သိုၵ်းမၢၼ်ႈ ယိုတ်းမိူင်း တင်ႈၸႂ် ဢဝ်ၶိူင်ႈမိၼ်တိုၵ်း မႃးပွႆႇမၢၵ်ႇတီႈဝဵင်းလႃႈသဵဝ်ႈ ၼႂ်းဝၼ်းလဵဝ် ဢမ်ႇယွမ်း 3 ၵမ်း ၸၢၵ်ႇမၢၵ်ႇတိူဝ်ႉၺႃး ႁူင်းႁုင်လဝ်ႈ၊ ႁူင်းပလိၵ်ႈလႄႈ ႁိူၼ်းယေးၵူၼ်းမိူင်း ၸိူဝ်းၼႆႉလူႉၵွႆ။
ဝၼ်းတီႈ 23/10/2024 ယၢမ်းၵၢင်ၼႂ် 8:35 မူင်း ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ တီႈႁူင်းႁုင်လဝ်ႈ ၸၢဝ်းၶႄႇ ႁိမ်းၶူဝ်သၢမ်တၢၼ်ႇ ၼႂ်းဝၢၼ်ႈၼမ်ႉၶႆႉ ဢိူင်ႇမႄႈႁၢၼ်ႇ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ ၶဝ်မႃးပွႆႇ 3 ပွၵ်ႈ။ ၵၢင်ၼႂ် 8:35 မူင်း မႃးပွႆႇတီႈ ႁူင်းႁုင်လဝ်ႈ (ရိုးရာအရက်ဆိုင်) တီႈၼိုင်ႈ ၼၼ်ႉတႄႉ ဢမ်ႇတိူဝ်ႉၺႃးၵူၼ်းမၢတ်ႇၸဵပ်းလူႉတၢႆသင်။ ယွၼ်ႉၵူၼ်းပိုၼ်ႉတီႈ ဢွၼ်ၵၼ်ပၢႆႈဝႆႉမူတ်းယဝ်ႉ။ ယၢမ်းၵၢင်ၼႂ် 10 မူင်းပၢႆ မႃးတူၵ်းတီႈသူၼ်ၼဵင်ႈ ၼႂ်းၵႄႈဝၢၼ်ႈၼႃးၾႃႉ – ဝၢၼ်ႈ ၼႃး ၾၢႆႇဢွၵ်ႇလႃႈသဵဝ်ႈ တၢင်းၵႂႃႇမိူင်းယေႃ ၼၼ်ႉၵေႃႈ ဢမ်ႇတိူဝ်ႉၺႃး ၵူၼ်းမိူင်း၊ ႁိူၼ်းယေးသင်ၶႃႈ”- ဝႃႈၼႆ။
သိုပ်ႇလၢတ်ႈဝႃႈ – “ထိုင်မႃး ဝၢႆးဝၼ်း 3 မူင်းပၢႆသမ်ႉ မႃးပွႆႇတီႈ ၼႂ်းဝၢင်းႁူင်းပလိၵ်ႈ မၢႆ 1 ။ ၼၼ်ႉတႄႉ တိူဝ်ႉၺႃးၵူၼ်းမၢတ်ႇၸဵပ်းၸွမ်းၼႆဢေႃႈ။ ၵူၺ်းၵႃႈ မၢတ်ႇၸဵပ်းလၢႆၵေႃႉတႄႉ ပႆႇလႆႈႁူႉၶႃႈ ယွၼ်ႉလႅင်းၾူၼ်း ဢမ်ႇလႆႈလႄႈ တီႈႁိမ်း ၼၼ်ႉသမ်ႉ မီးၵူၼ်းယူႇဝႆႉ။ တီႈၼၼ်ႈတႄႉ ၶႂ်ႈဝႃႈတိူဝ်ႉၼမ်ဝႆႉဢေႃႈ”- ဝႃႈၼႆ။
မိူဝ်ႈၼႆႉ ဝၼ်းတီႈ 24/10/2024 တႄႇဢဝ်ယၢမ်းၵၢင်ၼႂ် တေႃႇထိုင်ဝၢႆးဝၼ်း 1 မူင်း တီႈဝဵင်းလႃႈသဵဝ်ႈၼႆႉ ယဵၼ်သီႇဝႆႉ ပႆႇလႆႈငိၼ်းသဵင်ၶိူင်ႈမိၼ်သင် – ၵူၼ်းပိုၼ်ႉတီႈလၢတ်ႈ။
“ႁဵတ်းသင်လႄႈ သိုၵ်းမၢၼ်ႈ မႃးပွႆႇမၢၵ်ႇ တီႈလႃႈသဵဝ်ႈၼႆႉ ယူႇတိၵ်းတိၵ်းၸိုင် ၶဝ်ႁဵတ်းႁႂ်ႈၵူၼ်းမိူင်း ဢမ်ႇ ႁတ်းပွၵ်ႈမိူဝ်းယူႇ။ လၢႆးႁဵတ်းမိူၵ်ႈမႂ်ႈ ၶွင်သိုၵ်းမၢၼ်ႈ ယၢမ်းလဵဝ်ၼႆႉ ၶဝ်ဢဝ်ၶိူင်ႈမိၼ်မႃးပၼ်ႇၼိူဝ်ဝဵင်း ဢွၼ်တၢင်းသေ ႁဵတ်းႁႂ်ႈ ၵူၼ်းမိူင်းတူၵ်းၸႂ် ၵူဝ်ႁႄႈ ဢမ်ႇႁတ်းယူႇ၊ ယႃႇႁႂ်ႈၶွၼ်ႈတုမ်ၵၼ်၊ ယႃႇႁႂ်ႈမႃးပိုတ်ႇ သႅင်ႇ မႃးႁဵတ်းႁႃၵိၼ်ၵၢၼ်သင် ယႃႇ ႁႂ်ႈသိုၵ်းၵဝ်ႈၵၢင်ႉ ဢမ်ႇၸၢင်ႈၵဵပ်းၶွၼ်ႇ ၸိူင်ႉၼၼ်ဢေႃႈ”- ၵူၼ်း ပိုၼ်ႉတီႈ ဝဵင်းလႃႈသဵဝ်ႈ ႁၼ်ထိုင်လၢတ်ႈဝႆႉၼင်ႇ ၼႆ။
တႄႇဢဝ် ဝၼ်းတီႈ 30/08/2024 ၼၼ်ႉမႃး သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝဵင်းလႃႈသဵဝ်ႈ ႁၢဝ်ႈႁႅင်း ႁၢၼ်ႉတေႃႇထိုင်ယၢမ်းလဵဝ် မီးၶၢဝ်းတၢင်းၸမ်သွင်လိူၼ်ယဝ်ႉ။ တီႈဝဵင်းလႃႈသဵဝ်ႈၼႆႉ သိုၵ်းၵဝ်ႈၵၢင်ႉ တႄႇၶဝ်ႈတိုၵ်းႁၢဝ်ႈႁႅင်းထႅင်ႈ လွပ်ႈသွင် ၼႂ်းပၢင်ယၼ်ႇသိုၵ်း 1027 ၼႆႉ မိူဝ်ႈဝၼ်းတီႈ 02/07/2024 ယၢမ်း ၵၢင်ၶိုၼ်း 11:45 မူင်းသေ ထိုင်မႃး ဝၼ်းတီႈ 03/10/2024 ၼႆႉ ၸင်ႇယိုတ်းၵုမ်းလႆႈ ဝဵင်းလႃႈသဵဝ်ႈမႃး – ၵူၼ်းပိုၼ်ႉတီႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ