သိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် ႁၢဝ်ႈႁႅင်း သိုၵ်းမၢၼ်ႈ ဢဝ် Drone မႃးပွႆႇမၢၵ်ႇ 2 ၵမ်း မၢၵ်ႇတူၵ်းလူင်း 18 လုၵ်ႈ တိူဝ်ႉႁူင်းႁဵၼ်းလႄႈ ဝတ်ႉဝႃးၽႃသိူဝ်ႇ တီႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။

ဝၼ်းတီႈ 22/10/2024 ယၢမ်းၵၢင်ဝၼ်း 12 မူင်း သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈႁူင်းႁဵၼ်းဝၢၼ်ႈၵမ်ႉၵေႃႇ ဝဵင်းၼွင်ၶဵဝ်။

ၵူၼ်းၸၢႆးပိုၼ်ႉတီႈ ဝဵင်းၼွင်ၶဵဝ် လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဝႃး ပၢင်တိုၵ်းပဵၼ်တင်းဝၢၼ်ႈၵမ်ႉၵေႃႇ၊ တီႈႁဝ်း ယူႇၼႆႉၵေႃႈ သဵင်ၶိူင်ႈမိၼ် သိုၵ်းမၢၼ်ႈ၊ သဵင်ၵွင်ႈလူင် ငိၼ်းၵူႈဝၼ်း၊ မၼ်းမေႃးတင်းဝၼ်းတင်းဝၼ်း၊ သိုၵ်းမၢၼ်ႈတင်း သိုၵ်းတဢၢင်း ပဵၼ်သိုၵ်းၵၼ် ႁၢဝ်ႈႁႅင်းၼႆႉ မီးမွၵ်ႈ 4 ဝၼ်းယဝ်ႉ၊ ၵူၼ်းဝၢၼ်ႈၵမ်ႉၵေႃႇ ၵေႃႈ ပၢႆႈမူတ်းယဝ်ႉ ၽႂ်ၵေႃႈဢမ်ႇႁတ်းမိူဝ်းၶိုၼ်းၼႂ်းဝၢၼ်ႈ လွင်ႈမၢတ်ႇၸဵပ်းလူႉတၢႆတႄႉ ဢမ်ႇငိၼ်းဝႃႈ မီး”- ဝႃႈၼႆ။ 

ၵူၼ်းၼႂ်းဝၢၼ်ႈ ၵမ်ႈၽွင်ႈ ပၢႆႈၵႂႃႇတၢင်းဝဵင်းပၢင်ႁူႈ (ပၢင်ႇဢူႈလူင်) ၊ မၢင်ၸိူဝ်း ပၢႆႈၵႂႃႇယူႇႁိမ်းႁွမ်းၶႅပ်ႇဝၢၼ်ႈ ပေႃးသဵင်ၵွင်ႈသဵင်မၢၵ်ႇယဵၼ်ၵေႃႈ ဢွၼ်ၵၼ်မိူဝ်းၸႂ်းႁိူၼ်းၽႂ်မၼ်းၶိုၼ်း ဝႃႈၼႆ။

မၼ်းၸၢႆး လၢတ်ႈထႅင်ႈဝႃႈ -“ၵမ်ႈၽွင်ႈၵေႃႈ မီးသူၼ်မီးၼႃး ဢမ်ႇၸၢင်ႈပၢႆႈၵႆ။ တေႃႈလဵဝ် ပဵၼ်ၶၢဝ်းပၢတ်ႇၶဝ်ႈလႄႈ မၢင်ၸိူဝ်းၵေႃႈ မိူဝ်းႁိူၼ်း မိူဝ်းပၢတ်ႇၶဝ်ႈ ပေႃးငိၼ်းသဵင်ၵွင်ႈ၊ သဵင်မၢၵ်ႇၵေႃႈ ဢွၼ်ၵၼ် ပၢႆႈမူၵ်း ၸွမ်းႁွင်ႈၸွမ်းၶူး ၸိူဝ်း ၼႆႉ”- ဝႃႈၼႆ။

ယၢမ်းလဵဝ် ၵူၼ်းဢၼ်ပၢႆႈၽေးသိုၵ်း တင်းဝၼ်ႈၶူၵ်ႉၼမ်ႉ ဢွၼ်ၵၼ်မိူဝ်းယူႇၶိုၼ်း တီႈဝၢၼ်ႈ 5 ပုၼ်ႈ 1 ပုၼ်ႈ။ ပေႃး ဢမ်ႇမိူဝ်းယူႇၶိုၼ်းၵေႃႈ ၵူဝ်ၸုမ်းယိပ်းၵွင်ႈၵၢင်ႇ မိူဝ်းယူႇၼႂ်းဝၢၼ်ႈၼႂ်းႁိူၼ်း ဝႃႈၼႆ။

ၵူၼ်းဝၢၼ်ႈ ဢုမ်ႇသီး၊ ဢုမ်ႇၶႃး၊ တၢင်းၶွႆႈ၊ ၵမ်ႉၵေႃႇ၊ ၶူၵ်ႉၼမ်ႉ ၸိူဝ်းၼႆႉ ယွၼ်ႉသိုၵ်းမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် ႁၢဝ်ႈႁႅင်းလႄႈ လႆႈပၢႆႈၽေးသိုၵ်း မီးၸမ် 4 လိူၼ်ယဝ်ႉ။ သိုၵ်းမၢၼ်ႈ ဢဝ်ၶိူင်ႈမိၼ် မိူဝ်းပွႆႇမၢၵ်ႇလႄႈ ဢမ်ႇႁတ်းမိူဝ်းယူႇၶိုၼ်းႁိူၼ်း ဝႃႈၼႆ။

ၼႂ်းၶေႃႈလႆႈၸႂ်တူၵ်းလူင်း ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊၵေႃႈ ပႃးဝႆႉဝႃႈ ၸုမ်းယိပ်းၵွင်ႈၵၢင်ႇၼႆႉ ႁၢမ်ႈဢဝ်ႁိူၼ်းယေး ၵူၼ်းမိူင်း ဝႆႉပဵၼ်ပဝ်ႉမၢႆၵၢၼ်သိုၵ်း၊ ႁၢမ်ႈပိုတ်းယိုဝ်းၵၼ်ၼႂ်း ဝၢၼ်ႈသူၼ်ႁိူၼ်းယေး ၵူၼ်း မိူင်း ဝႃႈၼႆဝႆႉသေတႃႉ – ၸုမ်းယိပ်းၵွင်ႈၵၢင်ႇ ဢမ်ႇၸွမ်းမၢႆမီႈၼႆႉသေၸုမ်း။

တီႈဝဵင်းၼွင်ၶဵဝ်ၼႆႉ သိုၵ်း TNLA – PDF လႄႈ သိုၵ်းမၢၼ်ႈ ပိုတ်းယိုဝ်း တိုၵ်းတေႃးၵၼ် မႃးတင်းႁိုင်။ ထိုင်မႃးဝၼ်းတီႈ 10/07/2024 ၼႆႉ သိုၵ်းတဢၢင်း ပိုၼ်ၽၢဝ်ႇဝႃႈ ယိုတ်းၵုမ်းလႆႈ ဝဵင်းၼွင်ၶဵဝ်ယဝ်ႉ ဝႃႈၼႆသေ တႃႉ – တီႈဝၢၼ်ႈတွင်းၶမ်း ဢၼ်ယၢၼ်ၵႆၵၼ် တၢင်းဝဵင်းၼွင်ၶဵဝ်မွၵ်ႈ 20 လၵ်းၼၼ်ႉ ပၢင်တိုၵ်းသိုပ်ႇပဵၼ် တေႃႇထိုင်ဝၼ်းမိူဝ်ႈၼႆႉ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)