ၶၢဝ်းတၢင်း 6 ဝၼ်းမႃးၼႆႉ သၢႆၵၢၼ်မိၼ် မိူင်းဢိၼ်းတီးယိူဝ်ႊ(India) ၺႃးလွၵ်ႇငိုတ်ႈ 70 ၵမ်းပၢႆ ဝႃႈတေပွႆႇမၢၵ်ႇသႂ်ႇ ၼႆသေ ၾၢႆႇႁူမ်ႇလူမ်ႈတင်း ၽူႈၸတ်းၵၢၼ်လူင် တီႈသၢႆၵၢၼ်မိၼ် ၼႅတ်ႈႁွင်ႉပၢင်ၵုမ်ၶိုၵ်ႉၶၵ်ႉဢုပ်ႇဢူဝ်း ၼႂ်းဝၼ်းတီႈ 19 ၼႆႉ – သိုဝ်ႇၶၢဝ်ႇ NDTV ႁၢႆးငၢၼ်းၼင်ႇၼႆ။

ၼႂ်းဝၼ်းတီႈ 19/10/2024 ဝၼ်းလဵဝ်ၵူၺ်း ၺႃးလွတ်ႇငိုတ်ႈ 30 ၵမ်းပၢႆ။ ၽူႈမီးပုၼ်ႈၽွၼ်းၶဝ် လမ်းၸွမ်းႁဵင်းလိၵ်ႈ ၼႂ်း internet (IP Address) သေ လႆႈႁူႉဝႃႈ ၵူၼ်းၸိူဝ်းလွၵ်ႇငိုတ်ႈၼၼ်ႉ ယူႇတီႈ မိူင်းၵျႃႊမၼီႊ Germany ၊ ၶၼေႊတိူဝ်ႊ Canada ၊ ဢမေႊရိၵၼ်ႊ American လႄႈ ပရိတ်ႊထဵင်ႊ Britain (ဢၼ်မီးၼႂ်းၸိုင်ႈမိူင်း – UK) ၵူၺ်းၵႃႈ ၽူႈလွတ်ႇငိုတ်ႈၸိူဝ်းၼၼ်ႉ တေၸၢင်ႈၸႂ်ႉ VPNs (virtual private networks) လၢႆႈႁဵင်းလိၵ်ႈတီႈယူႇသေ လွတ်ႇငိုတ်ႈ ၵေႃႈ ၸၢင်ႈပဵၼ်လႆႈ – ဝႃႈၼႆ။

ၾၢႆႇၼိုင်ႈၵေႃႈ ၽူႈမီးပုၼ်ႈၽွၼ်းၶဝ် ၵုမ်းထိင်းဝႆႉ ၵူၼ်းၼုမ်ႇ ဢႃယု 17 ၶူပ်ႇ ၵေႃႉၼိုင်ႈ။ ယွၼ်ႉၵူတ်ႇထတ်းႁၼ်ဝႃႈ ၵူၼ်းၼုမ်ႇၵေႃႉၼႆႉ ၶႂ်ႈႁဵတ်းႁၢႆႉဢူၺ်းၵေႃႉမၼ်းသေ ႁဵတ်းလွင်ႈလွတ်ႇငိုတ်ႈဝႆႉ 4 ပွၵ်ႈ။

ၵူၺ်းၵႃႈ ဝၢႆးလင် တီႉၺွပ်းၵူၼ်းၼုမ်ႇ ၵေႃႉၼၼ်ႉဝႆႉယဝ်ႉသေတႃႉ တိုၵ်ႉမီးလွင်ႈ လွၵ်ႇငိုတ်ႈဝႆႉထႅင်ႈယူႇလႄႈ ပဵၼ်လွင်ႈယွၵ်ႇၵၼ်လဵၼ်ႈႁိုဝ် ႁူမ်ႈၵၼ်ပဵၼ်ၸုမ်းသေ ႁဵတ်းသၢင်ႈလပ်ႉလပ်ႉႁိုဝ် ဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ်လႆႈ။

ယၢမ်းလဵဝ် ၽူႈမီးပုၼ်ႈၽွၼ်းၶဝ် တိုၵ်ႉႁူမ်ႈၵၼ်ဝူၼ်ႉသၢင်ႈ လွၵ်းလၢႆးတႃႇတေႁႄႉၵင်ႈလႄႈ တေသိုပ်ႇႁဵတ်းသၢင်ႈၵႂႃႇ ၸွမ်းၼင်ႇၼႃႈၵၢၼ် ၾၢႆႇလွင်ႈႁူမ်ႇလူမ်ႈမီးဝႆႉ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။