ယၢမ်းလဵဝ် ၵူၼ်းမိူင်းၼႂ်းၼွင်ႁၢႆးယႃႈ ၸိူဝ်းလႆႈပၢႆႈၽေးၼမ်ႉဝႆႉၼၼ်ႉ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ႁၢဝ်ႈ ႁႅင်း ယွၼ်ႉမၢင်ဝၢၼ်ႈသမ်ႉ သဵၼ်ႈတႃႇသၢႆတၢင်းၶၢတ်ႇၵႂႃႇမႃးယၢပ်ႇလႄႈ ၸဝ်ႈတႃႇၼ ဢမ်ႇၶဝ်ႈထိုင်ၼႂ်းပိုၼ်ႉတီႈလႆႈ။

တႄႇဢဝ် ၵၢင်လိူၼ်သႅပ်ႊထႅမ်ႊပိူဝ်ႊၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ၼမ်ႉယိုင်ႈၼွင်းထူမ်ႈ ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်းၼႆႉ မီးၶၢဝ်းတၢင်းလိူၼ်ပၢႆယဝ်ႉ ၼမ်ႉပႆႇယွမ်းလူင်း ႁိူၼ်းယေးၵူၼ်းဝၢၼ်ႈ ၺႃးၼမ်ႉထူမ်ႈမီး 171 ဝၢၼ်ႈ ၼႆယဝ်ႉ။

လုင်းၸၢႆးၶမ်းမွင်ႇ ၵူၼ်းၼႂ်းၼွင်ႁၢႆးယႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉၼႆႉ တႄႇယွမ်းလူင်းၵႂႃႇ ၶိုင်ႈၼိုင်ႈယဝ်ႉ။ ၵမ်ႈၽွင်ႈၵေႃႈ ၵူၼ်းပၢႆႈၽေးပွၵ်ႈမိူဝ်းယဝ်ႉ၊ ၵမ်ႈၽွင်ႈ ပႆႇမိူဝ်းလႆႈၸိူဝ်းဢၼ်ၺႃးၼမ်ႉထူမ်ႈ ၼမ်ၶႃႈဢေႃႈ။ ၵမ်ႈၼမ် ဢွၼ်ၵၼ်ပၢႆႈသွၼ်ႈဝႆႉ ၸွမ်းႁိူၼ်းယေးပီႈၼွင်ႉလႄႈ ဝတ်ႉဝႃးၽႃသိူဝ်ႇ။ မၢင်ၸိူဝ်းသမ်ႉ ႁဵတ်းသုမ်ႉႁဵတ်းသွင်းသေ ယူႇဝႆႉၸွမ်းၼိူဝ်ၵုင်း တီႈသုင် ၸိူဝ်းၼႆႉ”- ဝႃႈၼႆ။

ၵူၼ်းထူပ်းၽေးၼမ်ႉထူမ်ႈ ဢၼ်ယူႇတီႈ ၸဝ်ႈတႃႇၼၶဝ် ဢမ်ႇၶဝ်ႈထိုင်လႆႈသမ်ႉ မိူၼ်ၼင်ႇ – ဝၢၼ်ႈၵုၼ်ၵႅင်း၊ ၵုၼ်ဝူဝ်း၊ ႁူဝ်ၼႃးလႄႈ ဝၢၼ်ႈၶုၼ် ၸိူဝ်းၼႆႉ တင်းမူတ်းလင်ႁိူၼ်းမီးမွၵ်ႈ 45 လင် ႁူဝ်ၵူၼ်း 100 ပၢႆ။ ဝၢၼ်ႈၸိူဝ်းၼႆႉသမ်ႉ မီးၾၢႆႇၸၢၼ်းႁႅင်းလႄႈ ပိူၼ်ႈဢမ်ႇႁွတ်ႈထိုင် ယွၼ်ႉလႆႈၶီႇႁိူဝ်းၶဝ်ႈၵႂႃႇ ဝႃႈၼႆ။

မိူဝ်ႈလဵဝ် တၢင်းၵႃးၵေႃႈ ၽႅဝ်ယဝ်ႉလႄႈ ၵူၺ်းၵႃႈ တေလႆႈလတ်းၽၢၼ်ႇၵဵတ်ႉ တီႈမေႃႇပီႇသေၵႂႃႇ ယွၼ်ႉဝႃႈ တီႈၵဵတ်ႉ ၼၼ်ႉသမ်ႉ မီးၸုမ်းယိပ်းၵွင်ႈ ပႂ်ႉၵူတ်ႇထတ်းႁႅင်းလႄႈ ၵူၼ်းမိူင်း ၵမ်ႈၼမ် ဢမ်ႇၶႂ်ႈၵႂႃႇဢွၼ်ၵၼ်ၶီႇႁိူဝ်းၶၢမ်ႈဢဝ် ၸိူဝ်းၼႆႉ။

ၽူႈၶဝ်ႈၸုမ်း ၸွႆႈထႅမ်တူင်ႇဝူင်းၵူၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵမ်ႈၼမ် ပိူၼ်ႈၵႂႃႇၸွႆႈထႅမ်သမ်ႉ တၢင်းယွင်ႁူၺ်ႈ ဢၼ်ၸမ်ၼႂ်းၼွင် ဢၼ်တေၶဝ်ႈလႆႈၼႂ်းၼွင်ႁၢႆးယႃႈ ၸိူဝ်းၼၼ်ၵူၺ်း။ ပေႃးၵႆသမ်ႉ ပိူၼ်ႈဢမ်ႇၵႂႃႇထိုင်လႆႈၶႃႈ။ ပေႃးတေၵႂႃႇတၢင်းႁိူဝ်းသမ်ႉ ၼမ်ႉမၼ်းၸၢၵ်ႈၵေႃႈယၢပ်ႇ။ တၢင်းၵႃးသမ်ႉ သဵၼ်ႈတၢင်းၵွႆ ဝႆႉတီႈတႃႈလေးဢူး (သလဲဉီး) ၸိူဝ်းၼၼ်ႉ ဢမ်ႇၸၢင်ႈၵႂႃႇ ၸုမ်းယိပ်းၵွင်ႈၵေႃႈ ၵူတ်ႇထတ်းႁႅင်းဢေႃႈ”- ဝႃႈၼႆ။

ၼမ်ႉထူမ်ႈပွၵ်ႈၼႆႉ ၼႃးၵူၼ်းဝၢၼ်ႈ ၼႂ်းထုင်ႉၼွင်ႁၢႆးယႃႈ လူႉသုမ်ႈၼပ်ႉႁူဝ်ႁဵင်ဢေႊၶိူဝ်ႊ။ လိူဝ်ၼၼ်ႉ ႁိူၼ်းၵူၼ်းမိူင်းၵေႃႈ ၺႃးၼမ်ႉထူမ်ႈၼမ်။ ယွၼ်ႉလွင်ႈၼႆႉသေ ပဵၼ်လွင်ႈတၢင်းယၢပ်ႇ တႃႇၵူၼ်းဝၢၼ်ႈၶဝ် တေပွၵ်ႈမိူဝ်းၶိုၼ်းႁိူၼ်း ၼႆယဝ်ႉ။

“ယွၼ်ႉၼမ်ႉထူမ်ႈသေ ၶဝ်ႈၼႂ်းၼႃး ဢၼ်ပႆႇလႆႈပၢတ်ႇ ၸိူဝ်းၼၼ်ႉ လႆႈၼဝ်ႈပႅတ်ႈမူတ်းယဝ်ႉ လူႉသုမ်း ၼပ်ႉႁဵင် ဢေႊၶိူဝ်ႊမၼ်းဢေႃႈ။ ၶူဝ်းႁိူၼ်းယေး ဢၼ်ၺႃးၼမ်ႉထူမ်ႈၵေႃႈၼမ် ၽႃႁိူၼ်းဢၼ်တေ ၵူၼ်ႇပင်းၵေႃႈမီးဢေႃႈ။ ယွၼ်ႉတႃႇတေႁဵတ်းသၢင်ႈၶိုၼ်း ႁိူၼ်းၽႂ်မၼ်းၵေႃႈ တေယၢပ်ႇယဝ်ႉ”- လုင်းၸၢႆးၶမ်းမွင်ႇ သိုပ်ႇလၢတ်ႈၼႄၼင်ႇၼႆ။

ၵွပ်ႈၼႆလႄႈ ၵူၼ်းထူပ်းၽေးၼမ်ႉ တီႈၼႂ်းၼွင်ႁၢႆးယႃႈၼႆႉ ပေႃးမီးၸဝ်ႈတႃႇၼ မႃးၸွႆႈၸိုင် ၸင်ႇလႆႈၵိၼ်ယႅမ်ႉ ယွၼ်ႉဢမ်ႇမီးၵၢၼ်ငၢၼ်း တႃႇႁဵတ်း ဢမ်ႇမီးငိုၼ်းၶဝ်ႈ။ ၼႃးၵေႃႈ ၺႃးၼမ်ႉထူမ်ႈလူႉသုမ်းၼမ် ၼႆယဝ်ႉ။