မိူဝ်ႈၼႆႉ ဝၼ်းတီႈ 23/10/2024 ယၢမ်းၵၢင်ၼႂ် 8:35 မူင်း သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇ တီႈႁူင်းႁုင်လဝ်ႈ ႁိမ်းဝၢၼ်ႈၼမ်ႉၶႆႉ တၢင်းၶဝ်ႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ထုၵ်ႇၾႆးမႆႈ ဝႃႈၼႆ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇ ၶဝ်မႃးပွႆႇသႂ်ႇ တီႈႁူင်းႁုင်လဝ်ႈ ႁိမ်းဝၢၼ်ႈၼမ်ႉၶႆႉၼႆႉ။ မိူဝ်ႈမၢၵ်ႇၶိူင်ႈမိၼ် မႃးတူၵ်းသႂ်ႇမိူဝ်ႈၵႆႈၼႆႉ လႆႈငိၼ်းသဵင်ႁႅင်းၼႃႇၶႃႈ။ ၵဵဝ်ႇလူၺ်ႈ ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇၼႆႉသေ ႁဵတ်းႁႂ်ႈၵူၼ်းလႃႈသဵဝ်ႈ ဢွၼ်ၵၼ် ပၢႆႈဢွၵ်ႇဝႆႉမီးၵူႈဝၼ်းယဝ်ႉ”- ဝႃႈၼႆ။

ႁူင်းႁုင်လဝ်ႈ ဢၼ်ၺႃးမၢၵ်ႇၶိူင်ႈမိၼ် သိုၵ်းမၢၼ်ႈ တူၵ်းသႂ်ႇၼၼ်ႉ မီးႁိမ်းၶၢင်ႈတၢင်းလူင် ဝဵင်းလိူဝ်ႇ – လႃႈသဵဝ်ႈ။ ဝၢႆးၶဝ် မႃးပွႆႇမၢၵ်ႇယဝ်ႉ ယၢမ်းၵၢင်ၼႂ် 10:05 မူင်း တိုၵ်ႉဢဝ်ၶိူင်ႈမိၼ် မႃးပၼ်ႇလဵပ်ႈတီႈဝဵင်းလႃႈသဵဝ်ႈထႅင်ႈယူႇ – ၵူၼ်းပိုၼ်ႉတီႈလၢတ်ႈ။

ဢိင်ၼိူဝ် ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇၼႆႉသေ လွင်ႈတုမ်ႉတိူဝ်ႉၵူၼ်းမိူင်း မၢတ်ႇၸဵပ်းလူႉတၢႆတႄႉ ဢမ်ႇမီး ဝႃႈၼႆ။

ဝၼ်းတီႈ 21 ယၢမ်းတဵင်ႈၶိုၼ်း သိုၵ်းမၢၼ်ႈ မႃးပွႆႇမၢၵ်ႇ တီႈပွၵ်ႉ 12 တင်း ပွၵ်ႉမၢၼ်ႈသူႈ ဝဵင်းလႃႈသဵဝ်ႈ ၸၢၵ်ႇမၢၵ်ႇတိူဝ်ႉသႂ်ႇႁိူၼ်းယေး ၵူၼ်းမိူင်းလူႉၵွႆ လၢႆလင် ၼႆယဝ်ႉ။