ၸွမ်းၼင်ႇ ဢိၼ်ႊသတီႊၵျုတ်ႉ ၾၢႆႇလဵပ်ႈႁဵၼ်းမူႇပိူင်လႄႈ မႁႃႇပိဝ်ႇႁႃႇမၢၼ်ႈ (ISP Myanmar) ၵဵပ်းၶေႃႈ မုလ်းပိုၼ် ၽၢဝ်ႇဝႆႉ ၼႂ်းၶၢဝ်းၾူၼ်ပီၼႆႉ တႄႇဢဝ်ဝၼ်းတီႈ 1 လိူၼ်ၵျူႊလၢႆႊထိုင် ဝၼ်းတီႈ 23 လိူၼ်သႅပ်ႊထႅမ်ႊပိူဝ်ႊ ၵူၼ်းထူပ်းၽေးၼမ်ႉမီး 5 လၢၼ်ႉ 6 လၢၼ်ႉပၢႆ ဝႃႈၼႆ။

ၼႂ်းၶေႃႈပိုၼ်ၽၢဝ်ႇၼၼ်ႉ မိူဝ်ႈဝၼ်းတီႈ 15/10/2024 ၼႆႉ တီႈတိူင်းၼမ်ႉၵဵဝ် တီႈလဵဝ် ၵူၼ်းထူပ်းၽေးၼမ်ႉ မီးၸမ် 2 လၢၼ်ႉၵေႃႉ၊ တိူင်းပႃႇၵိူဝ်ႇ ထူပ်းၽေးၼမ်ႉၼမ်သုတ်းထီႉသွင်သေ တိူင်းၸႄႈၵႅင်းသမ်ႉ ထီႉသၢမ် ဝႃႈၼႆ။

ၼႂ်းမိူင်းမၢၼ်ႈပတ်းပိုၼ်ႉ ဢၼ်ႁူပ်ႉၽေးၼမ်ႉ မီး 314 ၸႄႈဝဵင်း၊ လိၼ်ၽုၵ်ႇသွမ်ႈလူႉသုမ်းၵႂႃႇ ဢေႊၶိူဝ်ႊ 10 လၢၼ်ႉပၢႆ၊ ယွၼ်ႉၽေးၼမ်ႉသေ ယၢပ်ႇၽိုတ်ႇတႃႇယူႇသဝ်းၵိၼ်ယႅမ်ႉဝႆႉၼႆ ၸၢတ်ႈၸိုင်ႈလုမ်ႈၾႃႉ ပိုၼ်ၽၢဝ်ႇ ပႃးဝႆႉၼင်ႇၼႆ။

တေႃႇထိုင်ယၢမ်းလဵဝ် ၼႂ်းတိူင်းတႃႈၵုင်ႈၼႆႉ ၾူၼ်တူၵ်းထပ်းၵၼ်ႁၢဝ်ႈႁႅင်းသေ ၼမ်ႉထူမ်ႈႁိူၼ်းယေးဝႆႉ တင်းၼမ်။ လိူဝ်ၼၼ်ႉ ၾၢႆႇၾိင်ႈၾႃႉၾူၼ်လူမ်း ပိုၼ်ၽၢဝ်ႇပၼ်ၾၢင်ႉဝႆႉထႅင်ႈဝႃႈ ၼႂ်းဝၼ်းဢၢင်းၵၢၼ်း ဝၼ်းပုတ်ႉၼႆႉ ၾူၼ်တေတူၵ်းႁႅင်း ၼႂ်းတိူင်းလႄႈ ၸႄႈမိူင်း 7 ဢၼ် ႁႂ်ႈၾၢင်ႉၽေးၼမ်ႉထူမ်ႈ လိၼ်ၵူၼ်ႇ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။