တႄႇဢဝ် ဝၼ်းတီႈ 1 လိူၼ်ၵျႅၼ်ႊၼိဝ်ႊရီႊ ပီ 2024 တေႃႇထိုင် ဝၼ်းတီႈ 16 လိူၼ်ဢွၵ်ႊထူဝ်ႊပိူဝ်ႊၼႆႉ ၼႂ်းၶၢဝ်းတၢင်း 10 လိူၼ်ပၢႆ ၼၢင်းယိင်းၼႂ်းမိူင်းမၢၼ်ႈ ပတ်းပိုၼ်ႉ ၸိူဝ်းၺႃးၶႃႈတၢႆ ယွၼ်ႉသိုၵ်းမၢၼ်ႈ မီး 226 ၵေႃႉ ၼႆယဝ်ႉ။

ၸုမ်းၸွႆႈထႅမ် ၵူၼ်းတူၵ်းၶွၵ်ႈ ၵၢၼ်မိူင်း AAPP ပိုၼ်ၽၢဝ်ႇဢွၵ်ႇဝႆႉ – ၼႂ်းၼၼ်ႉ ၼၢင်းယိင်း ၸိူဝ်းဢႃယု ပႆႇတဵမ် 18 ပီ မီး 30 ၵေႃႉ။ ၼၢင်းယိင်းၸိူဝ်း လူႉတၢႆ ၼမ်လိူဝ်ပိူၼ်ႈသုတ်း ပဵၼ်ၼႂ်းတိူင်းၸႄႈၵႅင်း မီး 63 ၵေႃႉ၊ မိူင်းရၶႅင်ႇ ၼမ်သုတ်းထီႉသွင် မီး 46 ၵေႃႉ- ဝႃႈၼႆ။

ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်ပွႆႇမၢၵ်ႇ ၼႂ်းပိုၼ်ႉတီႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တင်း PDF ၵုမ်းၵမ် ဝႆႉၼၼ်ႉ ၶိူဝ်းယႂ်းလႄႈ ၵူၼ်းမိူင်း ႁူမ်ႈပႃးၼၢင်းယိင်း ၸိူဝ်းဢမ်ႇၸႂ်ႈပဝ်ႉမၢႆၵၢၼ်သိုၵ်းၵေႃႈ လႆႈလူႉတၢႆ ၼမ်ၶိုၼ်ႈမႃး။

ၸွမ်းၼင်ႇ သဵၼ်ႈမၢႆ ၸုမ်း AAPP ၶဝ် ၵဵပ်းလႆႈဝႆႉတေႃႇထိုင် ဝၼ်းတီႈ 16 လိူၼ်ဢွၵ်ႊထူဝ်ႊပိူဝ်ႊၼႆႉ ၼႂ်း ၶၢဝ်းတၢင်း သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ၵူၼ်းမိူင်း ၸိူဝ်းလူႉတၢႆ ယွၼ်ႉသိုၵ်းမၢၼ်ႈတင်း  ၸုမ်းဢၼ်ယူႇၾၢႆႇတႂ်ႈသိုၵ်းမၢၼ်ႈ ၸိူဝ်းၼၼ်ႉ မီးမွၵ်ႈ 6 ႁဵင်ၵေႃႉ (5,851) ၵေႃႉ ၼႂ်းၼၼ်ႉ ပႃးၼၢင်းယိင်း 1,236 ၵေႃႉ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။