တႄႇဢဝ်ပီ 2024 ၼႆႉၵႂႃႇ ၼႂ်းၶၢဝ်းတၢင်း 5 ပီ ၵျပၼ်ႊႁၢင်ႈႁႅၼ်း တေႁွင်ႉဢဝ်ႁႅင်းၵၢၼ်ၼွၵ်ႈမိူင်း ၸိူဝ်းလူင်ႉလႅၼ်ႇ ၼႃႈၵၢၼ်ထႅင်ႈ တႃႇ 8 သႅၼ်ပၢႆ ဝႃႈၼႆ။

ၽူႈမီးပုၼ်ႈၽွၼ်း လူင်ပွင်ၸိုင်ႈ မိူင်းၵျပၼ်ႊ လၢတ်ႈဝႃႈ ႁၢင်ႈႁႅၼ်း တေႁွင်ႉဢဝ်ႁႅင်းၵၢၼ်ၼွၵ်ႈမိူင်း တႃႇၼႂ်းၵၢၼ် ၵေႃႇသၢင်ႈ၊ ႁဵတ်းဢွၵ်ႇၶူဝ်းၵုၼ်ႇ၊ ၵၢၼ်ၽုၵ်ႇသွမ်ႈလႄႈ ၵၢၼ်လုမ်းလႃးၾၢႆႇပၢႆးယူႇလီ ၸိူဝ်းၼႆႉ။

ၼင်ႇႁိုဝ် ႁႅင်းၵၢၼ် တေဢမ်ႇၶၢတ်ႇၵႂႃႇၼၼ်ႉ ၼႂ်းပီၼႆႉ တေတိူဝ်းႁွင်ႉႁႅင်းၵၢၼ် ၼွၵ်ႈမိူင်းၵႂႃႇ တႃႇ 2 ပုၼ်ႈ ၼႆယဝ်ႉ။

ၸုမ်းႁႃၵၢၼ်ၼွၵ်ႈမိူင်း ၶဝ်လၢတ်ႈဝႃႈ ၼႂ်းၵၢၼ်ၵေႃႇသၢင်ႈလႄႈ ၵၢၼ်ၵမ်ႈၽွင်ႈၼၼ်ႉ တေႁွင်ႉပႃးႁႅင်းၵၢၼ် မိူင်းမၢၼ်ႈ။ ယူႇတီႈ လုမ်းၽွင်းတၢင်မၢၼ်ႈ ဢၼ်မီးတီႈတူဝ်ႊၵဵဝ်ႊ (Tokyo) – ၵျပၼ်ႊ (Japan) ၵေႃႈ တိုၵ်ႉၵူတ်ႇထတ်း ၽိုၼ်လိၵ်ႈႁွင်ႉၵၢၼ် (Demand Letter) ဢၼ်ယူႇတီႈ ႁွင်ႈၵၢၼ် ၽွင်းလူင် ၾၢႆႇၼွၵ်ႈမိူင်းသေ သူင်ႇမႃးၼၼ်ႉယူႇ။

ၾၢႆႇၼိုင်ႈၵေႃႈ လွင်ႈၵပ်းသိုပ်ႇၼႂ်းၵႄႈၵၢင် ၸုမ်းႁႃၵၢၼ်လႄႈ ၶွမ်ႊပၼီႊၵျပၼ်ႊၶဝ် ၵႆႉမီးလွင်ႈ ပွင်ႇၸႂ်ၽိတ်း ၼိူဝ် ၵၼ်။ ႁႅင်းၵၢၼ်မိူင်းမၢၼ်ႈ မၢင်ၸိူဝ်းသမ်ႉ ဢမ်ႇလူင်ႉလႅၼ်ႇၼႃႈၵၢၼ်၊ ၵႆႉၶၢႆႉ လႅၵ်ႈၵၢၼ်၊ ပၢႆႈၵၢၼ် ၸိူဝ်းၼႆႉ။

ၵွပ်ႈၼၼ် ၼင်ႇႁိုဝ်တေဢမ်ႇမီး လွင်ႈတုမ်ႉတိူဝ်ႉႁႅင်းၵၢၼ် ၸိူဝ်းတေၵႂႃႇႁဵတ်းၵၢၼ်ထႅင်ႈ မိူဝ်းၼႃႈၼၼ်ႉ ႁႂ်ႈလဵပ်ႈ ႁဵၼ်း၊ ႁၢင်ႈႁႅၼ်းလီလီသေ ၸင်ႇၵႂႃႇ – ဝႃႈၼႆ။

ၵူၼ်းမိူင်းမၢၼ်ႈ ၸိူဝ်းၵႂႃႇႁဵတ်းၵၢၼ်လႄႈ ၶိုၼ်ႈႁဵၼ်း တီႈမိူင်းၵျပၼ်ႊ တင်းမူတ်း မီး 8 မိုၼ်ႇပၢႆ။ ယၢမ်းလဵဝ်ၵေႃႈ ၸဝ်ႈၵၢၼ်တီႈမိူင်းၵျပၼ်ႊၶဝ် ႁၢင်ႈႁႅၼ်း တႃႇတေႁွင်ႉႁႅင်းၵၢၼ် မိူင်းမၢၼ်ႈ တႃႇၵၢၼ်ငၢၼ်း လုမ်းလႃးၵူၼ်းထဝ်ႈ၊ ၵၢၼ် ၵေႃႇသၢင်ႈ၊ ၵၢၼ်ၽုၵ်ႇသွမ်ႇလႄႈ ၵၢၼ်ႁူင်းႁႅမ်း (Hotel) ၸိူဝ်းၼႆႉဝႆႉယူႇ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။