ၼႂ်းငဝ်းလၢႆးၵၢၼ်သိုၵ်း ၽႄႈလၢမ်း ပတ်းပိုၼ်ႉၸိုင်ႈမိူင်းယူႇၸိူင်ႉၼႆယၢမ်းလဵဝ် ၵူၼ်းၵမ်ႉထႅမ် ႁၼ်လီ ၸုမ်းသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းသမ်ႉ ယိင်ႈၶႅၼ်းတႅမ်ႈတၢင်ႇ ပိုၼ်ၽၢဝ်ႇဢွၵ်ႇမႃး လွင်ႈၶၢဝ်ႇ ဢၼ်လီယုပ်းၽၢၼ်ႈ ဢၼ်သၢင်ႈပၼ်ႁႃ။

ဝၼ်းတီႈ 11/10/2024    ၶျွင့် Telegram ဢၼ်မီးၸိုဝ်ႈဝႃႈ ပႃႉၺုၼ့် (ဘညွန့်) ဢၼ်ဝႃႈၼၼ်ႉ တႅမ်ႈတၢင်ႇ ဝႆႉဝႃႈ ၵူၼ်းပၼ်ၶၢဝ်ႇသိုၵ်းမၢၼ်ႈ ဢၼ်ၸုမ်းသိုၵ်းၵဝ်ႈၵၢင့် MNDAA တီ့ၺွပ်းဝႆ့ၼၼ့် တေထုၵ်ႇပၼ် တၢမ်ႇတၢႆယဝ့် ဝႃႈၼႆ။

 ၶျွင်ႉၶၢဝ်ႇပႃႉၺုၼ်ႉၼႆႉ  မီးၵူၼ်းတိတ်းတၢမ်း Subscriber 57000 ပၢႆ။ တႅမ်ႈတၢင်ႇပိုၼ်ၽၢဝ်ႇ ၶၢဝ်ႇပွမ်ႁူဝ်ၼႆႉ ဝႆႉတၢင်းၽႃႇသႃႇလိၵ်ႈမၢၼ်ႈ ဝႆႉ- ဢၢၼ်ႇတူၺ်းလႆႈတီႈ – https://archive.ph/1IgDX  

ၶၢဝ်ႇႁူဝ်ၼႆႉ  ၵူၼ်းၶဝ်ႈတူၺ်း မီး 24000 ပၢႆ ။

လိူဝ်ၼၼ့် ယူႇတီႈၶျွင့် ဢၼ်မီးၸိုဝ်ႈဝႃႈ Kyaw Swar တႅမ်ႈတၢင်ႇပိုၼ်ၽႄဝႆ့ထႅင်ႈဝႃႈ သိုၵ်းၵဝ်ႈၵၢင့်ၼႆ့ တင်ႈၸႂ်သၢင်ႈ ႁႂ်ႈၵဝ်ႈၵၢင့်တင်း မၢၼ်ႈမီးပၼ်ႁႃၵၼ်သေ ၽွင်းၽႅၼ်ယၼ်ႇသိုၵ်း 1027 တွၼ်ႈၼိုင်ႈၼၼ့် တီ့ၺွပ်းၶႃႈတၢႆၵူၼ်းၶိူဝ်းမၢၼ်ႈ 500 ၊ ၼႂ်းတွၼ်ႈသွင်သမ့် တီ့ၺွပ်းဝႆ့ၵူၼ်းၶိူဝ်းမၢၼ်ႈ 20 ပၢႆသေ မၢင်ၵေႃ့ ၺႃးၶႃႈတၢႆယဝ့်ၼႆ ပိုၼ်ၽႄၶၢဝ်ႇၽိတ်းဝႆ့ၼင်ႇၼႆ။

– https://archive.ph/exfEF

ၸွမ်းၼင်ႇ ၼႅင်ႈသၢၼ် ၸုမ်းထတ်းၶၢဝ်ႇပွမ်ၶၢဝ်ႇၽၢင်းမိူင်းမၢၼ်ႈ Myanmar Fact-checking Network ၶူၼ်ႉၶႂႃႉထတ်းတူၺ်းတႄႉ ပဵၼ်ၶၢဝ်ႇၽိတ်းၶၢဝ်ႇၽၢင်း ဢၼ်တင်ႈၸႂ်တႅမ်ႈဢွၵ်ႇပိုၼ်ၽႄၵူၺ်း ဝႃႈၼႆ။

ၸွမ်းၼင်ႇၶေႃႈထတ်းႁၼ်တႄ့ –

မိူဝ်ႈဝၼ်းတီႈ 10/10/2024 သိုၵ်းၵဝ်ႈၵၢင့် MNDAA ပိုၼ်ၽၢဝ်ႇဢွၵ်ႇမႃးဝႃႈ ဝၢႆးလင်သိုၵ်းမၢၼ်ႈၸႂ့်ၶိူင်ႈမိၼ်ပွႆႇမၢၵ်ႇ တီႈဝဵင်းလႃႈသဵဝ်ႈၼၼ့် လႆႈၵူတ်ႇထတ်းတီ့ၺွပ်းဝႆ့ ၵူၼ်းလႆႈထၢင်ႇထိူမ်ဝႃႈပၼ်ၶၢဝ်ႇသိုၵ်းမၢၼ်ႈ (ဒလန်) 20 ပၢႆ ဝႃႈၼႆ။

ၵူၺ်းၵႃႈ ဢမ်ႇလႆႈၶႃႈတၢႆၼႆ ပိုၼ်ၽၢဝ်ႇပႃးဝႆ့ၼင်ႇၼႆ။ ၶေႃႈပိုၼ်ၽၢဝ်ႇၼၼ့် တူၺ်းလႆႈတီႈၼႆႈ – https://shorturl.at/HcvnN

ၸုမ်းသိုဝ်ႇ သူၺ်ႇၽီႇမျေႇၵေႃႈ ဢၢင်ႈဢိင်ဢဝ် ၵူၼ်းၸမ်ၸႂ်တင်းသိုၵ်းၵဝ်ႈၵၢင့်သေ တႅမ်ႈဢွၵ်ႇဝႆ့ဝႃႈ တီႈဝဵင်းလႃႈသဵဝ်ႈၼၼ့် သိုၵ်းၵဝ်ႈၵၢင့် MNDAA ၶဝ် တီ့ၺွပ်းဝႆ့ ၵူၼ်းပၼ်ၶၢဝ်ႇသိုၵ်းမၢၼ်ႈ 20 ပၢႆသေတႃ့ ဢမ်ႇမီးလွင်ႈၶႃႈတၢႆ ဝႃႈၼႆ။

– https://www.facebook.com/share/p/PsQ67WLg6LgvU5Cm/

ၽွင်းမိူဝ်ႈ ၽႅၼ်ၵၢၼ်ယၼ်ႇသိုၵ်း 1027 တွၼ်ႈၼိုင်ႈၼၼ့် ယူႇတီႈသိုၵ်းၵဝ်ႈၵၢင့် MNDAA လႆႈတီ့ၺွပ်းဝႆ့ ၵူၼ်းၶိူဝ်းမၢၼ်ႈ ၼပ့်ႁူဝ်ပၢၵ်ႇၵေႃ့ယူႇသေတႃ့ လွင်ႈဝႃႈ ၸိူဝ်းၶဝ်ၺႃးသိုၵ်းၵဝ်ႈၵၢင့် ၶႃႈတၢႆပႅတ်ႈယဝ့်ဢၼ်ဝႃႈၼၼ့်တႄ့ ပဵၼ်ၶၢဝ်ႇၽၢင်း ၶၢဝ်ႇၽိတ်းၵူၺ်း။

မီးၵူၼ်းလွတ်ႈဢွၵ်ႇမႃးၶိုၼ်းသေ လႆႈတွပ်ႇဝႆ့တီႈသိုဝ်ႇၶၢဝ်ႇယူႇ။

– https://archive.ph/iB1xA

ၵွပ်ႈၼႆလႄႈ ၵူၼ်းမိူင်း ၸိူဝ်းၺႃးမၢၵ်ႇၼေးဝႃႈ ပဵၼ်ၽူႈပၼ်ၶၢဝ်ႇသိုၵ်းမၢၼ်ႈသေ ၺႃးတီ့ၺွပ်းဝႆ့ၼၼ့် တေပၼ်တၢမ်ႇတၢႆယဝ့် ၊ ၺႃးၶႃႈတၢႆယဝ့် ဢၼ်ဝႃႈၼၼ့် ပဵၼ်လွင်ႈ ၽူႈပၼ်ႁႅင်းသိုၵ်းမၢၼ်ႈ တင်ႈၸႂ်ပိုၼ်ၽႄၶေႃႈမုၼ်းၶၢဝ်ႇငၢဝ်းၽိတ်းၵူၺ်း။ တင်ႈၸႂ်ႁဵတ်းႁႂ်ႈ ၵဝ်ႈၵၢင့်တင်း ၸၢဝ်းမၢၼ်ႈ မီးပၼ်ႁႃၵူၼ်းၶိူဝ်းၵၼ်။

ပူၼ့်မႃး မိူဝ်ႈဝၼ်းတီႈ 8/10/2024 ယူႇတီႈၶျွင့်ပၼ်ႁႅင်းသိုၵ်းမၢၼ်ႈ ပိုၼ်ၽႄဝႆ့ဝႃႈ MNDAA တင်း TNLA တတ်းလႅင်းၾူၼ်းသေ မၢပ်ႇၼေးၵူၼ်းမိူင်း ပဵၼ်ၵူၼ်းပၼ်ၶၢဝ်ႇသိုၵ်းမၢၼ်ႈ (ဒလန်) တီ့ၺွပ်းၶႃႈတၢႆပႅတ်ႈ မီး 50 ၵေႃ့ၼႆၼၼ့်ၵေႃႈ ပဵၼ်ၶၢဝ်ႇၽိတ်းမိူၼ်ၵၼ်။

ၵဵဝ်ႇၵပ်းလွင်ႈၼၼ့်သေ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ လႆႈၶူၼ့်ၶႂႃ့ထတ်းၸွမ်းဝႆ့ယူႇ။ ၸွမ်းၼင်ႇၶေႃႈထတ်းႁၼ်ၼၼ့် ၶဝ်ႈဢၢၼ်ႇလႆႈ တီႈၼႆႈ – – https://shorturl.at/o0o6V

ၵွပ်ႈၼႆလႄႈ သင်ဝႃႈ ပီႈၼွင်ႉၽူႈပၼ်ႁႅင်း ၽူႈဢၢၼ်ႇၶၢဝ်ႇႁဝ်းၶႃႈ ႁၼ်မႅၼ်ႈၶၢဝ်ႇလၢၵ်ႇလၢႆး ဢၼ်တႅမ်ႈၸွမ်းလူမ်း ဢၼ်လၢတ်ႈၸွမ်းလူမ်း ႁႂ်ႈပိူၼ်ႈၸူမ်းထွမ်ႇၵူၺ်းၼၼ်ႉၸိုင် ၶႂ်ႈႁႂ်ႈထတ်းသၢင်တူၺ်းလီလီ၊ ၵႂႃႇႁႃထွမ်ႇ ႁႃတူၺ်းၶၢဝ်ႇတီႈဢၼ် ႁွင်ႈၵၢၼ်သိုဝ်ႇၶၢဝ်ႇယႂ်ႇ လွတ်ႈလႅဝ်း ၾၢႆႇမၢၼ်ႈ ၾၢႆႇတႆး ၸိူဝ်းၼႆႉတူၺ်းထႅင်ႈလၢႆလၢႆတီႈ – ၸွင်ႇပိူၼ်ႈဢွၵ်ႇဝႆႉ ဢမ်ႇဢွၵ်ႇဝႆႉ ၼႆသေ ၸင်ႇယုမ်ႇယမ် – သေၵမ်း။ 

(Fact Check)