ဝၼ်းတီႈ 19/10/2024 ၵၢင်ၼႂ် 5 မူင်း ၶိူင်ႈမိၼ် Jet fighter သိုၵ်းမၢၼ်ႈ မႃးပွႆႇမၢၵ်ႇတီႈဝဵင်းၼွင်ၶဵဝ် 2 ၵမ်း ၵူၼ်းမိူင်း 3 ၵေႃႉပေႃႈလုၵ်ႈတၢႆထင်တီႈ ၵူၼ်းမၢတ်ႇၸဵပ်းႁၢဝ်ႈႁႅင်း မီး 5 ၵေႃႉ ဝႃႈၼႆ ။
ၵူၼ်းၸၢႆးပိုၼ့်တီႈလၢတ်ႈၽူႈတွႆႇႁွၵ်ႈဝႃႈ-“ ႁိူဝ်းမိၼ်ၼႆ့ မၼ်းတေမႃး 2 လမ်း 3 လမ်း ။ မႃးပွႆႇမၢၵ်ႇတီႈတင်းပွၵ့်ၸၢၼ်း ပဵၼ်သႅၼ်းမၢၵ်ႇ 500 ပွင်ႇ ၊ ႁိူၼ်းလူ့ၵွႆၸမ် 20 လင် ၊ လုင်းၵျေႃႇ( ဉီးကျော် ) ၶဝ်ပေႃႈလုၵ်ႈ တၢႆထင်တီႈ ၊ ႁိမ်းႁိူၼ်းၼၼ့်ၵေႃႈ မီးၵူၼ်းမၢတ်ႇၸဵပ်း”- ဝႃႈၼႆ ။
သိုၵ်းတဢၢင်း TNLA ပိုၼ်ၽၢဝ်ႇဝႃႈ မၢၵ်ႇလူင်သိုၵ်းမၢၼ်ႈတူၵ်းတၢင်းပွၵ်ႉၸၢၼ်း ။ တၢႆ 3 ၵေႃႉပေႃႈလုၵ်ႈ။ ပဵၼ်လုၵ်ႈဢွၼ်ႇၸၢႆး 2 ၵေႃႉ။ ႁိူၼ်းၵွႆ 17 လင် ဝႃႈၼႆ။
မိူဝ်ႈယၢမ်းၵၢင်ၼႂ် 3 မူင်းၼၼ်ႉသမ်ႉသိုၵ်းမၢၼ်ႈမႃးပွႆႇမၢၵ်ႇသႂ်ႇတၢင်းဝၢၼ်ႈသၢမ်သၢႆ 3 လုၵ်ႈ ၼင်ႇၵဝ်ႇ။
မိူဝ်ႈဝႃး ဝၼ်းတီႈ 18/10/2024 ယၢမ်းၵၢင်ၼႂ် 5 မူင်း ထိုင် ၵၢင်ၶမ်ႈ 10 မူင်း သိုၵ်းမၢၼ်ႈတင်းသိုၵ်းတဢၢင်း TNLA ပဵၼ်ပၢင်တိုၵ်းၵၼ် တင်းဝၢၼ်ႈ သၢႆးၶၢဝ် သိုၵ်းမၢၼ်ႈဢဝ်ၵွင်ႈလူင်ယိုဝ်းဢမ်ႇထၢတ်ႇ မွၵ်ႈ 100 ၵမ်းၸိူဝ်းၼႆႉ ဝႃႈၼႆ။
ၵူၼ်းၸၢႆးပိုၼ့်တီႈလၢတ်ႈၽူႈတွႆႇႁွၵ်ႈဝႃႈ -“တင်းသၢမ်သၢႆၼႆႉၵေႃႈ မိူဝ်ႈၼႆ့ သိုၵ်းမၢၼ်ႈဢဝ်ႁိူဝ်းမိၼ်ႈမႃးပွႆႇမၢၵ် 3 ၵမ်း ၊ ၵူၼ်းမၢတ်ႇၸဵပ်းလူ့တၢႆတႄ့ပႆႇလႆႈႁူႉ ။ မိူဝ်ႈဝႃး တင်းဝၢၼ်ႈ သၢႆးၶၢဝ် ပဵၼ်ပၢင်တိုၵ်းၵၼ်တင်းဝၼ်း ၊ သိုၵ်းမၢၼ်ႈယိုဝ်းမၢၵ်ႇၵွင်ႈလူင် ၼိုင်ႈပွၵ်ႈ 5 ၵမ်း ၶႆႈမီးမွၵ်ႈ 20 ပွၵ်ႈ ၊ မိူၼ်ထႅမ်ႁႅင်းသိုၵ်းမႃးတင်းသွင်ၾၢႆႇထႅင်ႈ”- ဝႃႈၼႆ ။
တီႈဝဵင်းၼွင်ၶဵဝ် မိူဝ်ႈဝၼ်းဢွၵ်ႇဝႃႇ ဝၼ်းတီႈ 17/10/2024 သိုၵ်းမၢၼ်ႈဢဝ်ၶိူင်ႈမိၼ်မႃးပွႆႇမၢၵ်ႇ 7 လုၵ်ႈ ၊ တူၵ်းတႅၵ်ႇ တီႈၵဵတ်ႉ/ လၢၼ်ႇ တၢင်းၶဝ်ႈဝဵင်း၊ လုမ်းၵွၼ်းၸႄႈဝဵင်း ႁူင်းပလိၵ်ႈလႄႈ ႁၢၼ်ႉတၢင်းၵိၼ်၊ ႁိူၼ်းယေး လူႉၵွႆထႅင်ႈ တင်းၼမ် ဝႃႈၼႆ။
တီႈဝဵင်းၼွင်ၶဵဝ်ၼႆႉ သိုၵ်း TNLA – PDF လႄႈ သိုၵ်းမၢၼ်ႈ ပိုတ်းယိုဝ်း တိုၵ်းတေႃးၵၼ် မႃးတင်းႁိုင်။ ထိုင်မႃးဝၼ်းတီႈ 10/07/2024 ၼႆႉ သိုၵ်းတဢၢင်း ပိုၼ်ၽၢဝ်ႇဝႃႈ ယိုတ်းၵုမ်းလႆႈ ဝဵင်းၼွင်ၶဵဝ်ယဝ်ႉ ဝႃႈၼႆသေတႃႉ – တီႈဝၢၼ်ႈတွင်းၶမ်း ဢၼ်ယၢၼ်ၵႆၵၼ် တၢင်းဝဵင်းၼွင်ၶဵဝ်မွၵ်ႈ 20 လၵ်းၼၼ်ႉ ပၢင်တိုၵ်းသိုပ်ႇပဵၼ် တေႃႇထိုင်ဝၼ်းမိူဝ်ႈၼႆႉ။
တႅမ်ႈ – ယိင်းသဵဝ်ႈၶၢဝ် ( ၽူႈသိုဝ်ႇၶၢဝ်ႇၾိုၵ်းၵၢၼ် )
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ