ဝၼ်းတီႈ 27/10/2024 ၼႆႉ ၽႅၼ်ယၼ်ႇသိုၵ်း 1027 – ဢၼ်သိုၵ်းဢူၺ်းလီ 3 ၸုမ်း TNLA, MNDAA, AA  ပိုတ်းယိုဝ်းသိုၵ်းမၢၼ်ႈၼႂ်းၸိုင်ႈတႆးပွတ်းႁွင်ႇ ၶွပ်ႈတဵမ်ပီ ၊ ၸုမ်းတူင့်ၼိုင်သုၼ်ႇလႆႈသုၼ်ႇပဵၼ်ၵူၼ်း HRAN ၵဵပ်းၶေႃႈမုလ်းသေ ပိုၼ်ၽၢဝ်ႇဝႆႉဝႃႈ  ၵူၼ်းမိူင်းမၢတ်ႇၸဵပ်းလူႉတၢႆ ယွၼ်ႉပၢင်တိုၵ်းမီး ႁဵင်ပၢႆ ဝႃႈၼႆ။

ၼႂ်းတိုဝ်ႉတၢင်းၼႆႉ HRAN Human Rights Action Network ၸုမ်းၼႅင်ႈသၢၼ်တူင်ႉၼိုင် သုၼ်ႇလႆႈၵူၼ်း ဢွၵ်ႇလိၵ်ႈပိုၼ်ၽၢဝ်ႇ ၽိုၼ်ၼိုင်ႈ ပႃးဝႆႉ 6 ၶေႃႈ။ ၼႂ်းၼၼ်ႉပႃးဝႆႉဝႃႈ –  ၼႂ်းၶၢဝ်းတၢင်း 1 ပီ သိုၵ်းမၢၼ်ႈတင်း သိုၵ်းဢူၺ်းလီ ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၼမ်ႉၶမ်း၊ မူႇၸေႊ၊ သႅၼ်ဝီ၊ ၵူတ်ႉၶၢႆ၊ ၵုၼ်လူင်၊ လၢဝ်ႇၵၢႆး၊ လႃႈသဵဝ်ႈ၊ မိူင်းၵုတ်ႈ၊ မိူင်းမိတ်ႈ၊ ၼွင်ၶဵဝ်၊ သီႇပေႃႉ၊ ၼမ်ႉတူႈ၊ မၢၼ်ႈတူင်ႈ၊ ၼမ်ႉသၼ်ႇ၊ မိူင်းလူင်၊ မိူင်းငေႃႉ၊ ၶျိၼ်းသူၺ်ႇႁေႃႇ (ဝဵင်းၼမ်ႉၽႃႈ) ၸိူဝ်းၼႆႉ။ သိုၵ်းမၢၼ်ႈ ဢဝ်ၶိူင်ႈမိၼ် မိူဝ်းပွႆႇမၢၵ်ႇလႄႈ ႁိူၼ်းယေး၊ ဝတ်ႉၵျွင်း၊ ႁူင်းႁဵၼ်း၊ ႁူင်းယႃ တုမ်ႉတိူဝ်ႉလူႉၵွႆ ဢၢၼ်ႇႁူဝ်ႁဵင်လင်။ ၵူၼ်းပိုၼ်ႉတီႈ လူႉတၢႆ 339 ၵေႃႉ၊ ၵူၼ်းမၢတ်ႇၸဵပ်း 627 ၵေႃႉ – ဝႃႈၼႆ။

ၼႂ်းၶၢဝ်းတၢင်းပၢင်တိုၵ်းၼႆႉမႃး ၵူၼ်းဝၢၼ်ႈၵူၼ်းမိူင်း ပဵၼ်ဢၼ်တုမ်ႉတိူဝ်ႉပၢႆးတူဝ် ပၢႆးၸႂ်သေဢမ်ႇၵႃး၊ လႅင်းၾူၼ်း၊ လႅင်းဢိၼ်ႊထိူဝ်ႊၼႅတ်ႊ ဢမ်ႇလႆႈလႄႈ ၵၢၼ်ၵပ်းသိုပ်ႇတိတ်းတေႃႇၵေႃႈ ယၢပ်ႇၽိုတ်ႇဝႆႉ တေႃႇထိုင်ဝၼ်းမိူဝ်ႈၼႆႉ။

HRAN တုၵ်းယွၼ်းဝႆႉ ၸိုင်ႈမိူင်းႁိမ်းႁွမ်းမိူင်းမၢၼ်ႈ – ယႃႇၵမ်ႉၸွႆႈလွင်ႈၵၢၼ်မိူင်း၊ ပၢႆးမၢၵ်ႈမီး ဢိၵ်ႇလၢႆလၢႆလွင်ႈပၼ်သိုၵ်းမၢၼ်ႈလႃးလႃး။ ႁႂ်ႈဢွၼ်ၵၼ်ဝႆႉၸႂ်သႂ်ႇႁႅင်းလွင်ႈ ၵူၼ်းတေႃႇၵူၼ်း ဢီးလူၸွႆႈထႅမ်ၵၼ်သေ ပူၵ်းပွင်ပၼ်ၵူၼ်းမိူင်းႁူမ်ႈတုမ်ၵႂႃႇသေၵမ်း ဝႃႈၼႆ။

ဝၼ်းဢၼ်ၽႅၼ်ယၼ်ႇသိုၵ်း 1027 ၶွပ်ႈတဵမ်ပီ  မိူဝ်ႈဝၼ်းတီႈ 27/10/2024 ၼၼ်ႉၵူၺ်း ယၢမ်းၵၢင်ၼႂ်ၸဝ်ႉ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇတီႈဝဵင်းၼမ်ႉၶမ်း 2 လုၵ်ႈ။ တီႈဝဵင်းလၢဝ်ႇၵၢႆး ၵေႃႈပွႆႇ။ ယၢမ်းၵၢင်ၶမ်ႈသမ်ႉ မႃးပွႆႇမၢၵ်ႇ တီႈဝဵင်း ၼွင်ၶဵဝ်။ ထိုင်မႃးၵၢင်ၶိုၼ်း 9 မူင်းၶိုင်ႈသမ်ႉ ၵႂႃႇပွႆႇမၢၵ်ႇလူင်သႂ်ႇ တီႈဝဵင်းသႅၼ်ဝီ 8 လုၵ်ႈ။

ဝၢႆးလင် ပၢင်တိုၵ်း ၽႅၼ်ယၼ်ႇသိုၵ်း 1027 ႁိုင်လိူၼ်ပၢႆ၊ မိူဝ်ႈဝၼ်းတီႈ 19/12/2023 သိုၵ်းတဢၢင်း ပိုၼ်ၽၢဝ်ႇဝႃႈ ယိုတ်းလႆႈတပ်ႉသိုၵ်းမၢၼ်ႈ ၸၶၢၼ်းတိတ်ႉၵူင်း ဝဵင်းၼမ်ႉၶမ်း (တပ်ႉသိုၵ်းဢၼ်လမ်ႇလွင်ႈ တႃႇၽႅၼ်ၵၢၼ်သိုၵ်းမိူင်းတႆးပွတ်းႁွင်ႇ) ၼႆသေ ထိုင်မႃးဝၼ်းတီႈ 22/12/2023 တႄႇပူၵ်းတုင်းၶၢဝ်လႄႈ တုင်းၸိူဝ်ႉၸၢတ်ႈတဢၢင်း ၼႂ်းဝဵင်းၼမ်ႉၶမ်း။ သိုၵ်းမၢၼ်ႈလႆႈထွႆထွၼ်ဢွၵ်ႇဝဵင်း။ ဝၢႆးၼၼ်ႉၵေႃႈ သိုၵ်းလွႆ တႄႇပၼ်ႇၵၢၼ်ၽွင်းငမ်းၶဝ်မႃးႁင်းၶေႃ တီႈဝဵင်းၼမ်ႉ ၶမ်း။ တေႃႇထိုင်ဝၼ်းမိူဝ်ႈၼႆႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)