မိူဝ်ႈၼႆႉ ဝၼ်းတီႈ 29/10/2024 ယၢမ်းၵၢင်ဝၼ်း 11:58 မူင်း ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ တီႈပွၵ်ႉ 11 တိူဝ်ႉၺႃး ၵူၼ်းမၢတ်ႇၸဵပ်း ၵေႃႉၼိုင်ႈ ထိုင်မႃးယၢမ်းဝၢႆးဝၼ်း 2:34 မူင်းသမ်ႉ မႃးပွႆႇတီႈပွၵ်ႉ 1 တိူဝ်ႉၺႃး ၵျွင်းၵၢင်မိူင်း (ၵျွင်း 2500) လူႉၵွႆၼမ် ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၽူႈယိင်း ဢႃယု 40 ပၢႆ ၵူၼ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ၶဝ်မႃးပွႆႇမၢၵ်ႇ ထႅင်ႈယဝ်ႉ။ မိူဝ်ႈၼႆႉ မႃးပွႆႇၵႂႃႇ 2 ၵမ်းယဝ်ႉ။ ဢၼ်မႃးတူၵ်း တီႈပွၵ်ႉ 11 တႄႉ ငိၼ်းဝႃႈ တိူဝ်ႉၺႃးၵူၼ်း မၢတ်ႇၸဵပ်း ၵေႃႉၼိုင်ႈ။ တီႈပွၵ်ႉ 1 တႄႉ မႃးပွႆႇ 3 လုၵ်ႈ ပဵၼ်မၢၵ်ႇၼမ်ႉၼၵ်း 500 ပွင်ႇ တိူဝ်ႉၺႃး ၵျွင်းလွႆၵၢင်မိူင်း (ၵျွင်း 2500 ) လူႉၵွႆမူတ်း”– ဝႃႈ ၼႆ။

တႄႇဢဝ် ဝၼ်းတီႈ 30/08/2024 ၼၼ်ႉမႃး သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝဵင်းလႃႈသဵဝ်ႈ ႁၢဝ်ႈ ႁႅင်း ႁၢၼ်ႉတေႃႇထိုင်ယၢမ်းလဵဝ်။ တီႈဝဵင်းလႃႈသဵဝ်ႈၼႆႉ သိုၵ်းၵဝ်ႈၵၢင်ႉ တႄႇၶဝ်ႈတိုၵ်းႁၢဝ်ႈႁႅင်းထႅင်ႈ လွပ်ႈသွင် ၼႂ်းပၢင်ယၼ်ႇသိုၵ်း 1027 ၼႆႉ မိူဝ်ႈဝၼ်းတီႈ 02/07/2024 ယၢမ်းၵၢင်ၶိုၼ်း 11:45 မူင်းသေ ထိုင်မႃး ဝၼ်းတီႈ 03/10/2024 ၼႆႉ ၸင်ႇယိုတ်းၵုမ်းလႆႈ ဝဵင်းလႃႈသဵဝ်ႈမႃး – ၵူၼ်းပိုၼ်ႉတီႈလၢတ်ႈ။

မိူၼ်ၼႆၼင်ႇၵဝ်ႇ မိူဝ်ႈဝႃး ဝၼ်းတီႈ 28 ယၢမ်းၵၢင်ၼႂ် ၶိူင်ႈမိၼ်သိုၵ်းမၢၼ်ႈ မႃးပွႆႇတီႈပုင်ႇၼမ်ႉသႃ ဝၢၼ်ႈပဵင်းလူင် ဢိူင်ႇၼမ်ႉမေႃး ၸႄႈဝဵင်းၵူတ်ႉၶၢႆ တင်းမူတ်း 6 လုၵ်ႈ – ၵူၼ်းပိုၼ်ႉတီႈလၢတ်ႈ။

ဝၼ်းတီႈ 27/10/2024 ယၢမ်းၵၢင်ၶမ်ႈ 7:45 မူင်းလႄႈ 8:15 မူင်း မၢၵ်ႇၶိူင်ႈမိၼ်သိုၵ်းမၢၼ်ႈ မႃးပွႆႇတီႈပွၵ်ႉ သပျေႇ ဝဵင်းၼွင်ၶဵဝ် တင်းမူတ်း 11 လုၵ်ႈ တိူဝ်ႉၺႃး ဢူးတဵင်းထုၼ်း ဢႃယု 60 ပီ လူႉတၢႆ ၵေႃႉၼိုင်ႈလႄႈ ပႃႈပူႉ ဢႃယုမွၵ်ႈ 50 ပီ မၢတ်ႇၸဵပ်း ၵေႃႉၼိုင်ႈ။ ယဝ်ႉၵေႃႈ တိူဝ်ႉၺႃးႁိူၼ်းယေး လူႉၵွႆ 3 လင်။

ဝၼ်းတီႈ 27 ယၢမ်းၵၢင်ၼႂ်ၸဝ်ႉ 2 မူင်းၶိုင်ႈ ၼၼ်ႉၵေႃႈ မႃးပွႆႇတီႈဝဵင်းၼမ်ႉၶမ်း တၢင်းၸၶၢၼ်းတိပ်ႉ၊ မၢၼ်ႈသႃႇ၊ ၼႂ်းတူင်ႈၼႃး ၸိူဝ်းၼႆႉ ဢမ်ႇယွမ်း 8 လုၵ်ႈ ႁဵတ်းႁႂ်ႈၶဝ်ႈၼႂ်းၼႃး လူႉၵွႆၼမ် – ယူႇတီႈ တပ်ႉ သိုၵ်းတဢၢင်း TNLA ပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။

ယဝ်ႉၵေႃႈ ၼႂ်းဝၼ်းတီႈ 27 ယၢမ်းၵၢင်ၶမ်ႈမွၵ်ႈ 09:50 မူင်းသမ်ႉ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ တီႈ ၵျွင်းၶရိတ်ႉယၼ်ႇ (ၸၢဝ်းၶၢင်)၊ လုမ်းၽူႈၵွၼ်းၸႄႈဝဵင်းလႄႈ ႁိူၼ်းယေးၵူၼ်းမိူင်း ပွၵ်ႉ 3 ၵွင်းၵမ်ႉၵေႃႇ ဝဵင်းသႅၼ်ဝီ ဢမ်ႇယွမ်း 3 လုၵ်ႈ – ၵူၼ်းပိုၼ်ႉတီႈလၢတ်ႈ။