ႁွင်ႈၵၢၼ်ၾၢႆႇၾႆးၾႃႉ ၸႄႈဝဵင်းယွင်ႁူၺ်ႈ လၢတ်ႈတီႈၵူၼ်းမိူင်းၼႂ်းၼွင်ႁၢႆးယႃႈဝႃႈ -တႃႇပူၵ်းသဝ်ၾႆး တႃႇၸႅၵ်ႇၾႆးၾႃႉပၼ်ၵူၼ်းမိူင်းၼႂ်းၼွင်ႁၢႆးယႃႈၶိုၼ်းၼၼ်ႉ ႁႂ်ႈၵူၼ်းမိူင်းသႂ်ႇငိုၼ်း မႃး ဝႃႈၼႆ။
ဝၢႆးလင်ၼမ့်ထူမ်ႈႁၢဝ်ႈႁႅင်းထုင်ႉၼွင်ႁၢႆးယႃႈယဝ်ႉ ႁိူၼ်းယေးၵူၼ်းမိူင်းၵူၺ်းဢမ်ႇၵႃး ၸိူဝ်းပဵၼ်ႁူင်းႁဵၼ်း ႁူင်းယႃလႄႈ သဝ်လၵ်းၾႆးၾႃႉၸိူဝ်းၼႆႉၵေႃႈလူမ်ႉၵွႆ ။ ၵွပ်ႈၼႆၵူၼ်းမိူင်း ၼွင်ႁၢႆးယႃႈ ဢမ်ႇလႆႈၸႂ်ႉၾႆးၾႃႉမီးလိူၼ်ပၢႆယဝ်ႉ ။ ယၢမ်းလဵဝ် ႁွင်ႈၵၢၼ်ၾႆးၾႃႉ EPC မႃးမႄးၾႆးပၼ်ဝႆ့ယူႇ။ ၵူၺ်းၵႃႈလၢတ်ႈၵူၼ်းဝၢၼ်ႈဝႃႈ ၽႂ်ၶႂ်ႈၸႂ်ႉၾႆးၾႃႉၶိုၼ်း တေလႆႈပၼ်ငိုၼ်း 2 မိုၼ်ႇပျႃးဝႃႈၼႆ။
ၼၢင်းယိင်းၵူၼ်းမိူင်းၼွင်ႁၢႆးယႃႈ လၢတ်ႈၽူႈတွႆႇႁွၵ်ႈဝႃႈ-“ တီႈဝၢၼ်ႈ တႃႈတေႈ ( သာတေ) ႁိူၼ်းၼိုင်ႈလင်ၼႆ့ပေႃးဢမ်ႇပၼ်ငိုၼ်း 2 မိုၼ်ႇပျႃး ဢမ်ႇပၼ်ၾႆးၾႃႉၶိုၼ်းၼႆဝႃႇ ၊ မေႃႈမီႊတိူဝ်ႊၾႆးၾႃ့ ( meter box ) ၵေႃႈဢမ်ႇၵွႆ ၊ လႅၵ်ႈပၼ်ဢၼ်မႂ်ႇၵေႃႈဢမ်ႇၸႂ်ႈ ၵူၺ်းပေႃးဢမ်ႇပၼ်ငိုၼ်းဢမ်ႇပၼ်ၾႆးၼႆဝႃႇ ၊ တၢင်ႇဝၢၼ်ႈတႄ့ လႆႈယိၼ်းဝႃႈတေလႆႈပၼ်ငိုၼ်းၼမ်သေၼႆ့လူးၵွၼ်ႇၼႆဢေႃႈ ” – ဝႃႈၼႆ ။
ယၢမ်းလဵဝ်တီႈၼႂ်းၼွင်ႁၢႆးယႃႈဝၢႆးလင်ၼမ်ႉၼွင်းထူမ်ႈယဝ်ႉၼႆႉ ၾႆးၾႃႉဢမ်ႇလႆႈၼႆႉမီး 171 ဝၢၼ်ႈ ။ ဝၢၼ်ႈၸိူဝ်းမီးၼိူဝ်ၵုင်း ၸွမ်းၶႅပ်ႇၼွင် ၾင်ႇၼွင်မွၵ်ႈ 3 ပုၼ်ႈ 1 ပုၼ်ႈၼႆႉတႄႉ ၸႂ်ႉၾႆးၾႃႉလႆႈယူႇၼႆသေတႃႉ ၾႆးၾႃႉဢမ်ႇမႃးလႄႈ ဢမ်ႇၸၢင်ႈၸႂ်ႉၼင်ႇၵဝ်ႇ။ ယၢပ်ႇၽိုတ်ႇတႃႇယူႇသဝ်းၵိၼ်သၢင်ႈ တႃႇႁဵတ်းၵၢၼ်ႁဵတ်းငၢၼ်း။
ၼၢင်းယိင်းဢၼ်လႆႈပၢႆႈၽေးၼမ့်ထူမ်ႈသေ ၵႂႃႇယူႇဝႆ့တီႈၵျွင်းမုၼ်ၸဝ်ႈ ပႆႇၸၢင်ႈပွၵ်ႈၶိုၼ်းႁိူၼ်းၼၼ်ႉ လၢတ်ႈၽူႈတွႆႇႁွၵ်ႈဝႃႈ -“ၾႆးၵေႃႈဢမ်ႇမႃး 1 လိူၼ်ပၢႆယဝ့် ၊ တႃႇႁုင်ၵိၼ်ႁုင်ယမ့်ၵေႃႈ လႆႈၵႂႃႇႁႃၽိုၼ်းႁႅင်ႈ ၸွမ်းႁိမ်းႁွမ်း ၊ပေႃးဢမ်ႇလႆႈၽိုၼ်းႁႅင်ႈၵေႃႈ ဢဝ်ၽိုၼ်းယမ်းမႃးတၢၵ်ႇႁႅင်ႈသေၸႂ်ႉၵႂႃႇ။ ၸိူဝ်းမီးငိုၼ်းၵမ်ႈၽွင်ႈ သိုဝ်ႉၶႅပ်းသူဝ်ႇလႃႇသေမႃးၸႂ်ႉ ”- ဝႃႈၼႆ ။
ၸူဝ်ႈဝူင်ႈဝၢင်ႈၼႆ့ ၶၼ်မၢၵ်ႇၶိူဝ်သူမ်ႈ ပုင်ႈၶိုၼ်ႈသုင်ထိုင် 6000ပျႃး တေႃႇထိုင် 8000 ပျႃးသေတႃ့ ၸဝ်ႈသူၼ်မၢၵ်ႇၶိူဝ်သူမ်ႈ ဢမ်ႇမီးဢၼ်ၶၢႆ ယွၼ့်ၼမ့်ထူမ်ႈၼမ့်ၼွင်း သူၼ်မၢၵ်ႇၶိူဝ်သူမ်ႈလူ့ သုမ်းမူတ်း ။
ယၢမ်းလဵဝ် တီႈၼႂ်းၼွင်ႁၢႆးယႃႈၼႆႉ ယွၼ်ႉဢမ်ႇမီးၵၢၼ်ငၢၼ်း တႃႇႁဵတ်း ဢမ်ႇမီးငိုၼ်းၶဝ်ႈ။ ၼႃးၵေႃႈ ၺႃးၼမ်ႉထူမ်ႈလူႉသုမ်းၼမ် တႃႇတေၽုၵ်ႇသွမ်ႈၶိုၼ်းသမ့် ၸိူဝ့်ၽၼ်းၵေႃႈၵႃႈယႂ်ႇလႄႈ ၵူၼ်းပိုၼ့်တီႈ ပဵၼ်ဢၼ်ၵိၼ်းၸႂ်ဝႆ့ဝႃႈၼႆ ။
တႅမ်ႈ -ယိင်းသဵဝ်ႈၶၢဝ် ( ၽူႈသိုဝ်ႇၶၢဝ်ႇၾိုၵ်းၵၢၼ် )
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ