ဝၼ်းတီႈ 17/10/2024 ၼႆႉ ဢိတ်ႉသ်ရေႊ (Israel) ပိုၼ်ၽၢဝ်ႇဝႃႈ လႆႈၶႃႈႁႅမ် Yahya Sinwar ႁူဝ်ၼႃႈ ၸုမ်းႁႃႊမၢတ်ႉသ်(Hamas) တၢႆ ဝႃႈၼႆ။
Yahya Sinwar ၼႆႉ ပဵၼ်ၽူႈဢၼ်ႁၢင်ႈႁႅၼ်းၸီႉသင်ႇ တႃႇတေၶဝ်ႈတိုၵ်းဢိတ်ႉသ်ရေႊ ၼႂ်းဝၼ်းတီႈ 07/10/2023 သေ ႁဵတ်းႁႂ်ႈပဵၼ်မႃး ပၢင်တိုၵ်းတီႈၵႃႊသႃႊ(Gaza) မၼ်းၸၢႆးၼႆႉ မီးဢႃ ယု 61 ပီ ၼႆယဝ်ႉ။
ယဝ်ႉၵေႃႈ မၼ်းၸၢႆးတင်း ၵူၼ်းၸွမ်းလင်သွင်ၵေႃႉ ၺႃးသိုၵ်းဢိတ်ႉသ်ရေႊ ပိုတ်းယိုဝ်း တီႈႁိူၼ်းတိူၵ်ႈ လူင်လင်ၼိုင်ႈ ၼႂ်းထုင်ႉၵႃႊသႃႊ ပွတ်းၸၢၼ်း။ လႆႈၵူတ်ႇထတ်းလိူတ်ႈ (DNA) လႄႈ ၶဵဝ်ႈသေ ၸင်ႇယိုၼ် ယၼ်မၵ်းမၼ်ႈလႆႈဝႃႈပဵၼ် Yahya Sinwar ႁူဝ်ၼႃႈၸုမ်းႁႃႊမၢတ်ႉသ် – ၼႆယဝ်ႉ။
Israel Katz ၽွင်းလူင် ၾၢႆႇၼွၵ်ႈမိူင်း မိူင်းဢိတ်ႉသ်ရေႊ ပိုၼ်ၽၢဝ်ႇဝႃႈ Yahya Sinwar ပဵၼ်ၵေႃႉ မီးပုၼ်ႈၽွၼ်း ဢၼ်ႁဵတ်းႁႂ်ႈၵူၼ်းတၢႆ ပဵၼ်ၵေႃႇပဵၼ်ၵွင် ၼႂ်းလွင်ႈတိုၵ်းတေႃး မိူဝ်ႈဝၼ်းတီႈ 07/10/2023။ လွင်ႈဢၼ်မၼ်းၸၢႆး လူႉတၢႆၵႂႃႇၼႆႉ တေၸၢင်ႈႁဵတ်းႁႂ်ႈၵူၼ်း ၸိူဝ်းၺႃးတီႉၺွပ်းပဵၼ်တူဝ်ယိူဝ်ႇ လွတ်ႈဢွၵ်ႇမႃးၶိုၼ်းလႄႈ ႁဵတ်းႁႂ်ႈထုင်ႉၵႃႊသႃႊ ပူၼ်ႉလွတ်ႈဢွၵ်ႇ တႂ်ႈႁႃႊမၢတ်ႉသ်လႄႈ ဢီႊရၢၼ်ႊ(Iran) ၵုမ်းၵမ် – ၼႆယဝ်ႉ။
ပၢင်ဢုပ်ႇၵုမ် လွင်ႈၵိုတ်းတိုၵ်း တီႈထုင်ႉၵႃႊသႃႊ ၶၢဝ်းတၢင်းပီပၢႆၼႆႉ ဢမ်ႇမီးလွင်ႈၶိုပ်ႈၼႃႈ ႁူၼ်လင်သင်။ ၾၢႆႇဢိတ်ႉသ်ရေႊတင်း ႁႃႊမၢတ်ႉသ်ၵေႃႈ ပႆႇမီးလွင်ႈတူင်ႉၼိုင်ႁဵတ်းသၢင်ႈသင် – ၼႆယဝ်ႉ။
Benjamin Netanyahu ၽွင်းလူင် မိူင်းဢိတ်ႉသ်ရေႊ လၢတ်ႈဝႃႈ Yahya Sinwar လူႉတၢႆၼႆႉ တေပဵၼ် လွင်ႈဢၼ်ၶွတ်ႇယွတ်ႈ ၸုမ်းႁႃႊမၢတ်ႉသ် ၽွင်းငမ်းတီႈၵႃႊသႃႊ။ ၸွမ်ၸိုင်ႈ မိူင်းဢမေႊရိၵၼ်ႊ ၵျူဝ်း ပၢႆႊတႅၼ်ႊ (Joe Biden) ၵေႃႈလၢတ်ႈဝႃႈ ပဵၼ်ဝၼ်းလီတွၼ်ႈတႃႇဢိတ်ႉသ်ရေႊ(Israel)၊ ပႃႊလႅတ်ႊသတၢႆႊ (Palestinian)၊ ဢမေႊရိၵၼ်ႊ (American) လႄႈ ၵူၼ်းၼႂ်းလုမ်ႈၾႃႉ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ