သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝဵင်းသႅၼ်ဝီ တိူဝ်ႉၺႃးၵူၼ်းမၢတ်ႇၸဵပ်း 6 ၵေႃႉ ၼႂ်းၼၼ်ႉ တႃႇ 4 ၵေႃႉ လႆႈတိူဝ်ႉမၢတ်ႇၸဵပ်းႁႅင်း။
ဝၼ်းတီႈ 25/10/2024 ယၢမ်းၵၢင်ၶမ်ႈ 8 မူင်းပၢႆ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇ တီႈဝၢၼ်ႈၵွင်းႁေႃ ၼႂ်းဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ဢမ်ႇယွမ်း 6 လုၵ်ႈ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပၼ်ႇလဵပ်ႈ ၸွမ်းဝဵင်းယဝ်ႉ မႃးပွႆႇမၢၵ်ႇလူင်းတီႈဝၢၼ်ႈၵွင်းႁေႃၼႆႉ ဢမ်ႇယွမ်း 6 လုၵ်ႈ။ ႁိူၼ်းယေးၵူၼ်းမိူင်းၸိူဝ်းၼႆႉ လူႉၵွႆတင်းၼမ်ဢေႃႈ”- ဝႃႈၼႆ။
သိုပ်ႇလၢတ်ႈဝႃႈ – “မၢၵ်ႇတိူဝ်ႉၺႃး ၵူၼ်းမိူင်း 6 ၵေႃႉ ၼႂ်းၼၼ်ႉ တႃႇ 4 ၵေႃႉ လႆႈမၢတ်ႇၸဵပ်းႁၢဝ်ႈႁႅင်း ယဝ်ႉၵေႃႈ လူႉသုမ်းတိၼ်ၶွၼ်ၼိုင်ႈၵေႃႈမီးဢေႃႈ။ လိူဝ်ၼၼ်ႉ တိူဝ်ႉပႃးမႄႈပုမ်လူင်လႄႈ လုၵ်ႈဢွၼ်ႇ”- ဝႃႈၼႆ။
ၼႂ်းဝၼ်းတီႈ 25 ၼႆႉၵူၺ်းၼင်ႇၵဝ်ႇ တီႈဝဵင်းလႃႈသဵဝ်ႈၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်းမႃးပွႆႇ မၢၵ်ႇသႂ်ႇ ၼႂ်းၸႄႈဝဵင်းလႃႈသဵဝ်ႈ ဢမ်ႇယွမ်း 5 ပွၵ်ႈ။ မၢၵ်ႇလူင်တူၵ်းသႂ်ႇ ႁူင်းၸၢၵ်ႈဢၼ်ႁဵတ်းဢွၵ်ႇမၢၵ်ႇထၢတ်ႈ လႄႈ ႁူင်းၸၢၵ်ႈတီႈယူႇတၼ်းသဝ်းလူႉၵွႆတင်းၼမ် လိူဝ်ၼၼ်ႉ မီးၵူၼ်းမၢတ်ႇၸဵပ်း လူႉတၢႆ ၼိုင်ႈၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ