တီႈဝဵင်းပၢင်လွင်း မိူင်းတႆးပွတ်းၸၢၼ်းၼၼ်ႉ ၼၢင်းယိင်း ဢႃယု 56 ပီ ၵူၼ်းဝၢၼ်ႈၼွင်ဝူဝ်း ဢၼ်ပၢႆႈ ၽေးပၢင်တိုၵ်း ၵႂႃႇယူႇဝႆႉၼႂ်းသူၼ်ၶဝ်ႈၵၢပ်ႇမၼ်းၼၢင်းၼၼ်ႉ ၺႃးၵူၼ်းၼုမ်ႇ ၵေႃႉၼိုင်ႈ ဢဝ်မိတ်ႈၸမ်ႈသေ ၵၼ်ႉၸၼ်။   

ဝၼ်းတီႈ 26/10/2024 ပႃႈဝုၼ်း (ပဵၼ်ၸၢဝ်းပဢူဝ်း) ၺႃးၵူၼ်းၸၢႆးၼုမ်ႇ ၵေႃႉၼိုင်ႈ ၵၼ်ႉၸၼ် ၽွင်းမၼ်းၼၢင်းႁဵတ်းၵၢၼ်ယူႇၼႂ်းသူၼ်ၶဝ်ႈၵၢပ်ႇ ၸွမ်းလၢၼ်ယိင်းလဵၵ်ႉဢွၼ်ႇမၼ်း ဢႃယု 5 ၶူပ်ႇ တီႈဝၢၼ်ႈၼွင်ဝူဝ်း။

ၵူၼ်းၸၢႆးယူႇဝၢၼ်ႈလဵဝ်ၵၼ်တင်း ပႃႈဝုၼ်း လၢတ်ႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ ပဵၼ်သိုၵ်းမၢၼ်ႈ၊ မတ်ႉပႃႈဝုၼ်းသေ ၵၼ်ႉၸၼ်လူလၢႆမၼ်းၼၢင်း တီႈသူၼ်ၶဝ်ႈၵၢပ်ႇၶဝ် ၼႆဢေႃႈ။ ပဵၼ်ၽွင်းၵူၼ်းမိူင်း လႆႈ တုၵ်ႉလႆႈမႆႈ ပၢႆႈၽေးသိုၵ်း၊ သိုၵ်းမၢၼ်ႈ ႁဵတ်းတေႃႇၵူၼ်းထဝ်ႈ သႅၼ်းပၢၼ်မႄႈၶဝ် ၸိူင်ႉၼႆ လႆႈဝႃႈပဵၼ် လၢႆး ႁဵတ်းဢၼ်မိူၵ်ႈလိူင်းတႄႉတႄႉ ဢမ်ႇၸႂ်ႈလၢႆးႁဵတ်းၵူၼ်းသေဢိုတ်း” – ဝႃႈၼႆ။

လွင်ႈၼႆႉ ၼၢင်းယိင်း ၽူႈတူင်ႉၼိုင် လွင်ႈတူင်ႇဝူင်းၵူၼ်းၼႂ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – ဢၼ်ၵၼ်ႉၸၼ်ပႃႈဝုၼ်းၼၼ်ႉ ပဵၼ်ၽႂ်ၸုမ်းလႂ်တႄႉတႄႉ ပႆႇၸၢင်ႈယိုၼ်ယၼ်လၢတ်ႈလႆႈ။ ပႃႈဝုၼ်း လၢတ်ႈဝႃႈ ပဵၼ်ၵူၼ်းၼုမ်ႇသႅၼ်းပၢၼ်ဢႃယုမွၵ်ႈ 20 ပီၼႆႉၵူၺ်း။ ဢဝ်မိတ်ႈၸမ်ႈသေ လွၵ်ႈငိုတ်ႈမၼ်းၼၢင်း။ လၢတ်ႈတၢင်းၵႂၢမ်းမၢၼ်ႈ – ဝႃႈၼႆ။

“တီႈၼိူဝ်လွႆ ႁိမ်းသူၼ်ၶဝ်ႈၵၢပ်ႇၼၼ်ႉသမ်ႉ မီးသိုၵ်းမၢၼ်ႈပၵ်းပၢင်သဝ်းဝႆႉ၊ ၼႂ်းပိုၼ်ႉတီႈ တၢင်းပဵင်းႁိမ်း ဝၢၼ်ႈၼွင်ဝူဝ်းသမ်ႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်းလႄႈ သိုၵ်း PDF ။ ၵွပ်ႈၼႆ တေပဵၼ်ၽႂ်ၸုမ်းလႂ် တႄႉတႄႉပႆႇၸၢင်ႈလၢတ်ႈ။ ပႃႈဝုၼ်းလၢတ်ႈဝႃႈ ၵူၼ်းၸၢႆးၼုမ်ႇၵေႃႉၼၼ်ႉ ၼုင်ႈဝႆႉၶူဝ်းၵူၼ်းႁိူၼ်း။ ဢမ်ႇၸႂ်ႈၶူဝ်းသိုၵ်း”- ဝႃႈၼႆ။

ယၢမ်းလဵဝ်တႄႉ ပႃႈဝုၼ်းၼႆႉ လုၵ်ႉတီႈသူၼ်ၶဝ်ႈၵၢပ်ႇသေ ၶၢႆႉမႃးယူႇၸွမ်းၵူၼ်းဝၢၼ်ႈၶဝ်တီႈ ၵျွင်းမုၼ်ၸဝ်ႈ ဝၢၼ်ႈၼွင်ဝူဝ်းၶိုၼ်းယဝ်ႉ။ တိုၵ်ႉလႆႈႁပ်ႉလွင်ႈယူတ်းယႃပၢႆးၸႂ်ဝႆႉယူႇ၊ ၼွၵ်ႈလိူဝ်ၼၼ်ႉ ၵေႃႉဢၼ် ႁဵတ်းၽိတ်းပူၼ်ႉပႅၼ်ၵေႃႈ တႃႇလႆႈႁပ်ႉတူတ်ႈတၢမ်ႇၼၼ်ႉ ႁဝ်းၶႃႈလႄႈ ၽူႈမီးပုၼ်ႈၽွၼ်းၼႂ်းဝၢၼ်ႈ တေၸွႆႈၵၼ်ၶပ်းၶိုင်ၵႂႃႇ  – မၼ်းၼၢင်းသိုပ်ႇလၢတ်ႈၼင်ႇၼႆ။

လွင်ႈၼႆႉ ၽူႈၶၢၼ်ပၢၵ်ႇ PNO ၸဝ်ႈႁၢၼ်တၢၼ်းၵျွႆႇ တွပ်ႇလၢတ်ႈတီႈ လၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ ၵၼ်ႉၸၼ် ၵူၼ်းဝၢၼ်ႈၼႆႉ ဢမ်ႇၵဵဝ်ႇၵၼ်တင်းႁဝ်းလူး။ ငိၼ်းဝႃႈတႄႉ ဢမ်ႇၸႂ်ႈ ၵၼ်ႉၸၼ်လူလၢႆၼႃ။ ၶဝ်ႁွင်ႉၵႂႃႇၵူတ်ႇထတ်း ၵူၺ်းယူဝ်ႉ။ တေႃႈလဵဝ် တင်းပၢင်လွင်းၼႆႉၵေႃႈ ႁဝ်းၶႃႈ ၵူတ်ႇထတ်းၵူၼ်းၵႂႃႇမႃး ၶဵင်ႈၶႅင် လွင်ႈႁူမ်ႇလူမ်ႈဝႆႉယူႇ။ ပေႃးပဵၼ်လွင်ႈၵၼ်ႉၸၼ်တႄႉ လူဝ်ႇလႆႈၵႄႈလိတ်ႈ ဢဝ်လိူင်ႈပၼ်တူတ်ႈတၢမ်ႇၵႂႃႇဢိူဝ်ႈ”- ဝႃႈၼႆ။

ၸဝ်ႈႁၢၼ်တၢၼ်းၵျွႆႇ သိုပ်ႇလၢတ်ႈထႅင်ႈဝႃႈ သိုၵ်းမၢၼ်ႈလႄႈ ပျီႇတူႉၸိတ်ႉပဢူဝ်း PNO ၼႆႉ ပၵ်းသဝ်း တူင်ႉၼိုင်ဝႆႉတၢင်းဝၢၼ်ႈၼမ်ႉၽႃမူ ၊ ၼွင်ဝူဝ်းၼႆႉသေ တေၵႅတ်ႇၶႄပိုၼ်ႉတီႈ ၼႃႈလိၼ် ပဢူဝ်းယူႇသဝ်းၼႆႉၵူၺ်း။ တေဢမ်ႇပူၼ်ႉပႅၼ်ၵႂႃႇယုင်ႈၸွမ်းပၼ်ႁႃတၢင်းမိူင်းယၢင်းလႅင် – ဝႃႈၼႆ။

ယၢမ်းလဵဝ် တၢင်းၸႄႈဝဵင်းပၢင်လွင်းၼႆႉ သိုၵ်းမၢၼ်ႈတင်း သိုၵ်းၽွမ်ႉႁူမ်ႈ ယၢင်းလႅင် ပိုတ်းယိုဝ်းၵၼ် ႁၢဝ်ႈႁႅင်း။ ၵူၼ်းပိုၼ်ႉတီႈ ပၢႆႈၽေးသိုၵ်းၵႂႃႇယူႇသဝ်းဝႆႉ တၢင်းၸႄႈဝဵင်းႁူဝ်ပူင်း၊ သီႇသႅင်ႇ ၸိူဝ်းၼႆႉ။

တႄႇႁူဝ်လိူၼ် ဢွၵ်ႊထူဝ်ႊပိူဝ်ႊၼႆႉမႃး သိုၵ်းမၢၼ်ႈၵေႃႈ ထႅမ်ႁႅင်းသိုၵ်းၶဝ်ႈမႃးတၢင်း ဝၢၼ်ႈဢိူင်ႇၸိူဝ်း ပဵၼ်ပၢင်တိုၵ်းဝႆႉ။ တီႈဝဵင်းပၢင်လွင်းၼႆႉ မီးဝႆႉ တပ်ႉဢမတ တပ်ႉၵွင်ႈလူင် မၢႆ 249 သေ လႃႈလီႈပိုတ်းယိုဝ်းၵွင်ႈလူင် ၵႂႃႇၵူႈႁူးၵူႈတၢင်း။ ၵွပ်ႈၼႆလႄႈ ၵူၼ်းဝၢၼ်ႈ 13 ဝၢၼ်ႈ ၼႂ်းၸႄႈဝဵင်းပၢင်လွင်း ႁူဝ်ၵူၼ်း 2 မိုၼ်ႇပၢႆ လႆႈပၢႆႈၽေးသိုၵ်းဝႆႉ။ 

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)