တႃႇတေၸွႆႈတိုၵ်း ၼႂ်းပၢင်တိုၵ်းတင်း ယူႊၶရဵၼ်ႊၼႆသေ ၵူဝ်ႊရီႊယိူဝ်ႊႁွင်ႇ သူင်ႇဢဵၼ်ႁႅင်းသိုၵ်း 3,000 ပၼ်တီႈမိူင်းရတ်ႉသျႃႊ ဝႃႈၼႆ။

လွင်ႈသူင်ႇဢဵၼ်ႁႅင်းသိုၵ်းၼႆႉ ၼမ်လိူဝ်သေ ၸုမ်းၾၢႆႇၸွပ်ႇၶၢဝ်ႇၸိူဝ်ႉၸၢတ်ႈ မိူင်းၵူဝ်ႊရီႊယိူဝ်ႊၸၢၼ်း ၶၢတ်ႈလၢမ်းတၢင်ႇလၢတ်ႈၼႄဝႆႉၼၼ်ႉ 2 ပုၼ်ႈ – ၽူႈတႅၼ်းသၽႃး မိူင်းၵူဝ်ႊရီႊယိူဝ်ႊၸၢၼ်း လၢတ်ႈၵႂႃႇ ၼႂ်းဝၼ်းတီႈ 23/10/2024 ၼင်ႇၼႆ။

ၵူဝ်ႊရီႊယိူဝ်ႊႁွင်ႇ လႆႈပၼ်ၵႂၢမ်းမၼ်ႈဝႆႉဝႃႈ တေသူင်ႇဢဵၼ်ႁႅင်းသိုၵ်းပၼ် ရတ်ႉသျႃႊ တႃႇ 10,000 ၵေႃႉ။ ယၢမ်းလဵဝ် လႆႈသူင်ႇယဝ်ႉတူဝ်ႈၵႂႃႇ 3,000 ယဝ်ႉ။ မုင်ႈမွင်းဝႃႈ တေသူင်ႇပၼ် ႁႂ်ႈယဝ်ႉတူဝ်ႈတင်းမူတ်း ၼႂ်းလိူၼ်တီႊသႅမ်ႊပိူဝ်ႊတေထိုင်ၼႆႉ – ဝႃႈၼႆ။

သိုၵ်းရတ်ႉသျႃႊ လႆႈၾိုၵ်းသွၼ်ပၼ် လၢႆးၸႂ်ႉၶိူင်ႈမိၼ်တရူၼ်ႊ၊ လၢႆးၾိုၵ်းၽွၼ်ႉၵၢၼ်သိုၵ်း ၶိုၵ်ႉတွၼ်း ဢၼ်ၸႂ်ႉတိုဝ်း ၶိူင်ႈယိပ်းၵွင်ႈၵၢင်ႇၵူႈမဵဝ်းမဵဝ်း ပၼ်တီႈသိုၵ်းၵူဝ်ႊရီႊယိူဝ်ႊႁွင်ႇ။ ယွၼ်ႉၾၢႆႇရတ်ႉသျႃႊ ႁၼ်ထိုင်ဝႃႈ သိုၵ်းၵူဝ်ႊရီႊယိူဝ်ႊ ႁွင်ႇ မီးလွင်ႈၵႅၼ်ႇၶႅင် ၾၢႆႇပၢႆးတူဝ်ပၢႆးၸႂ်သေတႃႉ ၼႂ်းပၢင်တိုၵ်းၵၢပ်ႈပၢၼ်မႂ်ႇ ဢၼ်လႆႈၸႂ်ႉၶိူင်ႈမိၼ်တရူၼ်ႊၼၼ်ႉတႄႉ ပႆႇမီးလွင်ႈလူင်ႉလႅၼ်ႇ – ၽူႈတႅၼ်းသၽႃး မိူင်းၵူဝ်ႊရီႊယိူဝ်ႊ ၸၢၼ်း ဢီႇသွင်းၵႂၼ်း လၢတ်ႈၼင်ႇၼႆ။

ၵဵဝ်ႇလူၺ်ႈ ၶၢဝ်ႇဢွၵ်ႇမႃးဝႃႈ သိုၵ်းၵူဝ်ႊရီႊယိူဝ်ႊႁွင်ႇ ၶဝ်ႈၸွႆႈၼႂ်းပၢင်တိုၵ်း ယူႊၶရဵၼ်ႊၼႆၼၼ်ႉ ၾၢႆႇရတ်ႉသျႃႊတင်း ၵူဝ်ႊရီႊယိူဝ်ႊႁွင်ႇ တွပ်ႇထဵင်ဝႆႉယူႇတင်းသွင်ၾၢႆႇ။

ဝၼ်းတီႈ 22/10/2024 ၼႆႉၵေႃႈ ၸွမ်ၸိုင်ႈမိူင်းယူႊၶရဵၼ်ႊ တုၵ်းယွၼ်းထိုင် တီႈမိူင်းၸုမ်းဢူၺ်းလီၶဝ် ႁႂ်ႈတုမ်ႉတွပ်ႇလၢတ်ႈပၼ် ၵဵဝ်ႇလူၺ်ႈ သိုၵ်းၵူဝ်ႊရီႊယိူဝ်ႊႁွင်ႇ ၶဝ်ႈပႃးတီႈ ၼႂ်းပၢင်တိုၵ်းမိူင်းယူႊၶရဵၼ်ႊ – ဝႃႈၼႆ။

ႁွင်ႈၵၢၼ် ၾၢႆႇၸွပ်ႇၶၢဝ်ႇၵၢၼ်ၸိူဝ်ႉၸၢတ်း Soul မိူင်းၵူဝ်ႊရီႊယိူဝ်ႊၸၢၼ်း လၢတ်ႈဝႃႈ ဝၼ်းတီႈ 18/10/2024 ၼႆႉ ၵူဝ်ႊရီႊယိူဝ်ႊႁွင်ႇ ဢဝ်ႁိူဝ်းသေသူင်ႇဢဵၼ်ႁႅင်းသိုၵ်း 1,500 ပၼ်မိူင်းရတ်ႉသျႃႊ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။