ဝၼ်းတီႈ 22/10/2024 ၾင်ႇမိူင်းၶႄႇၵူတ်ႇထတ်း ရူတ်ႉၵႃးတၢင်ႇၵုၼ်ႇ မိူင်းမၢၼ်ႈ ႁၢဝ်ႈႁႅင်း တီႈၽၵ်းတူၸၢင်ႉၽိူၵ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ႁဵတ်းႁႂ်ႈၵူၼ်းတေႃႉတၢင်ႇၶူဝ်းၵုၼ်ႇ ထူပ်းတၢင်းယၢပ်ႇၽိုတ်ႇႁႅင်း ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉၾင်ႇမိူင်းၶႄႇၶဝ် ၵူတ်ႇထတ်းႁၼ် သိူဝ်ႈၸိတ်ႇၵႃႇလႄႈ Computer ဢၼ်တေတေႃႉမႃးတၢင်းမိူင်းမၢၼ်ႈၼႆႉ တင်းၼမ်လႄႈ ၶဝ်ၵူဝ်ဢဝ်ၵႂႃႇပၼ် ၸုမ်းၵျႃးၽႅၼ်ႉႁိုဝ် ဢမ်ႇႁူႉ။ ယၢမ်းလဵဝ် ဢၼ်ၶဝ်ႁၢမ်ႈႁႅင်းၼႆႉ ပဵၼ်ၶိူင်ႈၾႆးၾႃႉ ဢၼ်လုၵ်ႉတၢင်းမိူင်းၶႄႇ ၶဝ်ႈမႃးမိူင်းမၢၼ်ႈၼႆႉဢေႃႈ။ တေႃႈၼင်ႇ သဵၼ်ႈတၢင်းရူတ်ႉၶိူင်ႈၶဝ်ႈဢွၵ်ႇၵႂႃႇမႃး တီႈၽၵ်းတူၼႆႉ ၶဝ်ဢဝ်ႁူဝ်ႉလဵၵ်ႉႁႄႉဝႆႉသေ ႁႂ်ႈၵႂႃႇမႃးလႆႈ တၢင်း ၵႂၢင်ႈမၼ်း 3 ပေႇၵူၺ်း ယွၼ်ႉဢမ်ႇၶႂ်ႈႁႂ်ႈတၢင်ႇၶူဝ်းၼမ် မိူၼ်ၵူႈပွၵ်ႈၼၼ်ႉယဝ်ႉ”- ဝႃႈၼႆ။
လိူဝ်ၼၼ်ႉ မိူၼ်ၼင်ႇ ရူတ်ႉၵႃးၵေႃႈ တေလႆႈပဵၼ်ၵႃးမၢၼ်ႇလူင်ႇ ဢၼ်လဵၵ်ႉၵူၺ်း။ ၵႃးၼၼ်ႉ တေလႆႈတၢင်ႇၶူဝ်း ၵုၼ်ႇ ၶဝ်ႈမႃးၵမ်းဢိတ်းဢိတ်း ၸိူင်ႉၼၼ်ၵူၺ်း။ ယွၼ်ႉၼၼ် 3-4 ဝၼ်းမႃးၼႆႉ ၵႃးၵိုတ်းၶမ် လွင်ႈၶဝ်ႈဢွၵ်ႇ တီႈ ၽၵ်းတူၸၢင်ႉၽိူၵ်ႇၼႆႉ တင်းၼမ်။ ၵႃးဢၼ်ၶဝ်ႈဢွၵ်ႇၼႆႉ မီးၼပ်ႉႁူဝ်ပၢၵ်ႇ တေႃႇဝၼ်း။
ယွၼ်ႉရူတ်ႉၵႃးတၢင်ႇၶူဝ်းၵုၼ်ႇ ၶဝ်ႈဢွၵ်ႇယၢပ်ႇ လႆႈၸိူင်ႉၵၢတ်ႈ ၸွမ်းၵဵတ်ႉလၢၼ်ႇၼႆႉသေ ႁဵတ်းႁႂ်ႈၶူဝ်းၶွင်၊ ၽၵ်းၶဵဝ် ၸိူဝ်းၼႆႉ လူႉသုမ်းၼမ်။ ယွၼ်ႉၼၼ် ဢၼ်ၸွမ်းမႃးတၢင်းလင်ၵေႃႈ ၸၢင်ႈႁဵတ်းႁႂ်ႈၶၼ်ၶူဝ်းၵုၼ်ႇၵႃႈၶိုၼ်ႈထႅင်ႈ ၼႆယဝ်ႉ။
“ယွၼ်ႉၵႃးၶမ်ၼမ်သေ ႁဵတ်းႁႂ်ႈၽၵ်းၶဵဝ် ၼဝ်ႈပႅတ်ႈၼိူဝ်ၵႃးၵေႃႈ မီးၼမ်။ ယဝ်ႉၵေႃႈ ၵူၼ်းႁေႃႈရူတ်ႉၶိူင်ႈ ၵူၼ်းတၢင်ႇ ၵုၼ်ႇဢွၵ်ႇ မိူင်းၶႄႇ – မိူင်းမၢၼ်ႈၼႆႉၵေႃႈ မၼ်းဢမ်ႇလႆႈတၢင်ႇၼမ် မိူၼ်ၵူႈပွၵ်ႈယဝ်ႉ။ ပေႃးၶဝ် ဢမ်ႇပၼ်တၢင်ႇၼမ် ၵေႃႈ ၶၼ်ၵုၼ်ႇၸိူဝ်းၼႆႉ ၸၢင်ႈၶိုၼ်ႈႁႅင်းထႅင်ႈ ၶၼ်ငိုၼ်းၶႄႇၵေႃႈ တေၶိုၼ်ႈထႅင်ႈ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။
ဝဵင်းမူႇၸေႊၼႆႉ မီးၽၵ်းတူၶၢမ်ႈလႅၼ်လိၼ်တႆး – ၶႄႇ 3 ဢွင်ႈတီႈ။ မိူၼ်ၼင်ႇ – ၽၵ်းတူမၢၼ်ႈဝဵင်း၊ ၽၵ်းတူၸၢင်ႉ ၽိူၵ်ႇလႄႈ ၽၵ်းတူႁေႃၶမ်းလူင် ၸိူဝ်းၼႆႉ။ ယၢမ်းလဵဝ် ၽၵ်းတူ မၢၼ်ႈဝဵင်းသမ်ႉ ပိၵ်ႉဢိုတ်းဝႆႉ၊ ၵူၼ်းမိူင်း လႆႈၸႂ်ယႂ်ႇ ၽၵ်းတူႁေႃၶမ်းလူင်လႄႈ ၽၵ်းတူၸၢင်ႉၽိူၵ်ႇၵူၺ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ