သိုၵ်းမၢၼ်ႈ ယိုတ်းမိူင်း ဢွၼ်ၸတ်းပွႆးလွင်းသွမ်းသၢၼ် တီႈဝဵင်းမူႇၸေႊ သင်ၶၸဝ်ႈလူင်းတုင်းသွမ်း မီးမွၵ်ႈ 1,000 တူၼ်။

ဝၼ်းတီႈ 20/10/2024 ယၢမ်းဝၢႆးဝၼ်း 2:00 မူင်းထိုင် 4:30 မူင်း ယူႇတီႈ သိုၵ်းမၢၼ်ႈယိုတ်းမိူင်း ႁူမ်ႈတင်း ၽူႈၵွၼ်း ၸႄႈတွၼ်ႈလႄႈ ႁွင်ႈၵၢၼ် ၶႃႈႁၢပ်ႇၵၢၼ် ၼႂ်းလူင်ပွင်ၸိုင်ႈ ၵူႈႁွင်ႈၵၢၼ် ဢွၼ်ၸတ်းႁဵတ်း ပွႆးလွင်းသွမ်းသၢၼ် တီႈပၢင်ႇႁိူဝ်းမိၼ်ၵဝ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပွႆးလွင်းသွမ်းသၢၼ် တီႈဝဵင်းမူႇၸေႊၼႆႉ ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၶဝ်ႁဵတ်းမႃးၵူႈပီယဝ်ႉ။ ၶဝ်ႁဵတ်းမႃး 3 ပွၵ်ႈ ပႃးၼႆႉယဝ်ႉ။ ဢၼ်ဢွၼ်ႁဵတ်းၼႆႉ ၽူႈၵွၼ်းၸႄႈတွၼ်ႈတင်း သိုၵ်းမၢၼ်ႈ တပ်ႉမ 99 ယဝ်ႉၵေႃႈ ႁွင်ႈၵၢၼ် လူင်ပွင်ၸိုင်ႈ ၸိူဝ်းၼႆႉထႅင်ႈဢေႃႈ”- ဝႃႈၼႆ။

ပွႆးလွင်းသွမ်းသၢၼ် တီႈဝဵင်းမူႇၸေႊ ပီၼႆႉ ၶဝ်ပၢင်းထိုင်သင်ၶၸဝ်ႈ 1,300 ပၢႆ ဢၼ်မႃးလူင်းတုင်းသွမ်းသမ်ႉ မီးမွၵ်ႈ 1,000 တူၼ်။

“လွင်ႈၸတ်းႁဵတ်း ပွႆးလွင်းသွမ်းသၢၼ်ၼႆႉ ပေႃးဢဝ်ၸွမ်းထုင်း ၼႂ်းပိုၼ်ႉတီႈဝႃႈၸိုင် ပႆႇၸႂ်ႈၶိင်ႇၸႂ်ႈၶၢဝ်းမၼ်းၶႃႈ။ ဢၼ်ၶဝ်ႁဵတ်းၼႆႉ တႃႇလွႆႉၶေႃႉ/ မေးၵဵဝ်ႇ ၽွင်းဝၢၼ်ႈမိူင်းသုၵ်ႉယုင်ႈၼႆႉၵူၺ်း ႁဝ်းၶႃႈ ႁၼ်ထိုင်တႄႉ။ ပီၼႆႉ တဵၵ်း ၶၢၼ်း ၵဵပ်းငိုၼ်းၸွမ်းပွၵ်ႉယွမ်ႇယူႇ။ ၵူၺ်းၵႃႈ ယူႇတီႈ ၵူၼ်းၼႂ်းပွၵ်ႉတႄႉဝႃႈ တေလူႇတၢၼ်းပၼ်သင်ၶၸဝ်ႈ 1 တူၼ် 2,000 ပျႃးၼႆၶႃႈဢေႃႈ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

ပွႆးလွင်းသွမ်းသၢၼ် တီႈဝဵင်းမူႇၸေႊ ပွၵ်ႈၵမ်းႁႅၵ်ႈၼၼ်ႉ တႄႇႁဵတ်းမႃး မိူဝ်ႈပီ 2022 ။ မိူဝ်ႈပီၼၼ်ႉ သိုၵ်းမၢၼ်ႈ ၸီႉသင်ႇ ၵဵပ်းငိုၼ်း ၵူၼ်းမိူင်းၼႂ်းပွၵ်ႉယွမ်ႇ 1 ပွၵ်ႉလႂ် ယႃႇႁႂ်ႈယွမ်း 10 သႅၼ်ပျႃး။ မိူဝ်ႈပီၼၼ်ႉ ပၢင်းထိုင် သင်ၶၸဝ်ႈ ၶဝ်ႈႁူမ်ႈတုင်းသွမ်း 102 ဝတ်ႉ ၼႂ်းၸႄႈတွၼ်ႈမူႇၸေႊ မိူၼ်ၼင်ႇ – ၸႄႈဝဵင်းၼမ်ႉၶမ်း၊ မူႇၸေႊ၊ ၵူတ်ႉၶၢႆ၊ မၢၼ်ႈႁဵဝ်း၊ ပၢင်ႇသၢႆး၊ မိူင်းပေႃႈ တင်းမူတ်း သင်ၶၸဝ်ႈ မီး 1,000 တူၼ်၊ ၼၢႆးၶၢဝ်သမ်ႉ 3 ၵျွင်း/ ဝတ်ႉ မိူၼ်ၼင်ႇ – ၵျွင်းၵမ်မထၢၼ်း၊ ၵျွင်း 105 လၵ်းလႄႈ ၵျွင်းၵွင်းဝႅတ်ႉ ဝဵင်းမူႇၸေႊ ၸိူဝ်းၼႆႉထႅင်ႈ။