ယၢမ်းလဵဝ် ၵူၼ်းဝဵင်းပၢင်လွင်း ၼပ်ႉႁူဝ်ပၢၵ်ႇ တိုၵ်ႉၶမ်ဝႆႉၼႂ်းၵႄႈပၢင်တိုၵ်း သိုၵ်းမၢၼ်ႈတင်း သိုၵ်းယၢင်းလႅင် ယွၼ်ႉ ဢမ်ႇၸၢင်ႈဢွၵ်ႇဝၢၼ်ႈ ႁႃသိုဝ်ႉၶဝ်ႈၼမ်ႉတၢင်းၵိၼ် ဝႃႈၼႆ။

ဝၼ်းတီႈ 20/10/2024 ယၢမ်းဝၢႆးဝၼ်းမွၵ်ႈ 1 မူင်း သိုၵ်းမၢၼ်ႈ ယိုတ်းမိူင်း ႁူမ်ႈပျီႇတူႉၸိတ်ႉပဢူဝ်း PNO ပဵၼ်ပၢင်တိုၵ်းၵၼ်တင်း တပ်ႉသိုၵ်းၽွမ်ႉႁူမ်ႈလုၵ်ႉၽိုၼ်ႉ ယၢင်းလႅင်သေ ၾၢႆႇသိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ တၢင်းဝၢၼ်ႈသေႃလမ် (ဆောင်လန်ကျေးရွာ) ၼႂ်းၵႄႈပၢင်လွင်း – ၾၢႆၶုၼ် ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း။

ၵူၼ်းပိုၼ်ႉတီႈ ဝဵင်းပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ – “ဢွၵ်ႇဝၢၼ်ႈၵေႃႈ ဢမ်ႇလႆႈ ၶွင်ၵိၼ်ယႅမ်ႉၵေႃႈ ၶၢတ်ႇ လႆႈမႆႈၸႂ်ဢေႃႈ။ ဢၼ်ဢမ်ႇပၼ်ဢွၵ်ႇဝၢၼ်ႈၼႆႉ သိုၵ်းႁၢမ်ႈဝႆႉဢေႃႈ။ မၢၵ်ႇလူင်ၶဝ် ယိုဝ်းမႃးတူၵ်း သႂ်ႇႁိူၼ်းယေး လူႉၵွႆၾႆးမႆႈၼႆႉ မီး 2-3 လင်ဢေႃႈ”- ဝႃႈၼႆ။

တင်ႈတႄႇ ပၢင်တိုၵ်းပဵၼ်ႁၢဝ်ႈႁႅင်းမႃးၼႆႉ ၵူၼ်းဝၢၼ်ႈ ၵမ်ႈၽွင်ႈ တၼ်းပၢႆႈပူၼ်ႉၵေႃႈမီး၊ ၵမ်ႈၽွင်ႈ ဢမ်ႇတၼ်းပၢႆႈပူၼ်ႉ။ ၸိူဝ်းတၼ်းပူၼ်ႉတႄႉ ဢွၼ်ၵၼ်ပၢႆႈၵႂႃႇၾၢႆႇတူၵ်းၼမ်ႉတမ်ၽၢၵ်ႇ ၵႂႃႇသွၼ်ႈယူႇဝႆႉ ၸွမ်းဝတ်ႉမုၼ်ၸဝ်ႈ။

“ၵူၼ်းဝၢၼ်ႈတႄႉ ပၢႆႈမႃးသွၼ်ႈဝႆႉတီႈၸလွပ်ႈ ဝတ်ႉမုၼ်ၸဝ်ႈ။ ၵမ်ႈၽွင်ႈ ပၢႆႈၵႂႃႇတၢင်းဝတ်ႉၼမ်ႉသူမ်ႈ ၽႄၵၼ်ယူႇ ၸိူင်ႉၼႆဢေႃႈ။ မၢင်ၸိူဝ်း ၼႅတ်ႈပၢႆႈမႃး ဢမ်ႇတၼ်းလႆႈ ၶူဝ်းၼုင်ႈၶူဝ်းၼွၼ်းသင်။ တႃႇတေၵိၼ်ယႅမ်ႉၵေႃႈ ယၢပ်ႇၽိုတ်ႇဢေႃႈ”- ၵူၼ်းပိုၼ်ႉတီႈ ဝဵင်းပၢင်လွင်း သိုပ်ႇလၢတ်ႈၼႄၼင်ႇၼႆ။

ပၢင်တိုၵ်း သိုၵ်းမၢၼ်ႈ ႁူမ်ႈပျီႇတူႉၸိတ်ႉပဢူဝ်း တင်း တပ်ႉသိုၵ်းၽွမ်ႉႁူမ်ႈလုၵ်ႉၽိုၼ်ႉယၢင်းလႅင် ပွၵ်ႈၼႆႉ တႄႇပဵၼ်မႃးႁၢဝ်ႈႁႅင်း ၼႂ်းၵၢင်လိူၼ်ဢွၵ်ႊထူဝ်ႊပိူဝ်ႊၼႆႉ။ ယၢမ်းလဵဝ် သိုၵ်ႈမၢၼ်ႈၵႆႉ ဢဝ်ၶိူင်ႈမိၼ် မႃး ပၼ်ႇလဵပ်ႈၸွမ်းဝၢၼ်ႈသေ ပွႆႇမၢၵ်ႇတူၵ်းသႂ်ႇၵူႈဝၼ်း။ ယွၼ်ႉၼၼ် ၵူၼ်းဝၢၼ်ႈၸိူဝ်းၵိုတ်းဝႆႉ ၼႂ်းဝၢၼ်ႈတႄႉ ဢွၼ်ၵၼ်မႆႈၸႂ် ၵူဝ်တိူဝ်ႉၺႃး ၸၢၵ်ႇမၢၵ်ႇ မၢတ်ႇၸဵပ်းလူႉတၢႆ ၼႆယဝ်ႉ။