢႆးပဵၼ် လွင်ႈၼမ်ႉၼွင်းထူမ်ႈ တီႈဝဵင်းၵၢတ်ႇလေႃႉ ၵူၼ်းမိူင်း – ၸုမ်းပရႁိတ လၢႆလၢႆတီႈ မႃးလူႉတၢၼ်း ၵမ်ႉၸွႆႈသေတႃႉ ၵူၼ်းမိူင်း ဢၼ်ႁူပ်ႉၽေးၼမ်ႉတႄႉတႄႉၼၼ်ႉ ဢမ်ႇလႆႈတၢင်းၵမ်ႉၸွႆႈတဵမ်ထူၼ်ႈ – ၵူၼ်းထူပ်းၽေးၼမ်ႉ ၼႂ်းပွၵ်ႉ 3 ဝဵင်းၵၢတ်ႇလေႃႉ ၵေႃႉၼိုင်ႈလၢတ်ႈ။
ပူၼ်ႉမႃး မိူဝ်ႈဝၼ်းတီႈ 26/10/2024 ၼၼ်ႉ ၽွင်းတမ်ယၢမ်း ႁၢင်ႈႁႅၼ်းတႃႇပွႆးလိူၼ်သိပ်းသွင် တီႈဝတ်ႉယႂႃႇတိတ်ႉ ဝဵင်းၵၢတ်ႇလေႃႉၼႆႉ ပဵၼ်လွင်ႈတႅၵ်ႇၽူင်ႉသေ သင်ၶၸဝ်ႈ 2 တူၼ်လႄႈ ၵူၼ်းမိူင်း 3 ၵေႃႉ လႆႈမၢတ်ႇၸဵပ်းသေ လႆႈသူင်ႇယူတ်းယႃတူဝ်ဝႆႉတီႈႁူင်းယႃၵၢတ်ႇလေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ