သိုၵ်းမၢၼ်ႈတင်း သိုၵ်းတဢၢင်း TNLA သိုပ်ႇပဵၼ်ပၢင်တိုၵ်းၵၼ် တၢင်းဝဵင်းၼွင်ၶဵဝ်ထႅင်ႈ ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉၵွင်ႈလူင်လႄႈ ၶိူင်ႈမိၼ် ပိုတ်းယိုဝ်းၸွႆႈ။

ဝၼ်းတီႈ 26-27/10/2024 ၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ႁူမ်ႈ PDF ပဵၼ်ပၢင်တိုၵ်းၵၼ် တၢင်းဝၢၼ်ႈတွင်းၶမ်း၊ ပၢၼ်ႉပူၺ်း၊ ၵမ်ႉၵေႃႇ ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

ၽူႈၸၢႆး ဢႃယု 40 ပၢႆ ၵူၼ်းဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ -“ဝၼ်းတီႈ 26-27 သွင်ဝၼ်းၼႆႉ ၶဝ်ယိုဝ်းၵၼ် တင်းဝၼ်းတင်းၶိုၼ်းၶႃႈယဝ်ႉ။ ထိုင်မႃး ဝၼ်းတီႈ 27 ယၢမ်းၵၢင်ၼႂ် သဵင်ၵွင်ႈၶဝ် ၸင်ႇယဵၼ်လူင်းဢေႃႈ။ သိုၵ်းမၢၼ်ႈသမ်ႉ လုၵ်ႉတၢင်းဝၢၼ်ႈပၢၼ်ႉပူၺ်းၼၼ်ႉသေ ပွႆႇမၢၵ်ႇလူင်မႃး တၢင်းဝၢၼ်ႈဢုမ်ႇတီး၊ ဝၢၼ်ႈၶူၵ်ႉၼမ်ႉ၊ ဝၢၼ်ႈၵမ်ႉၵေႃႇလႄႈ တၢင်းၶွႆႈ ၸိူဝ်းၼႆႉ။ ၵမ်ႈၼမ်တႄႉ မၢၵ်ႇမႃးတူၵ်းၼႂ်းၼႃး/ သူၼ် ၸိူဝ်းၼႆႉဢေႃႈ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 24-25 ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းမႃးပွႆႇမၢၵ်ႇ တၢင်းဝၢၼ်ႈၵမ်ႉၵေႃႇၼႆႉ တင်းၼမ် ဝႃႈ ၼႆ။

ယွၼ်ႉပၢင်တိုၵ်း 1027 ၼႆႉသေ ႁဵတ်းႁႂ်ႈၵူၼ်းမိူင်းၼွင်ၶဵဝ် လႆႈပၢႆႈၽေးသိုၵ်း ဢမ်ႇယွမ်း 10 ဝၢၼ်ႈ။ ၵမ်ႈၼမ် ပၢႆႈသွၼ်ႈယူႇဝႆႉ ၸွမ်းဝတ်ႉဝႃးၽႃသိူဝ်ႇ၊ ဝၢၼ်ႈႁိမ်းႁွမ်း တီႈယၢၼ်ပၢင်တိုၵ်းလႄႈ တၢင်းဝဵင်းလိူဝ်ႇ၊ ပၢင်ႇဢူႈလူင်(ပၢင်ႁူႈ) ၸိူဝ်းၼၼ်ႉ။

ၵူၼ်းပၢႆႈၽေးသိုၵ်း ၽူႈၸၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ပၢႆႈၽေးသိုၵ်းမႃးၼႆႉ မီးၶၢဝ်းတၢင်း 4 လိူၼ်ပၢႆယဝ်ႉ။ တင်ႈတႄႇ ဝၼ်းတီႈ 25/06/2024 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ်ၼႆႉ ပႆႇလႆႈပွၵ်ႈၶႃႈ။ မၢင်ၸိူဝ်း မီးငိုၼ်းတႄႉ ပိူၼ်ႈပၢႆႈၵႂႃႇတၢင်းဝဵင်းလိူဝ်ႇ၊ ပၢင်ႁူႈ ၸိူဝ်းၼၼ်ႉ။ ၸိူဝ်းႁဝ်း ဢမ်ႇမီးငိုၼ်းတႄႉ ပၢႆႈယူႇဝႆႉၸွမ်းဝၢၼ်ႈ ၼႆႉၵူၺ်းၶႃႈဢေႃႈ”- ဝႃႈၼႆ။

ယၢမ်းလဵဝ် ၵူၼ်းဝၢၼ်ႈဢၼ်လႆႈပၢႆႈၽေးသိုၵ်းဝႆႉသမ်ႉ မိူၼ်ၼင်ႇ – ဝၢၼ်ႈပၢၼ်ႉပူၺ်း၊ ဝၢၼ်ႈဢုမ်ႇတီး၊ ဝၢၼ်ႈၵမ်ႉ ၵေႃႇ၊ ဝၢၼ်ႈတွင်းၶမ်း၊ ဝၢၼ်ႈၶူၵ်ႉၼမ်ႉ၊ တၢင်းၶွႆႈ ယဝ်ႉၵေႃႈ ဢိၵ်ႇထႅင်ႈလၢႆလၢႆဝၢၼ်ႈ။  

“ယၢမ်းလဵဝ် ၵူၼ်းဝၢၼ်ႈတႄႉ ပွၵ်ႈမိူဝ်းတူၺ်းႁိူၼ်း ၵမ်ႈၽွင်ႈယူႇ တၢင်းဝၢၼ်ႈဢုမ်ႇတီး၊ ၶူၵ်ႉၼမ်ႉ၊ ၵမ်ႉၵေႃႇ၊ တၢင်းၶွႆႈ ၸိူဝ်းၼႆႉ။ ၸုမ်းယိပ်းၵွင်ႈၶဝ်တႄႉ မီးၼႂ်းဝၢၼ်ႈယူႇ။ ၵူၺ်းၵႃႈ တီႈဝၢၼ်ႈပၢၼ်ႉပူၺ်း ၼၼ်ႉတႄႉ သိုၵ်းမၢၼ်ႈ ၶဝ်ယူႇဝႆႉ ၼၼ်ႉတႄႉ ၶဝ်ဢမ်ႇပၼ် ၶဝ်ႈဝၢၼ်ႈ။ မိူဝ်ႈၼႆႉ ၵၢင်ၼႂ် မၢၵ်ႇလူင်သိုၵ်းမၢၼ်ႈ ပွႆႇမႃးတူၵ်း ၼႂ်းၼႃးႁိမ်းဝၢၼ်ႈၶူၵ်ႉၼမ်ႉၼၼ်ႉ ဢမ်ႇယွမ်း 3 လုၵ်ႈ”- ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၵူၼ်းဝၢၼ်ႈတႄႉ ဢွၼ်ၵၼ်ပၢႆႈဢွၵ်ႇဝၢၼ်ႈယဝ်ႉသေတႃႉ ၵူၺ်းၵႃႈ ၸိူဝ်းမႆႈၸႂ်ႁိူၼ်းယေးတႄႉ ဢွၼ်ၵၼ်ပႂ်ႉယူႇ ၵမ်ႈၽွင်ႈ 1 ႁိူၼ်းလႂ် 1 ၵေႃႉ ၸဵမ်ၸိူဝ်းၼႆႉ။

ထႅင်ႈၾၢႆႇၼိုင်ႈသမ်ႉ ယၢမ်းလဵဝ် ပဵၼ်ၶၢဝ်းလူဝ်ႇဢဝ် မၢၵ်ႇၶဝ်ႈတဝ်ႈၼမ်ႉယဝ်ႉလႄႈ ၵူၼ်းမိူင်းတႄႉ ဢွၼ်ၵၼ်မႆႈၸႂ် လူဝ်ႇဢဝ်ၶဝ်ႈ ယွၼ်ႉဢမ်ႇၸၢင်ႈပွၵ်ႈမိူဝ်းဢဝ်လႄႈ မႆႈၸႂ်ဝႆႉပီၼႃႈ ၵူဝ်ဢမ်ႇမီးၶဝ်ႈၵိၼ် – ၵူၼ်းပၢႆႈၽေးလၢတ်ႈ။