ဝၼ်းတီႈ 17/10/2024 ယၢမ်းၵၢင်ၶမ်ႈ 8 မူင်းၼႆႉ ၾႆးမႆႈ ႁွင်ႈသဝ်း တီႈလိုဝ်ႈ ၶွင်ၽူႈႁၢပ်ႇၵၢၼ် ၼႂ်းႁူင်းယႃၵူၼ်းမိူင်း ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ တႃႇႁွင်ႈသဝ်း 3 ႁွင်ႈ မီးလွင်ႈလူႉသုမ်း ဢမ်ႇယွမ်း 30 သႅၼ်ပျႃး။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈ – “မိူဝ်ႈဝႃးၼႆႉ ပဵၼ်ဝၼ်းဢွၵ်ႇဝႃႇသႃ။ ၸိူဝ်းဢမ်ႇမီး ပုၼ်ႈၽွၼ်း ၵေႃႈ ပိူၼ်ႈဢွၼ်ၵၼ် ဢွၵ်ႇၵႂႃႇတၢင်းၼွၵ်ႈ။ ၸိူဝ်းမီးပုၼ်ႈၽွၼ်း ၼႂ်းႁူင်းယႃၵေႃႈ ၶဝ်ႈႁဵတ်းၵၢၼ်။ ၼႂ်းႁွင်ႈၶဝ်ၼၼ်ႉ တင်ႈဝႆႉၶႆႇၵႆႇၼႂ်းမေႃႈလႅင် မိူဝ်ႈၽွင်းၼၼ်ႉ ၾႆးၾႃႉသမ်ႉမွတ်ႇဝႆႉလႄႈ ၽိူဝ်ႇၾႆး ၾႃႉမႃးၶိုၼ်းၵေႃႈ မွၵ်ႈယၢမ်း 8 မူင်း ၼႆႉ ႁၼ်ၾႆးမႆႈယဝ်ႉ”- ဝႃႈၼႆ။

သိုပ်ႇလၢတ်ႈဝႃႈ – “ၾႆးၼႆႉ တႄႇမႆႈမႃးတီႈမေႃႈၼၼ်ႉသေ ဢၼ်လူႉသုမ်းၼႆႉ ၶူဝ်းၶွင်၊ ၽႃႈၽႅၼ်ႇ၊ ၵၢၵ်ႇမေႃႈၸေႃႉဝၢၼ်ႇ ၸိူဝ်းၼႆႉ တႃႇသၢမ်မုင်ႉႁေႃႁိူၼ်းဢေႃႈ။ ပေႃးၼပ်ႉငိုၼ်း မိူဝ်ႈလဵဝ်တႄႉ ဢမ်ႇယွမ်း 30 သႅၼ်ပျႃး”- ဝႃႈၼႆ။

ဢၼ်ၾႆးမႆႈ ပွၵ်ႈၼႆႉ ယူႇတီႈၵူၼ်းမိူင်းတႄႉ ႁၼ်ထိုင်ဝႃႈ ပဵၼ်ယွၼ်ႉၾႆးၾႃႉဢမ်ႇမႃးမၢၼ်ႇ။ ၶၢဝ်းယၢမ်း ဢၼ်ႁွင်ႈၵၢၼ် ၾၢႆႇၾႆးၾႃႉ ပိုၼ်ၽၢဝ်ႇဝႆႉၼၼ်ႉၵေႃႈ ၾႆးမႃးဢမ်ႇမႅၼ်ႈၸွမ်းၶဝ်းယၢမ်းမၼ်း ၼႆယဝ်။

“ၾၢႆႇႁွင်ႈၵၢၼ် ၾႆးၾႃႉၵေႃႈ ၼိုင်ႈလိူၼ်ၼိုင်ႈလိူၼ်ၼႆႉ ၶဝ်ပိုၼ်ၽၢဝ်ႇဢွၵ်ႇမႃး ၶၢဝ်းယၢမ်းၾႆးၾႃႉ တေမႃးၶၢဝ်းလႂ် ၸိူဝ်းၼႆႉ။ ၵူၺ်းၵႃႈ ၸွမ်းၼင်ႇ ပိူင်ၶၢဝ်းယၢမ်းၶဝ်ၼၼ်ႉတႄႉ မၼ်းဢမ်ႇပေႃးတႅတ်ႈတေႃးလီ။ ႁႅင်းၾႆးမၼ်းတႄႉ ပဵၼ်ႁႅင်းၾႆးတီႈၼမ်ႉမၢဝ်း(သူၺ်ႇလီႇ) ၼၼ်ႉသေ ပၼ်မႃး”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 06/10/2024 ၼၼ်ႉၵေႃႈ ယွၼ်ႉၾႆးၾႃႉသျွတ်ႉသေ ၾႆးမႆႈႁိူၼ်းယေးၵူၼ်းမိူင်း ၼႂ်းဝဵင်းမူႇ ၸေႊ တီႈပွၵ်ႉၼိူဝ်။ ပွၵ်ႈၼၼ်ႉ ၾႆးမႆႈၵႂႃႇ ဢမ်ႇယွမ်း 2 လင်။ ယွၼ်ႉၼၼ် သင်ၾႆးၾႃႉတေမွတ်ႇ/ မႃး ဢမ်ႇမႅၼ်ႈ ၸွမ်းၶၢဝ်းယၢမ်းၼႆၸိုင် ၵူၼ်းမိူင်း တေၸၢင်ႈလႆႈမႆႈၸႂ်လႄႈ ထူပ်းလွင်ႈယၢပ်ႇ တႃႇတေတူမ်ႈႁုင်မိုဝ်ႉ ၸိူဝ်းၼႆႉ။