ၸွမ်သိုၵ်းလူင်ၵဝ်ႇ ပရႃႊပူဝ်ႊဝူဝ်ႊ သူႊပီႊယႅၼ်ႊ ထုၵ်ႇလိူၵ်ႈပဵၼ်မႃး ၸွမ်ၸိုင်ႈ မိူင်းဢိၼ်ႊတူဝ်ႊၼီးသိူဝ်ႊ (Indonesia) ဝၢႆးလင်ပီ 1960 ၶွတ်ႇၽွတ်ႈၶိုၼ်ႈမႃး လူင်ပွင်ၸိုင်ႈ ဢၼ်မီးၽူႈၶဝ်ႈႁူမ်ႈ ပၢၵ်ႇပၢႆၵမ်းႁႅၵ်ႈ ဝႃႈၼႆ။

ၸွမ်ၸိုင်ႈ ၵေႃႉမႂ်ႇၼႆႉ မီးဢႃယု 73 ပီ ယၢမ်ႈပဵၼ်ၸွမ်သိုၵ်းလူင် မိူင်းဢိၼ်ႊတူဝ်ႊၼီးသိူဝ်ႊမႃး ယၢမ်းလဵဝ် ၶိုၼ်ႈပဵၼ်မႃး ၸွမ်ၸိုင်ႈ ၵေႃႉထူၼ်ႈ 8 ။ မၼ်းၸၢႆး ၺႃးမၢပ်ႇၼႄးဝႆႉဝႃႈ ပဵၼ်ၵေႃႉပူၼ်ႉပႅၼ် သုၼ်ႇလႆႈ သုၼ်ႇပဵၼ်ၵူၼ်းမႃး ၶၢဝ်းတၢင်းသိပ်းပီပၢႆ ။ ၵူၺ်းၵႃႈ လၵ်းထၢၼ်တႄႉ ဢမ်ႇၸၢင်ႈၼႄလႆႈတႅတ်ႈတေႃး။

တႃႇတေပဵၼ်ၸွမ်ၸိုင်ႈ မိူင်းဢိၼ်ႊတူဝ်ႊၼီးသိူဝ်ႊၼႆႉ ပရႃႊပူဝ်ႊဝူဝ်ႊ ယၢမ်ႈၶဝ်ႈၶေႉၶဵင်ႇလိူၵ်ႈတင်ႈမႃး 2 ၵမ်း၊ ၽွင်းပၢင်လိူၵ်ႈတင်ႈ မိူဝ်ႈလိူၼ်ၾႅပ်ႊပိဝ်ႊရီႊပူၼ်ႉမႃးၼႆႉ လႆႈၶႅပ်းၵၢင်ၸႂ် 58 ပိူဝ်ႊသႅၼ်ႊသေ ပေႉ ပၢင်လိူၵ်ႈတင်ႈ ပဵၼ်ၸွမ်ၸိုင်ႈမႃး။

ဝၼ်းတီႈ 20 ပူၼ်ႉမႃးၼႆႉ မၼ်းၸၢႆး လၢတ်ႈဝႃႈ တေၶတ်းၸႂ်ႁဵတ်းသၢင်ႈၵႂႃႇ ၼင်ႇႁိုဝ် လွင်ႈၽၢၼ်ၵိၼ်း ၼႂ်းမိူင်း တေယွမ်းလူင်း၊ လွင်ႈၵိၼ်သူးၵိၼ်လၢပ်ႈ တၢင်းယၢမ်ႈလူႉ တေယွမ်းလူင်းလႄႈ တေၶတ်းၸႂ် ႁႂ်ႈ ပဵၼ်မႃးၸွမ်ၸိုင်ႈ တႃႇၵူၼ်းမိူင်းဢိၼ်ႊတူဝ်ႊၼီးသိူဝ်ႊ တင်းသဵင်ႈယဝ်ႉ ဝႃႈၼႆ။

ဝၢႆးၶိုၼ်ႈပဵၼ်ၸွမ်ၸိုင်ႈမႃးၼႆႉ မၼ်းၸၢႆးၶွတ်ႇၽွတ်ႈ ၸုမ်းလူင်ပွင်ၸိုင်ႈ ဢၼ်ပႃးၽူႈၶဝ်ႈႁူမ်ႈ ပၢၵ်ႇပၢႆ၊ ၼႂ်းၼၼ်ႉ တေပႃးၽွင်းလူင် 48 ၵေႃႉလႄႈ ၵႅမ်ၽွင်းလူင် 58 ၵေႃႉ။

မိူဝ်ႈပၢၼ်ၸွမ်ၸိုင်ႈၵဝ်ႇ ၵဵဝ်ႇၵူဝ်ႇဝီႊၼၼ်ႉ ၼႂ်းၸုမ်းလူင်ပွင်ၸိုင်ႈ မီးၽူႈၶဝ်ႈႁူမ်ႈ 60 ပၢႆၵူၺ်း။ ယွၼ်ႉ ၼၼ် ဝၢႆးလင်ပီ 1960 ၶွတ်ႇၽွတ်ႈၸုမ်းလူင်ပွင်ၸိုင်ႈသေ မီးၽူႈၶဝ်ႈႁူမ်ႈ 100 ပၢႆ ၊ ပွၵ်ႈၼႆႉ ပဵၼ်ၵမ်းႁႅၵ်ႈ။

လိူဝ်ၼၼ်ႉ ၽွင်းလူင် ၾၢႆႇၵၢၼ်မၢၵ်ႈမီးလႄႈ ၾၢႆႇပၼ်ႇၼႃႇငိုၼ်းတွင်း မိူဝ်ႈပၢၼ်လူင်ပွင်ၸိုင်ႈ ၵေႃႉၵဝ်ႇ ၼၼ်ႉၵေႃႈ ပရႃႊပူဝ်ႊဝူဝ်ႊ ၶိုၼ်းႁူၺ်းဢဝ်သႂ်ႇပႃးဝႆႉ ၼႂ်းၸုမ်းလူင်ပွင်ၸိုင်ႈၼႆႉထႅင်ႈ ဝႃႈၼႆ။ ပရႃႊပူဝ်ႊဝူဝ်ႊ သူႊပီႊယႅၼ်ႊ ၸွမ် ၸိုင်ႈၵေႃႉမႂ်ႇ မိူင်းဢိၼ်ႊတူဝ်ႊၼီးသိူဝ်ႊ ယၢမ်းလဵဝ်ၼႆႉ တေလႆႈဢွၼ် ႁူဝ်ၵႂႃႇ မိူင်းဢၼ်မီးႁူဝ်ၼပ်ႉၵူၼ်း 600 လၢၼ်ႉပၢႆ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။