တႄႇဢဝ်လိူၼ်ၵျူႊလၢႆႊတေႃႇထိုင် လိူၼ်သႅပ်ႊထႅမ်ႊပိူဝ်ႊပီ 2024 ၼႂ်းၶၢဝ်းတၢင်းသၢမ်လိူၼ်မႃးၼႆႉ ယွၼ်ႉပၢင်တိုၵ်းသေ ၵူၼ်းမိူင်းႁူမ်ႈတုမ် ပတ်းပိုၼ်ႉ လူႉတၢႆ 1,044 ၵေႃႉ ဝႃႈၼႆ။
ဝၼ်းတီႈ 22/10/2024 ပူၼ်ႉမႃးၼႆႉ ယူႇတီႈ ၺၢၼ်ႇလိၼ်းတိတ်ႉ ၸုမ်းၶူၼ်ႉၶႂႃႉလွတ်ႈလႅဝ်း ပိုၼ်ၽၢဝ်ႇ ဢွၵ်ႇမႃးဝႃႈ ၵူၼ်းမိူင်းႁူမ်ႈတုမ် ပတ်းပိုၼ်ႉ ဢၼ်ၺႃးၸၢၵ်ႇမၢၵ်ႇ လူႉတၢႆမၢတ်ႇၸဵပ်း ၼႂ်းၵႄႈပၢင်တိုၵ်း မီး 1,383 ၵေႃႉ ဝႃႈၼႆ။
ၵူၼ်းမိူင်းၸိူဝ်းလူႉတၢႆၼႆႉ မၢင်ၸိူဝ်းၺႃးဢဝ်ပဵၼ်ပဝ်ႉမၢႆသေ ပိုတ်းယိုဝ်း၊ မၢင်ၸိူဝ်း လူႉတၢႆ ၼႂ်းၵႄႈပၢင်တိုၵ်း။ ၼႂ်းမိူင်းတႆး မီးၵူၼ်းလူႉတၢႆၼမ်သုတ်း 360 ၵေႃႉ၊ တိူင်းတႃႈလိူဝ်ႇ (မၢၼ်းတလေး) 200 ပၢႆ ၊ တိူင်းၸႄႈၵႅင်း 180 ပၢႆ ၊ တိူင်းမ ၵူၺ်း 30 ပၢႆ ။ ၵူၼ်းမိူင်း လႆႈမၢတ်ႇၸဵပ်းလူႉတၢႆ ယွၼ်ႉၸုမ်းလႂ်ဢၼ်ဝႃႈၼၼ်ႉတႄႉ ဢမ်ႇႁၼ်ပိုၼ်ၽၢဝ်ႇဝႆႉပႃး။
ၼႂ်းၶၢဝ်းတၢင်း 3 လိူၼ်ၼႆႉ ယွၼ်ႉၽႅၼ်ၵၢၼ်တိုၵ်းလႄႈ ပၢင်တိုၵ်း မီး 2,126 ၵမ်း။ ၾၢႆႇၸုမ်းလုၵ်ႉၽိုၼ်ႉၶဝ် တိုၵ်းတေႃးသိုၵ်းမၢၼ်ႈ 2,006 ၵမ်း ၼႆယဝ်ႉ။
ၼႂ်းၶၢဝ်းတၢင်းပၢင်တိုၵ်း ၸိူဝ်းၼႆႉ ၾၢႆႇၸုမ်းလုၵ်ႉၽိုၼ်ႉ ယိုတ်းၵုမ်းလႆႈ 12 ဝဵင်း ဢၼ်မီးၼႂ်းမိူင်းၶၢင်၊ မိူင်းတႆးပွတ်းႁွင်ႇ၊ တိူင်းတႃႈလိူဝ်ႇလႄႈ မိူင်းရၶႅင်ႇ ၸိူဝ်းၼႆႉ။ ၼႂ်းၼၼ်ႉ ၶဝ်ႈပႃးဝႆႉ ဝဵင်းလႃႈသဵဝ်ႈ၊ ၵျွၵ်ႉမႄး၊ ၼွင်ၶဵဝ်၊ မိူင်းမိတ်ႈ၊ မိူင်းၵုတ်ႈ၊ ဝဵင်းၽိတ်ႉၶျၢင်း(သပိတ်ကျင်း)၊ ၸၢင်ႉၵိုဝ် (စဉ့်ကူး)၊ တႃႈၵွင် (တကောင်း)၊ မိူင်းမွၵ်ႇ (မိုးမောက်)၊ ၶျီႇၽူၺ်ႇ ၊ တၢၼ်ႇတွႆးလႄႈ ဝဵင်းၸဵင်ႇတလီႇ ၸိူဝ်းၼႆႉ။
ၼႂ်းမိူင်းတႆးပွတ်းႁွင်ႇ၊ တိူင်းတႃႈလိူဝ်ႇ၊ တိူင်းၸႄႈၵႅင်းလႄႈ တိူင်းမၵူၺ်း ၸိူဝ်းၼႆႉ ပဵၼ်ပိုၼ်ႉတီႈ ပၢင်တိုၵ်း ၼမ်လိူဝ်ပိူၼ်ႈ။ ဝၢႆးလင် သိုၵ်းၵဝ်ႈၵၢင်ႉ MNDAA ယိုတ်းလႆႈ ငဝ်ႈငုၼ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ(ယမၶ) ဝဵင်းလႃႈသဵဝ်ႈ ၼႂ်းၽႅၼ်ၵၢၼ်ယၼ်ႇသိုၵ်း 1027 တွၼ်ႈ 2 ၼၼ်ႉယဝ်ႉ ပၢင်တိုၵ်းသိုပ်ႇပဵၼ် ၶိုၼ်ႈမႃးႁၢဝ်ႈႁႅင်းၼႆ ၸုမ်းၺၢၼ်ႇလိၼ်းတိတ်ႉ လၢတ်ႈၼင်ႇၼႆ။
ဢၢင်ႈဢိင် – RFA
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ