မိူဝ်ႈၼႆႉ ဝၼ်းတီႈ 18/10/2024 ယၢမ်းၵၢင်ၼႂ်ၸဝ်ႉ 1 မူင်း ၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇထႅင်ႈ တီႈဝဵင်း ၼွင်ၶဵဝ် ၸိုင်ႈတႆးပွတ်းႁွင်ႇ မီးၵူၼ်းမၢတ်ႇၸဵပ်း ႁိူၼ်းယေးၵေႃႈ လူႉၵွႆ။

ၶမ်ႈၶိုၼ်း ဝၼ်းဢွၵ်ႇဝႃႇ 17/10/2024 ယၢမ်းၵၢင်ၶမ်ႈ 10 မူင်း တေႃႇထိုင်မိူဝ်ႈၼႆႉ ၵၢင်ၼႂ်ၸဝ်ႉ သိုၵ်းမၢၼ်ႈ မႃးပွႆႇမၢၵ်ႇ 7 လုၵ်ႈ၊ တူၵ်းတႅၵ်ႇ တီႈၵဵတ်ႉ/ လၢၼ်ႇ တၢင်းၶဝ်ႈဝဵင်း၊ လုမ်းၵွၼ်းၸႄႈဝဵင်း ႁူင်းပလိၵ်ႈလႄႈ ႁၢၼ်ႉတၢင်းၵိၼ်၊ ႁိူၼ်းယေး လူႉၵွႆထႅင်ႈ တင်းၼမ်။

ၵူၼ်းမိူင်း ဝဵင်းၼွင်ၶဵဝ် လၢတ်ႈၽူႈတွႆႇႁွၵ်ႈဝႃႈ – “မိူဝ်ႈၶမ်ႈဝႃး ၶမ်ႈဝၼ်းဢွၵ်ႇဝႃႇၼၼ်ႉ သိုၵ်းတဢၢင်း ၶဝ်ႁဵတ်းပွႆး၊ သဵင်ႁွင်ႉၽဵင်းၵႂၢမ်းၶဝ်ပေႃးဢူၼ်မေႃးလူင်ဝႆႉတေႃႇထိုင် 10 မူင်း။ ၽိူဝ်ႇသိုၵ်းမၢၼ်ႈမႃးပွႆႇမၢၵ်ႇ ၸင်ႇဢွၼ်ၵၼ်ပၢႆႈ။ သဵင်ရူတ်ႉသဵင်ၵႃး သဵင်ႁွင်ႉႁႆႈ သဵင်ပၢႆႈ ပေႃးမေႃးပၼ်းလူင်ဝႆႉ။ ဢၼ်ၶဝ်မႃးပွႆႇမၢၵ်ႇ ယၢမ်းၵၢင်ၶိုၼ်း 1 မူင်းၼၼ်ႉတႄႉ မႃးတူၵ်းတီႈႁိမ်းၸမ် ႁိူၼ်းၶႃႈႁဝ်းၼႆႉ။ ပဵၼ်ဢၼ်လီၵူဝ် တူၵ်းၸႂ် တႄႉတႄႉ”- ဝႃႈၼႆ။

ၽွင်းၶိူင်ႈမိၼ်သိုၵ်းမၢၼ်ႈ မႃးပွႆႇမၢၵ်ႇၼၼ်ႉ ၼႂ်းၸႄႈဝဵင်းၼွင်ၶဵဝ် ဢမ်ႇမီးပၢင်တိုၵ်းသိုၵ်းသိူဝ်သင်။ လႅပ်ႈတေမီးၵူၼ်းပၼ်ၶၢဝ်ႇ သူင်ႇၶၢဝ်ႇၼႂ်းပိုၼ်ႉတီႈ ပၼ်သိုၵ်းမၢၼ်ႈလႄႈ ၸင်ႇမႃးပွႆႇမၢၵ်ႇၵူၺ်း – ၵူၼ်းပိုၼ်ႉ တီႈလၢတ်ႈၼင်ႇၼႆ။

တီႈဝဵင်းၼွင်ၶဵဝ်ၼႆႉ သိုၵ်း TNLA – PDF လႄႈ သိုၵ်းမၢၼ်ႈ ပိုတ်းယိုဝ်း တိုၵ်းတေႃးၵၼ် မႃးတင်းႁိုင်။ ထိုင်မႃးဝၼ်းတီႈ 10/07/2024 ၼႆႉ သိုၵ်းတဢၢင်း ပိုၼ်ၽၢဝ်ႇဝႃႈ ယိုတ်းၵုမ်းလႆႈ ဝဵင်းၼွင်ၶဵဝ်ယဝ်ႉ ဝႃႈၼႆသေတႃႉ – တီႈဝၢၼ်ႈတွင်းၶမ်း ဢၼ်ယၢၼ်ၵႆၵၼ် တၢင်းဝဵင်းၼွင်ၶဵဝ်မွၵ်ႈ 20 လၵ်းၼၼ်ႉ ပၢင်တိုၵ်းသိုပ်ႇပဵၼ် တေႃႇထိုင်ဝၼ်းမိူဝ်ႈၼႆႉ။

 မိူဝ်ႈဝၼ်းတီႈ 16/10/2024 ၼႆႉၵေႃႈ သိုၵ်းမၢၼ်ႈပွႆႇမၢၵ်ႇသႂ်ႇ ဢွင်ႈတီႈပိုၼ်ၽႄႈၾႆးၾႃႉ ဢၼ်မီးႁိမ်းဝဵင်း လႃႈသဵဝ်ႈ သဝ်ၾႆး၊ သၢႆၾႆးၶၢတ်ႇ ႁိူၼ်းယေးလူ့ၵွႆ တင်းၼမ် သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇဝႆႉၼင်ႇ ၼႆ။  

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)