ယၢမ်းလဵဝ် ၶၼ်ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) တီႈဝဵင်းႁူဝ်ပၢင်ႇ ပုင်ႈၶိုၼ်ႈႁႅင်း တႄႇဢဝ် 1 လိတ်ႊလႂ် 7 ယႂၼ်ႊ(ငိုၼ်းၶႄႇ) ပုင်ႈၶိုၼ်ႈပဵၼ် 11 ယႂၼ်ႊ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ။

ဝၼ်းတီႈ 23/10/2024 ယၢမ်းၵၢင်ၼႂ် ၵူၼ်းမိူင်း ဢွၼ်ၵၼ်ႁိမ်သိုဝ်ႉၼမ်ႉမၼ်းၸၢၵ်ႈ တီႈပၢမ်ႉၼမ်ႉမၼ်း မိူင်းပၢင်းတႆး (မိန်းပန်းရှမ်း) ဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ ယွၼ်ႉမီးၶၢဝ်ႇလိုဝ်းဝႃႈ တေမီးလွင်ႈပိၵ်ႉဢိုတ်းၽၵ်းတူလႅၼ်လိၼ်တႆး – ၶႄႇ ဝႃႈၼႆ။

ၵူၼ်းပိုၼ်ႉတီႈ ဝဵင်းႁူဝ်ပၢင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လႆႈငိၼ်းဝႃႈ ပိူၼ်ႈတေပိၵ်ႉဢိုတ်း သဵၼ်ႈတၢင်းၵႃႉၶၢႆ ၸွမ်းလႅၼ်လိၼ်တႆး – ၶႄႇ ၼႆလႄႈ ၵူၼ်းမိူင်းမႆႈၸႂ် ဢွၼ်ၵၼ် ၵႂႃႇႁိမ်သိုဝ်ႉၼမ်ႉမၼ်း ၸၢၵ်ႈၵၼ်ၶႃႈဢေႃႈ။ မိူဝ်ႈဝႃး ဝၼ်းလဵဝ်ၵူၺ်း ၶၼ်ၼမ်ႉမၼ်းၸၢၵ်ႈ ပုင်ႈၶိုၼ်ႈပဵၼ် 2 ၵမ်း။ မိူဝ်ႈၵၢင်ၼႂ်ၼၼ်ႉ 1 လိတ်ႊလႂ် 7 ယႂၼ်ႊ။ ယူႇ ၵမ်ႉၼိုင်ႈၵူၺ်းၶိုၼ်ႈ 8 ယႂၼ်ႊ ထိုင်မႃးထႅင်ႈၵမ်ႉၼိုင်ႈ ပုင်ႈၶိုၼ်ႈထိုင် 9.5 ယႂၼ်ႊဢေႃႈ။ မိူဝ်ႈၼႆႉ ယၢမ်းၵၢင်ၼႂ် ၶိုၼ်ႈထိုင် 11 ယႂၼ်ႊယဝ်ႉ”- ဝႃႈၼႆ။

ၼမ်ႉမၼ်းၸၢၵ်ႈ တီႈဝဵင်းႁူဝ်ပၢင်ႇၼႆႉ ၵမ်ႈၼမ် တေလုၵ်ႉတၢင်းမိူင်းၶႄႇ – မိူင်းမၢၼ်ႈ တေႃႉမႃးၶၢႆ တႄႇပၢင်ယၼ်ႇသိုၵ်း 1027 ၼၼ်ႉမႃးသေ ႁဵတ်းႁႂ်ႈသဵၼ်ႈတႃႈသၢႆတၢင်း ဢၼ်လုၵ်ႉတၢင်းမိူင်းမၢၼ်ႈ ၶိုၼ်ႈၸူး တၢင်းမိူင်းတႆးပွတ်းႁွင်ႇ ၼႆႉ လႆႈထုၵ်ႇပိၵ်ႉဢိုတ်းဝႆႉသေ ႁဵတ်းႁႂ်ႈၼမ်ႉမၼ်းၸၢၵ်ႈ ဢမ်ႇၸၢင်ႈမႃးထိုင်။ ယဝ်ႉၵေႃႈ ၽၵ်းတူလႅၼ်လိၼ်တႆး – ၶႄႇ တီႈဝဵင်းၼမ်ႉၽႃႈ – မိူင်းတိင် ၼၼ်ႉၵေႃႈ လႆႈပိၵ်ႉဢိုတ်းဝႆႉထႅင်ႈ မိူဝ်ႈၽွင်းၼၼ်ႉ ၼမ်ႉမၼ်းၸၢၵ်ႈ တီႈဝဵင်းၵုၼ်လူင် 1 တဝ်ႈ/ မူၵ်ႇလႂ် ပဵၼ်ၵႂႃႇ 35,000 ပျႃး ယွၼ်ႉၼမ်ႉ မၼ်းၸၢၵ်ႈၶၢတ်ႇ။

ယၢမ်းလဵဝ် ဢၼ်ၵူၼ်းမိူင်းႁူဝ်ပၢင်ႇ – ၵုၼ်လူင် ၸႂ်ႉယူႇၼႆႉ တေပဵၼ်ၼမ်ႉမၼ်းၸၢၵ်ႈ ဢၼ်လုၵ်ႉတၢင်း မိူင်းၶႄႇ တေႃႉသူင်ႇၶဝ်ႈမႃးၶၢႆ။ သၢႆသဵၼ်ႈတၢင်းၼႆႉသမ်ႉ တေလုၵ်ႉတၢင်းမိူင်းတိင် တေႃႉၶၢမ်ႈမႃးတၢင်း ဝဵင်းၼမ်ႉၽႃႈ (သျိၼ်းသူၺ်ႇႁေႃႇ) သူင်ႇၸူးတၢင်းၵုၼ်လူင် – ႁူဝ်ပၢင်ႇ – သႅၼ်ဝီ – လႃႈသဵဝ်ႈ ၸိူဝ်းၼႆႉ။ ယွၼ်ႉသၢႆၼႆႉ ပဵၼ်သိုၵ်းၵဝ်ႈၵၢင်ႉ MNDAA ယိုတ်းၵုမ်းဝႆႉ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 20/10/2024 ယၢမ်းၵၢင်ၼႂ်ၸဝ်ႉ 12:45 မူင်း (တဵင်ႈၶိုၼ်းၸၢႆႉ) ၼၼ်ႉ သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ် မႃးပွႆႇမၢၵ်ႇ တီႈဝၢၼ်ႈၼမ်ႉႁူး ဝဵင်းၵုၼ်လူင် ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ တိူဝ်ႉၺႃးႁိူၼ်း ၵူၼ်းဝၢၼ်ႈ လူႉၵွႆၼမ်။ သဵင်မၢၵ်ႇတႅၵ်ႇ လင်ယွၼ်ႈထိုင် ဝဵင်းႁူဝ်ပၢင်ႇလႄႈ ႁဵတ်းႁႂ်ႈၵူၼ်းဝဵင်းႁူဝ်ပၢင်ႇ ဢွၼ်ၵၼ်တိုၼ်ႇသၢၼ်ႈၸွမ်းမူတ်း ဝႃႈၼႆ။

မိူဝ်ႈဝၼ်းတီႈ 19 ယၢမ်းၵၢင်ၼႂ်ၸဝ်ႉ 1 မူင်းၶိုင်ႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ ၾၢႆႇဢွၵ်ႇဝဵင်းလၢဝ်ႇၵၢႆး လုၵ်ႈၼိုင်ႈ ပဵၼ်မၢၵ်ႇၼမ်ႉၼၵ်း 500 ပွင်ႇ တၢင်းၾၢႆႇတူၵ်းပွၵ်ႉတူင်ႊၶျိူင်ႊလႄႈ သူၼ်မွၵ်ႇ 311 ၼၼ်ႉ တိူဝ်ႉၺႃးႁိူၼ်းယေးၵူၼ်းမိူင်းလူႉၵွႆၼမ်။