ဝၼ်းတီႈ 28/10/2024 တပ်ႉသိုၵ်းတႆးလႅင် SNA ၼႄဢဵၼ်ႁႅင်း ၼႂ်းဝဵင်းမိူင်းယၢင်း ၸႄႈမိူင်းၶၢင် ဝႃႈၼႆ။
ၽူႈမီးပုၼ်ႈၽွၼ်း တပ်ႉသိုၵ်းတႆးလႅင် SNA ၸဝ်ႈၼိုင်ႈ လၢတ်ႈတီႈသိုဝ်ႇၶၢဝ်ႇတႆးလႅင်ဝႃႈ – “လႅၼ်လိၼ် တီႈယူႇႁဝ်း ပီႈၼွင်ႉတႆးလႅင်၊ ႁဝ်းတေသိုပ်ႇယူႇသဝ်းၵႂႃႇသေ ႁဵတ်းသၢင်ႈလွင်ႈငမ်းယဵၼ်ၵႂႃႇ တွၼ်ႈတႃႇ သုၼ်ႇလႆႈ ပီႈၼွင်ႉတႆးလႅင်ႁဝ်း ဢၼ်လႆႈယူႇသဝ်းမႃး ၸဵမ်ပၢၼ်ပူႇမွၼ်ႇၼၢႆးယႃႈ။ ၶႂ်ႈႁႂ်ႈၵူၼ်းပိုၼ်ႉတီႈ ႁၼ်ဢဵၼ်ႁႅင်းသိုၵ်းႁဝ်းသေ ႁႂ်ႈလႆႈပၼ်တၢင်းႁူမ်ႈမိုဝ်းၵႂႃႇ”- ဝႃႈၼႆ။
မၢႆတွင်းဝၼ်းသင်တႄႉတႄႉ ဢမ်ႇတၵ်းသဵင်လၢတ်ႈၸႃသင်သေ ဢွၵ်ႇမႃးၼႄ ဢဵၼ်ႁႅင်းၵၢင်ဝဵင်း ၸိူင်ႉၼႆ ႁဵတ်းႁႂ်ႈ ၵူၼ်းမိူင်းတူၵ်းၸႂ်။ ဢဵၼ်ႁႅင်းသိုၵ်းတႆးလႅင် ဢၼ်မႃးဢွၵ်ႇၼႄ တီႈဝဵင်းမိူင်းယၢင်းၼႆႉ တေမီးမွၵ်ႈ 100 ၵူၼ်းပိုၼ်ႉတီႈလၢတ်ႈၼင်ႇၼႆ။
တပ်ႉသိုၵ်းတႆးလႅင် SNA ၼႆႉ ၵေႃႇတင်ႈမႃး မိူဝ်ႈပီ 1989 ။ ပူၼ်ႉမႃးဝၼ်းတီႈ 05/07/2024 ၼႆႉ ၶွပ်ႈတဵမ် 35 ပီ။
သိုၵ်းတႆးလႅင်ၼႆႉ ၵေႃႇတင်ႈတပ်ႉၸုမ်းသေ တူင်ႉၼိုင်ဝႆႉတီႈဝဵင်းဝၢၼ်ႈမူၵ်း၊ ႁူမ်ႈမၢၵ်ႇလၢင်း၊ ၶမ်းတီႈ တိူင်းၸႄႈၵႅင်း တွၼ်ႈၼိူဝ်။
ယၢမ်းလဵဝ် တႂ်းတိူင်းၸႄႈၵႅင်း တွၼ်ႈၼိူဝ်ၼႆႉ တပ်ႉသိုၵ်းတႆးလႅင် မီးတပ်ႉၸုမ်းပဵၼ် 4 တပ်ႉၸုမ်း။
သိုၵ်းတႆးလႅင်ၼႆႉ ဢမ်ႇပိုတ်းယိုဝ်း သိုၵ်းမၢၼ်ႈတႄႉတႄႉ တိူဝ်ႇတိူဝ်ႇ၊ လွင်ႈၼႆႉ ပဵၼ်တိုဝ်းတၢင်းလီ ႁဵတ်းႁႂ်ႈသိုၵ်းမၢၼ်ႈ သႄႇယူင်းသၢင်ႈပၼ်ႁႃ ၼႂ်းၵႄႈၸုမ်းသိုၵ်းတႆးလႅင်လႄႈ ၸုမ်းသိုၵ်းၶၢင်။ ၼႄးသိုၵ်းတႆးလႅင် ႁူမ်ႈသိုၵ်းမၢၼ်ႈသေ ပိုတ်းယိုဝ်းသိုၵ်းၶၢင်လႄႈ သိုၵ်း PDF တႂ်ႈသိုၵ်းၶၢင် ဝႃႈၼႆသေတႃႉ – ၵူၼ်းပိုၼ်ႉတီႈတႄႉ လၢတ်ႈဝႃႈ သိုၵ်း PDF ဢၼ်တူင်ႉၼိုင် ၼႂ်းတိူင်းၸႄႈၵႅင်းလႄႈ မိူင်းၶၢင် တွၼ်ႈတႂ်ႈၼႆႉၵေႃႈ ပဵၼ်ၵူၼ်းၼုမ်ႇ ပီႈၼွင်ႉတႆးလႅင်လွၼ်ႉလွၼ်ႉ ၵူၼ်းပၵ်းတႃၵၢၼ်မိူင်းၶဝ် လၢတ်ႈၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ