ပၢင်တိုၵ်းၼႂ်းၸိုင်ႈတႆးပွတ်းႁွင်ႇ ပႆႇၵိုတ်းပႆႇယဵၼ် တီႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ သိုၵ်းတဢၢင်း TNLA + PDF လႄႈ သိုၵ်းမၢၼ်ႈပိုတ်းယိုဝ်းၵၼ်ႁၢဝ်ႈႁႅင်း ၊ သိုၵ်းၸၢဝ်းၶိူဝ်း ယိုတ်းလႆႈတပ်ႉသိုၵ်းမၢၼ်ႈတင်းၼမ် ။

ၽွင်းသိုၵ်းမၢၼ်ႈၵၢၼ်ႉသိုၵ်းယူႇၵူႈတီႈၵူႈဝဵင်းၼႆႉ သိုၵ်းမၢၼ်ႈဢဝ်ၶိူင်ႈမိၼ်မႃးပၼ်ႇလဵပ်ႈ ပိုတ်းယိုဝ်း ႁိူၼ်းယေးၵူၼ်းမိူင်းယူႇၵူႈၶမ်ႈၶိုၼ်း။  ၵူၼ်းမိူင်းလႆႈပၢႆႈၽေးသိုၵ်းယင်းပႆႇၸၢင်ႈပွၵ်ႈၶိုၼ်းႁိူၼ်း ။ တႃႇႁႂ်ႈၵူၼ်းမိူင်း ၵူၼ်းသိုၵ်း တေမီးလွင်ႈၶဝ်ႈၸႂ်ၽိတ်းၼိူဝ်ၵၼ်ၼၼ်ႉ သမ်ႉမီး ၶၢဝ်ႇပွမ်ၶၢဝ်ႇၽၢင်း သႄႇယူင်းပူင်းၸႃႉ မိူၼ်သူၼ်းဢီးႁႂ်ႈပၢင်တိုၵ်းသိုပ်ႇပဵၼ်ထႅင်ႈ။

တီႈၶျွင်ႉ Telegram ဢၼ်မီးၸိုဝ်ႈ ပႃႉၺုၼ်ႉ  “ဘညွှန့်” ဢၼ်မီးၵူၼ်းတိတ်းတၢမ်း  Subscriber 57000 ပၢႆၼၼ်ႉ တႅမ်ႈတၢင်ႇပိုၼ်ၽၢဝ်ႇဝႃႈ “သိုၵ်းပလွင်ႈ တီႉဢဝ်သိုၵ်း PDF သေ ၵႂႃႇထိူဝ်ၶေႃးၶႃႈႁႅမ်တၢႆပႅတ်ႈ ” (ၼႆၾၢႆႇတၢင်းၽႃႇသႃႇလိၵ်ႈမၢၼ်ႈ)- ဝႃႈၼႆဝႆႉ။  

ၶၢဝ်ႇႁူဝ်ၼႆႉ ပိုၼ်ၽႄႈဢွၵ်ႇမႃးမိူဝ်ႈဝၼ်းတီႈ 11 ဢွၵ်ႊထူဝ်ႊပိူဝ်ႊၼႆႉ။

ပေႃးပဵၼ်ၶၢဝ်ႇၽၢမ်းၶၢဝ်ႇပွမ် ၶၢဝ်ႇဢမ်ႇပဵၼ်တၢင်းၵၢၼ် ၶၢဝ်ႇဢၼ်တႅမ်ႈၸွမ်းလူမ်း ဢၼ်လၢတ်ႈၸွမ်းလူမ်းၶႂ်ႈပဵၼ် ၸိူင်ႉၼႆ သမ်ႉမီးၵူၼ်းတူၺ်းၼမ်။ ၶၢဝ်ႇႁူဝ်ၼႆႉၵေႃႈ တၢင်ႇၶၢဝ်းတၢင်း ဝၼ်းသွင်ဝၼ်းၵူၺ်းမီးၵူၼ်းတူၺ်း 3 မိုၼ်ႇပၢႆ။ ၵူၼ်းၸိူဝ်းထုၵ်ႇၸႂ်ၸွမ်းၶၢဝ်ႇၵေႃႈ သိုပ်ႇပိုၼ်ၽႄႈ သျႄးထႅင်ႈ တင်းၼမ်တင်းလၢႆ။  တူၺ်းၶၢဝ်ႇဢၼ်ဝႃႈမႃးၼႆႉတီႈ  – https://archive.ph/qeqkm

 ၶၢဝ်ႇပွမ်ၼၼ်ႉ ၶိုၼ်းသိုပ်ႇပိုၼ်ၽႄႈထႅင်ႈ  – https://archive.ph/bgsIN

ၸွမ်းၼင်ႇ ၼႅင်ႈသၢၼ် ၸုမ်းထတ်းၶၢဝ်ႇပွမ်ၶၢဝ်ႇၽၢင်းမိူင်းမၢၼ်ႈ ၶူၼ်ႉၶႂႃႉထတ်းတူၺ်းတႄႉ ၶၢဝ်ႇဢၼ်တႅမ်ႈတၢင်ႇၵႂႃႇလွင်ႈဝႃႈ ၸုမ်းယိပ်းၵွင်ႈၵၢင်ႇ 2 ၸုမ်းဢၼ်ပိုတ်းယိုဝ်းၸဝ်ႈဢႃႇၼႃႇသိုၵ်းမၢၼ်ႈ  – ၶိုၼ်းၶႃႈႁႅမ်ၵၼ်တၢႆ ဢၼ်ဝႃႈၼႆႉ – ဢမ်ႇၸႂ်ႈဢၼ်တႄႉမၼ်း။ ပဵၼ်ၸုမ်းၵမ်ႉထႅမ်ၸဝ်ႈဢႃႇၼႃႇသိုၵ်းမၢၼ်ႈ တင်ႈၸႂ်တႅမ်ႈတၢင်ႇယႃႉၵဝ်းႁႂ်ႈ မီးလွင်ႈႁၼ်ၽိတ်းပိူင်ႈသေ ၸုမ်းၶတ်းၸႂ်တႃႇတီႊမူဝ်ႊၶရေႊသီႊၼင်ႇၵၼ် မင်ၵၼ်ၶိုၼ်းၵူၺ်း ဝႃႈၼႆ။

 ၶၢဝ်ႇဢၼ်ထတ်းႁၼ်တႄႉ

ၵေႃႉဢၼ်တႅမ်ႈၶၢဝ်ႇဝႃႈ “ TNLA တီႉ PDF သေ လၵ်ႉလွမ်ၶႃႈႁႅမ်တၢႆ” ၼႆၼၼ်ႉ ဢမ်ႇတၢင်ႇဝႆႉပႃးလၵ်းထၢၼ်သၢၵ်ႈသေႇသင်။

 လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈလႆႈၵပ်းသိုပ်ႇၸူးတၢင်းၵူၼ်းမိူင်းဝဵင်းၵျွၵ်ႉမႄးသေတွင်ႈထၢမ်တူၺ်းၵေႃႈ ၵူၼ်းပိုၼ်ႉတီႈလၢတ်ႈဝႃႈ ဢမ်ႇလႆႈငိၼ်းၶၢဝ်ႇၵဵဝ်ႇၵပ်းလွင်ႈၼႆႉ  ။

ၵပ်းသိုပ်ႇၸူးတၢင်း တပ်ႉသိုၵ်းပူတ်းပွႆႇၵူၼ်းမိူင်းၸၢဝ်းမၢၼ်ႈ  BPLA ဢၼ်ပဵၼ်ၸုမ်းဢူၺ်းလီၵၼ်တင်း PDF သေ တေႃႇသူႈတိုၵ်းတေႃးသိုၵ်းမၢၼ်ႈ ယူႇယၢမ်းလဵဝ်ၼႆႉၼၼ်ႉၵေႃႈ ၽူႈၶၢၼ်ပၢၵ်ႇၶဝ်ယိုၼ်ယၼ်လၢတ်ႈဝႃႈ “လွင်ႈၼႆႉႁဝ်းၶႃႈဢမ်ႇလႆႈငိၼ်း”  ။

ၵပ်းသိုပ်ႇၸူးၽူႈၶၢၼ်ပၢၵ်ႇ TNLA လူၺ်းယေႇဢူး ၵေႃႈ ၵပ်းသိုပ်ႇဢမ်ႇလႆႈ။  

ႁွင်ႈၵၢၼ်ၶၢဝ်ႇလွတ်ႈလႅဝ်း ဢၼ်ယူႇၼႂ်းပိုၼ်ႉတီႈၵေႃႈ ဢမ်ႇႁၼ်ဢွၵ်ႇၶၢဝ်ႇလွင်ႈၼႆႉဝႆႉဝႃႈႁိုဝ်။

 ၵွပ်ႈၼႆလႄႈ ယူႇတီႈၸုမ်းၶၢဝ်ႇၽူႈတွႆႇႁွၵ်ႈသေ ထတ်းသၢင်တူၺ်းဝႃႈ – ၶၢဝ်ႇ TNLA  တီႉသေၶႃႈႁႅမ်ၶိုၼ်းၵူၼ်းသိုၵ်း  PDF ဢၼ်ပဵၼ်ၸုမ်းဢူၺ်းလီၵၼ်ၼႆႉ – ပဵၼ်ၶၢဝ်ႇၵူၼ်းၸိူဝ်းဢၼ်ႁၼ်လီၵမ်ႉထႅမ်သိုၵ်းမၢၼ်ႈသေ တင်ႈၸႂ်ပွႆႇၶၢဝ်ႇပွမ်ၵူၺ်း။တင်ႈၸႂ်ႁႂ်ႈၸုမ်းလုၵ်ႉၽိုၼ်ႉၼင်ႇၵၼ်ၶဝ်ႈၸႂ်ၽိတ်းၼိူဝ်ၵၼ်သေ တႅၵ်ႇယႅၵ်ႈၵၼ်။ တင်ႈၸႂ်သၢင်ႈၶၢဝ်ႇပွမ် ႁႂ်ႈၵူၼ်းမိူင်းတူၵ်းၸႂ်ၵူဝ်ႁႄသေ ဢမ်ႇၸၢင်ႈယူႇသဝ်းလူၺ်ႈလီငၢမ်း မီးလွင်ႈႁူမ်ႇလူမ်ႈၵူၺ်း။

 ၵွပ်ႈၼႆလႄႈ သင်ဝႃႈ ပီႈၼွင်ႉၽူႈပၼ်ႁႅင်း ၽူႈဢၢၼ်ႇၶၢဝ်ႇႁဝ်းၶႃႈ ႁၼ်မႅၼ်ႈၶၢဝ်ႇလၢၵ်ႇလၢႆး ဢၼ်တႅမ်ႈၸွမ်းလူမ်း ဢၼ်လၢတ်ႈၸွမ်းလူမ်း ႁႂ်ႈပိူၼ်ႈၸူမ်းထွမ်ႇ ၵူၺ်းၼၼ်ႉၸိုင် ၶႂ်ႈႁႂ်ႈထတ်းသၢင်တူၺ်းလီလီ ၊ ၵႂႃႇႁႃထွမ်ႇ ႁႃတူၺ်းၶၢဝ်ႇတီႈဢၼ် ႁွင်ႈၵၢၼ်သိုဝ်ႇၶၢဝ်ႇယႂ်ႇ လွတ်ႈလႅဝ်း ၾၢႆႇမၢၼ်ႈ ၾၢႆႇတႆး ၸိူဝ်းၼႆႉတူၺ်းထႅင်ႈလၢႆလၢႆတီႈ – ၸွင်ႇပိူၼ်ႈဢွၵ်ႇဝႆႉဢမ်ႇဢွၵ်ႇဝႆႉ ၼႆသေၸင်ႇယုမ်ႇယမ် -သေၵမ်း။  

(Fact Check)