မိူဝ်ႈၼႆႉ ဝၼ်းတီႈ 25/10/2024 ၵူၼ်းမိူင်း ဢွၼ်ၵၼ်တိုၼ်ႇသၢၼ်ႈ ႁိမ်ၵၼ်သိုဝ်ႉၼမ်ႉမၼ်းၸိူဝ်ႉၾႆး (ၼမ်ႉမၼ်း ၸၢၵ်ႈ) တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ မၢင်ပၢမ်ႉၼမ်ႉမၼ်း လႆႈၸႅၵ်ႇၶၢႆပၼ် ယွၼ်ႉငဝ်းလၢႆးတၢင်းၾင်ႇမိူင်းၶႄႇ ၵူတ်ႇထတ်းရူတ်ႉၵႃးၶဝ်ႈဢွၵ်ႇ ႁၢဝ်ႈႁႅင်း။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ တီႈဝဵင်းမူႇၸေႊ ပၢမ်ႉၼမ်ႉမၼ်း မၢင်တီႈ ပေႃးပဵၼ်ရူတ်ႉၶိူင်ႈ ၶဝ်သႂ်ႇပၼ်တဵမ်တဵမ်။ ပေႃးပဵၼ်လႅင်းၵႃးသမ်ႉ သႂ်ႇပၼ် 100,000 ပျႃး။ မၢင်သႅင်ႇသႂ်ႇပၼ် 50,000 ပျႃး။ ၵူၺ်းၵႃႈ သိုဝ်ႉသႂ်ႇပုင်းသေ ၵဵပ်းဝႆႉတႄႉ ဢမ်ႇလႆႈၶႃႈ။ ပေႃးတူၺ်းငဝ်းလၢႆး ၸိူင်ႉၼႆတႄႉ ဝၼ်းသွင်ဝၼ်းၼႆႉ တီႈဝဵင်းမူႇၸေႊၼႆႉ ၼမ်ႉမၼ်းတေၶၢတ်ႇယဝ်ႉႁိုဝ် ဢမ်ႇႁူႉ။ ရူတ်ႉၵႃး၊ ရူတ်ႉၶိူင်ႈ ဢၼ်ပႂ်ႉသႂ်ႇၼမ်ႉမၼ်းၼႆႉ ပေႃးၶပ်ႉပဵၼ်တႅဝ်းဝႆႉၶႃႈ”- ဝႃႈၼႆ။

ယၢမ်းလဵဝ် တီႈဝဵင်းမူႇၸေႊၼႆႉ ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) သႅၼ်း 95 ၼိုင်ႈလိတ်ႊလႂ် 5,300 ပျႃး ထိုင် 5,400 ပျႃး ၼႆယဝ်ႉ။

“ယၢမ်းလဵဝ် တီႈၶူဝ်လူင် ၼႂ်းၵႄႈမိူင်းမၢဝ်း – ၸေႊၵဝ်ႇၼၼ်ႉ ပလိၵ်ႈၶႄႇၶဝ် ၵူတ်ႇထတ်းႁၢဝ်ႈႁႅင်း ပေႃး လုၵ်ႉတၢင်းမိူင်းမၢဝ်း ဢွၵ်ႇမႃးတၢင်းၸေႊၵဝ်ႇၼႆႉဢေႃႈ။ ဢၼ်ၶဝ်ၵူတ်ႇထတ်းႁႅင်းၼႆႉ ပဵၼ်ၶိူင်ႈၾႆးၾႃႉ၊ ၶူဝ်းၶွင်ဢၼ်ၶဝ်ႁၢမ်ႈ ၸိူဝ်းၼႆႉ။ ပေႃးပဵၼ်ၵူၼ်းမိူင်းမၢၼ်ႈ တေႃႉဢွၵ်ႇမႃးၸိုင် သင်ၶဝ်တီႉလႆႈ ၶဝ်တေပၼ်တၢမ်ႇႁၢမ်ႈၶဝ်ႈမိူင်းၶဝ် 4 ပီ။ သင်ဝႃႈ ႁၢႆႉႁႅင်းၸိုင် တေပၼ်ထိုင်တၢမ်ႇၶွၵ်ႈ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

လိူဝ်ၼၼ်ႉ သင်ဝႃႈ တၢင်းၾင်ႇမိူင်းၶႄႇ ၵူတ်ႇထတ်းၺႃးယဵဝ်ႈ သူႇသမ်းယႃႈမဝ်းၵၼ်ၸိုင် ၼၼ်ႉၵေႃႈ တေဢမ်ႇ ပၼ်ၶဝ်ႈတၢင်းမိူင်းၶႄႇ တႃႇၶၢဝ်းတၢင်း 4 ပီ ဝႃႈၼႆ။  

ယၢမ်းလဵဝ် ၽၵ်းတူမိူင်းလႅၼ်လိၼ်တႆး – ၶႄႇ မိူၼ်ၼင်ႇ တီႈၽၵ်းတူၸၢင်ႉၽိူၵ်ႇလႄႈ ၽၵ်းတူႁေႃၶမ်း လူင် ၸိူဝ်းၼႆႉ ယူႇတီႈ ပလိၵ်ႈၶႄႇ ပႂ်ႉၵူတ်ႇထတ်းႁၢဝ်ႈႁႅင်း တင်ႈတႄႇ ဝၼ်းတီႈ 22 ၼႆႉမႃး ယွၼ်ႉၶဝ်ၵူတ်ႇထတ်းႁၼ် ၵူၼ်းမိူင်းမၢၼ်ႈ တေႃႉၶူဝ်းၵုၼ်ႇ ဢွၵ်ႇမႃး မိူၼ်ၼင်ႇ သိူဝ်ႈၸီႇၵႃႇ (သိူဝ်ႈႁႄႉမၢၵ်ႇၵွင်ႈ)၊ ၶွမ်ႊပိဝ်ႊတိူဝ်ႊ၊ ၶိူင်ႈၾႆးၾႃႉ ၸိူဝ်းၼႆႉ တင်းၼမ်လႄႈ ယွၼ်ႉၼၼ်ႉ ၶဝ်ၵူဝ်ဢဝ်ၵႂႃႇၸွႆႈ ၸုမ်းၵျႃးၽႅၼ်ႉ ဢမ်ႇၼၼ် ၸုမ်းယိပ်းၵွင်ႈၵၢင်ႇ ၸိူဝ်းၼၼ်ႉလႄႈ ၸင်ႇၵူတ်ႇထတ်းႁႅင်း – ၵူၼ်းမူႇၸေႊ လၢတ်ႈၼႄၼင်ႇၼႆ။