မိူဝ်ႈၼႆႉ ဝၼ်းတီႈ 21/10/2024 ယၢမ်းၵၢင်ၼႂ် သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA သိုပ်ႇပဵၼ်ပၢင်တိုၵ်း ၵၼ်ထႅင်ႈႁၢဝ်ႈႁႅင်း ၸွမ်းဝၢၼ်ႈပၢၼ်ႉပူၺ်း၊ ဝၢၼ်ႈၵမ်ႉၵေႃႇလႄႈ ဝၢၼ်ႈတွင်းၶမ်း ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈ ၵျွၵ်ႉမႄး ၸိုင်ႈတႆးပွတ်းႁွင်ႇ။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉ ပဵၼ်ၾၢႆႇၸၢၼ်းဝဵင်း တၢင်းတွင်းၶမ်းၼၼ်ႉ။ လႆႈငိၼ်းသဵင်မၢၵ်ႇလူင်လၢႆလၢႆၵမ်းဢေႃႈ။ တၢင်းဝၢၼ်ႈၶူၵ်ႉၼမ်ႉ၊ ဝၢၼ်ႈမေႃႇၼႆႉၵေႃႈ ၶဝ်ဢဝ်မၢၵ်ႇလူင်ပွႆႇတင်းၼမ်။ သွင်ဝၼ်းမႃးၼႆႉ ၶဝ်ယိုဝ်းၵၼ် တင်းဝၼ်းတင်းၶိုၼ်း သဵင်မၢၵ်ႇလူင် ပေႃးဢမ်ႇထၢတ်ႇၶႃႈယဝ်ႉ။ တၢင်းဝၢၼ်ႈပၼ်ႉပူၺ်း၊ ဝၢၼ်ႈၵမ်ႉၵေႃႇၼႆႉ မိူဝ်ႈဝႃး ၶဝ်ယိုဝ်းၵၼ်ႁႅင်းဢေႃႈ”- ဝႃႈၼႆ။

ပၢင်တိုၵ်း တီႈဝဵင်းၼွင်ၶဵဝ်ၼႆႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း (Jet Fighter) မႃးပွႆႇမၢၵ်ႇဢမ်ႇထၢတ်ႇ တင်ႈတႄႇ ဢွၵ်ႇဝႃႇသႃမႃးၼႆႉ။ ယၢမ်းလဵဝ် ပဵၼ်ၶၢဝ်းလူဝ်ႇပၢတ်ႇၶဝ်ႈယဝ်ႉလႄႈ ႁဵတ်းႁႂ်ႈၵူၼ်းမိူင်း ဢမ်ႇၸၢင်ႈလူင်းၼႃးပၢတ်ႇၶဝ်ႈ လႆႈပိုၼ်ႉပွႆႇပႅတ်ႈသေပၢႆႈ ဝႃႈၼႆ။

“တၢင်းႁဝ်းၶႃႈယူႇ ဢုမ်ႇမတီး၊ ၶူၵ်ႉၼမ်ႉၼႆႉ လူဝ်ႇပၢတ်ႇၶဝ်ႈယဝ်ႉ ၵမ်ႈၽွင်ႈ ႁတ်းၵႂႃႇတူၺ်း၊ ၵမ်ႈၽွင်ႈ ဢမ်ႇႁတ်းၵႂႃႇတူၺ်း တႃႇၵိၼ်ပီတေမႃးၼႆႉ မၼ်းတိုၼ်းၶမ်ၸႂ် ယၢပ်ႇၽိုတ်ႇၼၼ်ႉၶႃႈယဝ်ႉ။ တူင်ႈၼႃးၼႆႉ ဢၼ်ပွႆႇႁၢမ်းသေ ပၢႆႈ ၵေႃႈ မီးတင်းၼမ်ၶႃႈဢေႃႈ”- ၵူၼ်းပိုၼ်ႉတီႈ ဝဵင်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။

ဝၼ်းတီႈ 17-18 ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇ တီႈဝဵင်းၼွင်ၶဵဝ် ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းမၢတ်ႇၸဵပ်း 4 ၵေႃႉ။ ဝၼ်းတီႈ 19 ယၢမ်းဝၢႆးဝၼ်း 2 မူင်းပၢႆ မႃးပွႆႇထႅင်ႈ 2 လုၵ်ႈ တိူဝ်ႉၺႃး ၵူၼ်းမိူင်းလူႉတၢႆ 4 ၵေႃႉ၊ မၢတ်ႇၸဵပ်း 3 ၵေႃႉ။ မိူဝ်ႈၼႆႉ ဝၼ်းတီႈ 21 ယၢမ်းၵၢင်ၼႂ်ၸဝ်ႉ 1 မူင်းပၢႆ မႃးပွႆႇ ထႅင်ႈ 8 လုၵ်ႈ တိူဝ်ႉၺႃးၵူၼ်းမိူင်းမၢတ်ႇ ၸဵပ်း 1 ၵေႃႉ၊ ႁိူၼ်းယေး၊ ဝတ်ႉဝႃးၽႃသိူဝ်ႇ၊ ႁၢၼ်ႉၶၢႆၶူဝ်းၵုၼ်ႇ ၸိူဝ်းၼႆႉ လူႉၵွႆၼမ် – သိုၵ်းတဢၢင်း TNLA ပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။