သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇထႅင်ႈ တီႈဝဵင်းသႅၼ်ဝီ တိူဝ်ႉၺႃး ၵျွင်းၶရိတ်ႉယၼ်ႇ လုမ်းၽူႈ ၵွၼ်းၸႄႈဝဵင်းလႄႈ ႁိူၼ်းယေး ၵူၼ်းမိူင်း ၸိူဝ်းၼႆႉ လူႉၵွႆၼမ်။

ဝၼ်းတီႈ 27/10/2024 ယၢမ်းၵၢင်ၶမ်ႈမွၵ်ႈ 09:50 မူင်း ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ တူၵ်းတႅၵ်ႇ တီႈၵျွင်းၶရိတ်ႉယၼ်ႇ (ၸၢဝ်းၶၢင်) ၊ လုမ်းၽူႈၵွၼ်းၸႄႈဝဵင်းလႄႈ ႁိူၼ်းယေးၵူၼ်းမိူင်း ပွၵ်ႉ 3 ၵွင်းၵမ်ႉၵေႃႇ ဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။

ၽူႈယိင်း ဢႃယု 30 ပၢႆ ၵေႃႉၼိုင်ႈ တီႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶႃႈႁဝ်းငိၼ်းတႄႉ မိူဝ်ႈၶမ်ႈဝႃး ၶဝ်မႃးပွႆႇ 3 လုၵ်ႈ။ မွၵ်ႈ 10 မူင်း ၵၢင်ၶိုၼ်းၼႆႉဢေႃႈ။ မၢၵ်ႇၼႆႉ တူၵ်းၼႂ်းဝဵင်းတင်းသၢမ်လုၵ်ႈယဝ်ႉ။ တိူဝ်ႉၺႃး တီႈလုမ်းၽူႈၵွၼ်းၸႄႈဝဵင်း တီႈၼၼ်ႈ လႆႈငိၼ်းဝႃႈ ၵူၼ်းပႂ်ႉယၢမ်းၶဝ် ႁၢႆဝႆႉ 2 ၵေႃႉ။ ပွၵ်ႉ 3 ၵွင်းၵမ်ႉၵေႃႇ ၼၼ်ႉတႄႉ ၺႃး ႁိူၼ်းၵူၼ်း။ တီႈၵျွင်းၽြႃးၶၢင် ၸိူဝ်းၼႆႉ။ လႆႈငိၼ်းဝႃႈ တိူဝ်ႉၺႃးၵူၼ်း မၢတ်ႇၸဵပ်း 1-2 ၵေႃႉ”- ဝႃႈၼႆ။

ဢိင်ၼိူဝ် လွင်ႈမၢၵ်ႇၶိူင်ႈမိၼ် မႃးတူၵ်းသႂ်ႇ တီႈပွၵ်ႉ 3 ၵွင်းၵမ်ႉၵေႃႇၼႆႉသေ တုမ်ႉတိူဝ်ႉႁိူၼ်းယေး ၵူၼ်းဝၢၼ်ႈ လူႉၵွႆလၢႆလင်။ ၼႂ်းၼၼ်ႉ တႃႇႁိူၼ်းလင်ၼိုင်ႈ ၺႃးမၢၵ်ႇၶိူင်ႈမိၼ် တူၵ်းသႂ်ႇ 2 ပွၵ်ႈယဝ်ႉ – ၵူၼ်းပိုၼ်ႉတီႈ ဝဵင်းသႅၼ်ဝီလၢတ်ႈ။

ပူၼ်ႉမႃး မိူဝ်ႈဝၼ်းတီႈ 25/10/2024 ယၢမ်းၵၢင်ၶမ်ႈ 8 မူင်းပၢႆ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇ တီႈဝၢၼ်ႈၵွင်းႁေႃ ၼႂ်းဝဵင်းသႅၼ်ဝီ ၼၼ်ႉၵေႃႈ တိူဝ်ႉၺႃး ၵူၼ်းမိူင်းမၢတ်ႇၸဵပ်း 6 ၵေႃႉ။ ၼႂ်းၼၼ်ႉ တႃႇ 4 ၵေႃႉ လႆႈတိူဝ်ႉမၢတ်ႇ ၸဵပ်းႁႅင်း။

ၽႅၼ်ၵၢၼ်ယၼ်ႇသိုၵ်း 1027 ၼႆႉ ၶွပ်ႈတဵမ်မႃး 1 ပီ ၼႂ်းဝၼ်းတီႈ 27 ပူၼ်ႉမႃးၼႆႉ ယူႇတီႈ သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA လႄႈ သိုၵ်းရ ၶႅင်ႇ AA ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ ယိုတ်းမိူင်း မႃးႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ။

ဢိင်ၼိူဝ် လွင်ႈပၢင်တိုၵ်း ၶၢဝ်းတၢင်း 1 ပီၼႆႉသေ ယူႇတီႈ ၸုမ်းၼႅင်ႈသၢၼ် တူင်ႉၼိုင်တႃႇသုၼ်ႇလႆႈၵူၼ်း (Human Rights Action Network – HRAN) ပိုၼ်ၽၢဝ်ႇဢွၵ်ႇဝႆႉ ၼႂ်းဝၼ်းတီႈ 27 ၼႆႉ – ၵူၼ်းမိူင်းတႆး ပွတ်းႁွင်ႇ လႆႈမၢတ်ႇၸဵပ်းလူႉတၢႆ 1,011 ၵေႃႉ။ ၼႂ်းၼၼ်ႉ လူႉတၢႆ 339 ၵေႃႉ၊ မၢတ်ႇၸဵပ်း 672 ၵေႃႉ၊ ႁိူၼ်း ယေး၊ ဝတ်ႉဝႃးၽႃသိူဝ်ႇ၊ ႁူင်းယႃ၊ ႁွင်ႈယႃ၊ ႁူင်းႁဵၼ်း၊ ၵၢတ်ႇ ၸိူဝ်းၼႆႉ လူႉၵွႆ 1,905 လင် ဝႃႈၼႆ။