ၶိူင်ႈၻရူၼ်ႊ ဢၼ်ၸႂ်ႉတိုဝ်းၼႂ်းပၢင်တိုၵ်း မိူင်းရတ်ႉသျႃႊ လႄႈ မိူင်းယူႊၶရဵၼ်ႊဢွၼ်တၢင်းသုတ်းၼႆႉ ပဵၼ်ၼၢင်းယိင်းၵူၼ်းမိူင်းယူႊၶရဵၼ်ႊၵေႃႉၶူင်သၢင်ႈႁဵတ်းဢွၵ်ႇ၊ မၼ်းၼၢင်း ၼႆႉ မိူဝ်ႈဢွၼ်တၢင်း ပဵၼ်ၵူၼ်းႁၢင်ႈၶိူင်ႈမွၵ်ႇပၼ် ၸွမ်းပၢင်ပွႆး ။

ၼႂ်းလုမ်ႈၾႃႉၼႆႉ ဢၼ်ၸႂ်ႉတိုဝ်းၻရူၼ်ႊသေ ယိုဝ်းၵၼ် တိုၵ်းၵၼ်ၼႆႉ ပဵၼ်တီႈပၢင်တိုၵ်း မိူင်းရတ်ႉသျႃႊ လႄႈ မိူင်းယူႊၶရဵၼ်ႊ။ ယွၼ်ႉပၢင်တိုၵ်းၼၼ်ႉသေ ၵၢၼ်ၶူင်သၢင်ႈႁဵတ်း ဢွၵ်ႇ ၻရူၼ်ႊ ၼႂ်းမိူင်း လႄႈ ၼွၵ်ႈမိူင်းယူႊၶရဵၼ်ႊ ၼမ်ႁႅင်းမႃးတေႉတေႉ။

ၼၢင်းယိင်းၵေႃႉၶူင်သၢင်ႈႁဵတ်းဢွၵ်ႇမႃး ၶိူင်ႈၻရူၼ်ႊဢၼ်ၸႂ်ႉတိုဝ်းၼႂ်းပၢင်တိုၵ်း မိူင်းရတ်ႉသျႃႊ လႄႈ မိူင်းယူႊၶရဵၼ်ႊၼႆႉ ၸိုဝ်ႈႁွင်ႉ Kseniia Kalmus ။

ၵွၼ်ႇမိူင်းရတ်ႉသျႃႊ တင်း မိူင်းယူႊၶရဵၼ်ႊ ပႆႇပဵၼ်ပၢင်တိုၵ်းၵၼ်ၼၼ်ႉ မၼ်းၼၢင်းပဵၼ်ၸဝ်ႈႁၢၼ်ႉၶၢႆမွၵ်ႇ လႄႈ ပဵၼ်ၵူၼ်းၵေႃႉလႄႇႁႃႁၢင်ႈၶိူင်ႈမွၵ်ႇပၼ်ပိူၼ်ႈၸွမ်းပွႆးၸွမ်းလၢမ်း ၼႂ်းမိူင်းယူႊၶရဵၼ်ႊ။ ယၢမ်းလဵဝ်တႄႉ မၼ်းၼၢင်း လႅၵ်ႈလၢႆႈၵၢၼ်ပဵၼ်ၵူၼ်းၵေႃႉၶူင်သၢင်ႈႁဵတ်းဢွၵ်ႇ ၶိူင်ႈၻရူၼ်ႊ ဢၼ်ယိုဝ်းတိုၵ်း မိူင်းရတ်ႉသျႃႊၼႆႉယူႇ ဝႃႈၼႆ။

Kseniia Kalmus တွပ်ႇလၢတ်ႈဝႆႉတီႈ သိုဝ်ႇၶၢဝ်ႇဝႃႈ “ၵၢၼ်ၶူင်သၢင်ႈႁဵတ်းဢွၵ်ႇၶိူင်ႈၻရူၼ်ႊၼႆႉ ပဵၼ်ၶေႃႈတႅပ်းတတ်းၶႃႈ ဢၼ်မီးလွင်ႈၸႅင်ႈလႅင်းလႄႈ ပုတ်းၶၢတ်ႇ။ ၵွပ်ႈဝႃႈ ၶႂ်ႈၸွႆႈထႅမ် ၸိုင်ႈမိူင်း လႄႈ ၵူၼ်းမိူင်း တင်း တပ်ႉသိုၵ်းမိူင်းၶႃႈႁဝ်းၶိုၼ်း” ၼႆယဝ်ႉ။

ၶိူင်ႈၻရူၼ်ႊဢၼ်မၼ်းၼၢင်းႁဵတ်းဢွၵ်ႇမႃးၼႆႉ ပဵၼ်ၾၢင်ႁၢင်ႈ (X) မီးၽတ်ႉလူမ်းပဵၼ်ပိၵ်ႇမၼ်းဝႆႉ 4 ၸဵင်ႇ။ တင်း 4 ၸဵင်ႇၼႆႉ မီးဝႆႉပႃး ရူဝ်ႊတႃႊပလိတ်ႊၸွမ်းၼိုင်ႈဢၼ်။ ၶိူင်ႈ ၻရူၼ်ႊသႅၼ်းၼႆႉ မိူဝ်ႈတႄႇမၼ်း ၵမ်ႈၼမ်ဢဝ်ၸႂ်ႉတိုဝ်းတႃႇထႆႇႁၢင်ႈ ၸွမ်းပၢင်ပွႆးသေ ယၢမ်းလဵဝ်တႄႉ သင်ဢဝ်မၢၵ်ႇဢွၼ်ႇႁွႆႈၸပ်းၸွမ်းၶိူင်ႈ ၼိုင်ႈလုၵ်ႈၵူၺ်းၵေႃႈ ပဵၼ်ၶိူင်ႈၻရူၼ်ႊ ဢၼ်ၸႂ်ႉတိုဝ်းၼႂ်းပၢင်တိုၵ်းယဝ်ႉ။

ၶိူင်ႈၻရူၼ်ႊၼႆႉ ယၢမ်းလဵဝ်ပဵၼ်ၶိူင်ႈၸၢၵ်ႈဢၼ်လမ်ႇလွင်ႈသႅၼ်းၼိုင်ႈၼႂ်းလုမ်ႈၾႃႉ ၸႂ်ႉတိုဝ်းယိုဝ်းသိုၵ်း ၼႂ်းပၢင်တိုၵ်းလႆႈၵူၺ်းဢမ်ႇၵႃး ၸႂ်ႉတိုဝ်းလႆႈၼႂ်းၵၢၼ်တေႃႉသူင်ႇၶူဝ်းၶွင်၊ ၵၢၼ်ၸွပ်ႇၶေႃႈမုၼ်းၶၢဝ်ႇသၢၼ် ၸဵမ်ၸိူဝ်းၼႆႉပႃးထႅင်ႈ ၼႆယဝ်ႉ။

လႆႈႁူႉဝႃႈ ယၢမ်းလဵဝ် ၼၢင်းယိင်းၵေႃႉယၢမ်ႈႁဵတ်းၵၢၼ်ႁၢင်ႈၶိူင်ႈမွၵ်ႇၼႆႉ ၶတ်းၸႂ်ၶူင်သၢင်ႈႁဵတ်းဢွၵ်ႇ ၶိူင်ႈၻရူၼ်ႊ ဢၼ်တေၸႂ်ႉတိုဝ်းလႆႈ ၼႃႈသိုၵ်းၵမ်းသိုဝ်ႈၼၼ်ႉထႅင်ႈယူႇလၢႆသႅၼ်း လႆႈႁူႉၼင်ႇၼႆ။

မိူဝ်ႈႁူဝ်ပီ 2014 မိူင်းရတ်ႉသျႃႊ တင်း ယူႊၶရဵၼ်ႊၼႆႉမီးလွင်ႈၶဵင်ႈၶႅင်ၵၼ်မႃးႁၢဝ်ႈႁႅင်းယဝ်ႉၵမ်းၼိုင်ႈ ။ ထိုင်မႃးၼႂ်းပီ 2022 လိူၼ်ၾႅပ်ႉပိဝ်ႊရီႊ ဝၼ်းတီႈ 24 မိူင်းရတ်ႉသျႃႊၸႂ်ႉၶိူင်ႈ ၵွင်ႈလူင်သေ တႄႇယိုဝ်းတိုၵ်းသႂ်ႇ မိူင်းယူႊၶရဵၼ်ႊႁၢဝ်ႈႁႅင်း။ ပၢင်တိုၵ်းႁိုင်မႃးၶၢဝ်းတၢင်း 3 ပီပၢႆယဝ်ႉ။