ဝၼ်းတီႈ 21/10/2024 ယၢမ်းတဵင်ႈၶိုၼ်း သိုၵ်းမၢၼ်ႈ မိူဝ်းပွႆႇမၢၵ်ႇ တီႈဢၼ်သိုၵ်းၵဝ်ႈၵၢင်ႉ MNDAA ၵုမ်းဝႆႉ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၽွင်းၵူၼ်းမိူင်း ၼွၼ်းလပ်းၼွၼ်းယဵၼ် သိုၵ်းမၢၼ်ႈ ပွႆႇမၢၵ်ႇတီႈပွၵ်ႉ 12 လႄႈ တင်းပွၵ်ႉမၢၼ်ႈသူႈ ႁဵတ်းႁႂ်ႈႁိူၼ်းယေး ၵူၼ်းပိုၼ်ႉတီႈ လူႉၵွႆႇတင်းၼမ် ဝႃႈၼႆ။

ၵူၼ်းၸၢႆးပိုၼ်ႉတီႈ ဝဵင်းလႃႈသဵဝ်ႈ လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဝႃး ၵၢင်ၶိုၼ်း ၽွင်းၵူၼ်းဝၢၼ်ႈၵူၼ်းမိူင်း ၼွၼ်းလီ ၼွၼ်းဝၢၼ် သိုၵ်းမၢၼ်ႈ မႃးပွႆႇမၢၵ်ႇတင်းပွၵ်ႉ 12 ၊ တင်းပွၵ်ႉမၢၼ်ႈသူႈ။ ၵူၼ်းမၢတ်ႇၸဵပ်းတႄႉ မီးလၢႆၵေႃႉ ဢမ်ႇႁူႉတႅတ်ႈတေႃး။ ႁိူၼ်းၵူၼ်းမိူင်း လူႉၵွႆႇတင်းၼမ်၊ ပဵၼ်ႁိူၼ်းယႂ်ႇႁိူၼ်းလူင်လၢႆလၢႆ”- ဝႃႈၼႆ။

ၵူၼ်းမိူင်းပိုၼ်ႉတီႈၵေႃႈလၢတ်ႈဝႃႈ – ၵၢင်ဝၼ်း သိုၵ်းၵဝ်ႈၵၢင်ႉ MNDAA ၶဝ်ႈယူႇၼႂ်းပွၵ်ႉယွမ်ႇ ၼႂ်းႁိူၼ်းယေးၵူၼ်းမိူင်း။ ၵူၼ်းသူင်ႇၶၢဝ်ႇတီႈသိုၵ်းမၢၼ်ႈသမ်ႉ ႁိပ်ႈၼႅတ်ႈသူင်ႇၶၢဝ်ႇ။ ထိုင်ယၢမ်းၵၢင်ၶိုၼ်းမႃး သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇ။ ဢမ်ႇတိူဝ်ႉသိုၵ်း။ တိူဝ်ႉႁိူၼ်းယေးၵူၼ်းမိူင်းၵူၺ်းလူႉၵွႆ။ ၵူၼ်းမိူင်းၵူၺ်းတၢႆ – ဝႃႈၼႆ။   

သိုၵ်းမၢၼ်ႈ ၵႆႉမႃးပွႆႇမၢၵ်ႇၼႆႉ ပဵၼ်ယၢမ်းၵၢင်ၶမ်ႈၵၢင်ၶိုၼ်း မီးၵူၼ်းလူႉတၢႆလႄႈ မၢတ်ႇၸဵပ်းႁၢဝ်ႈႁႅင်းၼမ် မႃးၵူႈဝၼ်းသေ ႁိူၼ်းယေးၵူၼ်းပိုၼ်ႉတီႈၵေႃႈ လူႉၵွႆႇတင်းၼမ်တင်းလၢႆ ဝႃႈၼႆ။

ယၢမ်းလဵဝ် တီႈဝဵင်းလႃႈသဵဝ်ႈ ဢၼ်သိုၵ်းၵဝ်ႈၵၢင်ႉ ၵုမ်းၵမ်ဝႆႉၼၼ်ႉ ၵူၼ်းပိုၼ်ႉတီႈ ဢမ်ႇမီးၵၢၼ်ႁဵတ်းႁႃ ၵိၼ်လဵင်ႉတွင်ႉၵေႃႈယၢပ်ႇ၊ ဢမ်ႇမီးငိုၼ်းၶဝ်ႈလႄႈ ၵူဝ်သိုၵ်းမၢၼ်ႈ မႃးပွႆႇမၢၵ်ႇသေ ၶႂ်ႈပၢႆႈသေတႃႉ ဢမ်ႇမီးငိုၼ်းလႄႈ ပဵၼ်ဢၼ်ယၢပ်ႇၸႂ်ဝႆႉ ဝႃႈၼႆ။  

တႄႇဢဝ် လိူၼ်သႅပ်ႊထႅမ်ႊပိူဝ်ႊၼၼ်ႉမႃး ႁၢၼ်ႉတေႃႇထိုင် ၵၢင်လိူၼ်ဢွၵ်ႊထူဝ်ႊပိူဝ်ႊၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းလႃႈသဵဝ်ႈၼႆႉ ၶႂ်ႈဝႃႈၵူႈၶိုၼ်း။ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ 10 ပၢႆ ၵူၼ်းမၢတ်ႇၸဵပ်းမီးၸမ် 60  – ၵူၼ်းပိုၼ်ႉတီႈ လၢတ်ႈၼင်ႇၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)