ပျီႇတူႉၸိတ့်ပဢူဝ်း ဢၼ်တူင်ႉၼိုင်ၼႂ်းၸႄႈဝဵင်းတူၼ်ႈတီး ၼၼ်ႉ တတ်းလွၵ်းလိၼ်ၵူၼ်းဝၢၼ်ႈၼႂ်းထုင်ႉတၢင်းၸၢၼ်းဝဵင်းသေ ပိုၼ်ၽၢဝ်ႇၶၢႆ ၵူၼ်းမိူင်းဢမ်ႇပေႃးၸႂ်။
ပျီႇတူႉၸိတ်ႉၸိူဝ်းၼႆႉလၢတ်ႈတီႈၵူၼ်းဝၢၼ်ႈပေႃးမူ (ဝၢၼ်ႈပဢူဝ်း) ဝႃႈ တေသိူဝ်ႇတၢင်းပၼ်၊ တေတေႃႇသၢႆၾႆးၾႃႉၶဝ်ႈဝၢၼ်ႈပၼ်ၼႆသေ ယိုတ်းဝႆႉတီႈလိၼ်ၵူၼ်းမိူင်းၸဵမ်မိူဝ်ႈပီၵၢႆ။ ယၢမ်းလဵဝ် ၼႂ်းပီၼႆႉ မီးၵူၼ်းမႃးထၢမ်သိုဝ်ႉၶိူဝ်းယႂ်းလႄႈ လွၵ်းလိၼ်ဢၼ်ယိုတ်းဝႆႉတီႈၵူၼ်းမိူင်းၼၼ်ႉ ပျီႇတူႉၸိတ်း တတ်းလွၵ်းသေၶိုၼ်းၶၢႆယူႇ – ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈၼင်ႇၼႆ။
“ပဵၼ်ပျီႇတူႉၸိတ်ႉ PNO ဢၼ်တူင်ႉၼိုင်ယူႇၼႂ်းပိုၼ်ႉတီႈၼႆႉၶႃႈဢေႃႈ။ ၶဝ်လၢတ်ႈၵူၼ်းဝၢၼ်ႈဝႃႈ -ပေႃးၶႂ်ႈလႆႈသၢႆၾႆးၶဝ်ႈဝၢၼ်ႈ တေလႆႈပၼ်ငိုၼ်းၼိုင်ႈႁိူၼ်း 6 သႅၼ်ပျႃးၼႆလူးၵွၼ်ႇ ။တေႃႇထိုင်တလဵဝ် သၢႆၾႆးၵေႃႈဢမ်ႇမႃး ။ လိၼ်ဢၼ်ၶဝ်ယိုတ်းဝႆႉၼၼ်ႉၵေႃႈတတ်းလွၵ်းသေၶၢႆယူႇယဝ်ႉ”- ဝႃႈၼႆ။
တီႈလိၼ်ဢၼ်သိုၵ်းပျီႇတူႉၸိတ်ႉပဢူဝ်း ယိုတ်းၵႂႃႇၼၼ်ႉ ပဵၼ်တီႈလိၼ်ၽုၵ်ႇသွမ်ႈႁႃၵိၼ်လဵင်ႉတွင်ႉၵူၼ်းဝၢၼ်ႈ။ ဢၼ်ၺႃးယိုတ်းၵႂႃႇၼၼ်ႉ ၼပ်ႉႁူဝ်ႁဵင်ဢေႊၶိူဝ်ႊ။ယၢမ်းလဵဝ်ၵူၼ်းဝၢၼ်ႈဢမ်ႇမီးတီႈၽုၵ်ႇသွမ်ႈလႄႈပဵၼ်ဢၼ်ယၢပ်ႇၽိုတ်ႇဝႆႉ။ ဢမ်ႇၸၢင်ႈၵႂႃႇတိူင်ႇလၢတ်ႈတီႈၽႂ် ပဵၼ်ဢၼ်ယၢပ်ႇၸႂ်- ၵူၼ်းဝၢၼ်ႈၽူႈၸၢႆးၼၼ်ႉသိုပ်ႇလၢတ်ႈတီႈၽူႈတွႆႇႁွၵ်ႈၼင်ႇၼႆ။
လွင်ႈၼႆႉၽူႈတွႆႇႁွၵ်ႈလႆႈၶတ်းၸႂ်ၵပ်းသိုပ်ႇၸူးတၢင်း PNO ယူႇၵေႃႈၵပ်းသိုပ်ႇဢမ်ႇလႆႈ။
ၵူၼ်းပိုၼ့်တီႈလၢတ်ႈထႅင်ႈဝႃႈ-“ ပေႃးပဵၼ်တီႈလိၼ်ဢၼ်ၶဝ်ယိုတ်းဝႆ့ၼၼ့် ၶဝ်မႃးႁဵတ်းႁူဝ့်ဝႆႉၶၢတ်ႈဝႆႉ ။ ၵူၼ်းဝၢၼ်ႈၵေႃႈ ဢမ်ႇၸၢင်ႈလၢတ်ႈသင် ၊ ၶဝ်မီး ၵွင်ႈၵၢင်ႇ လူး ၊ မၢႆမီႈပၵ်းပိူင်ၵေႃႈမီးၼႂ်းသူပ်းၶဝ်မူတ်း လႆႈၵူမ်ႈႁူဝ်ထွမ်ၵူၺ်း ၊ တလဵဝ်ၶဝ်ၶၢႆ တီႈလိၼ် ဢၼ်ၶဝ်လွမ်ႉႁူဝ်ႉဝႆႉၸိူဝ်းၼၼ်ႉ။ မီးၵူၼ်းမႃးသိုဝ်ႉဢေႃႈ” – ဝႃႈၼႆ ။
ၵူၼ်း ဝၢၼ်ႈပေႃးမူႇၼႆ့ ၽုၵ်ႇသွမ်ႈႁဵတ်းၵိၼ်ႁႃလဵင့်တွင့်ပဵၼ်ပိူင်လူင်။ ဢၼ် ၽုၵ်ႇသွမ်ႈၼမ်သုတ်းတႄ့ ပဵၼ် ၶဝ်ႈၵၢပ်ႇလႄႈ ၶဝ်ႈ ဝႃႈၼႆ ။
မိူၼ်ၼႆၼင်ႇၵဝ်ႇ မိူဝ်ႈပီ 2023 တီႈဝဵင်းသီႇသႅင်ႇၵေႃႈ ပျီႇတူ့ၸိတ့်ပဢူဝ်း PNO ယိုတ်းလိၼ် ၵူၼ်းမိူင်းလႄႈ ပဵၼ်ပၼ်ႁႃၵၼ် ။ ၽွင်းၼၼ်ႉၵေႃႈ ၾၢႆႇတၢင်းပျီႇတူႉၸိတ်ႉ လွၵ်ႇငိုတ်ႈသေ ဢဝ်ငိုၼ်းဢိတ်းဢွတ်းယဵတ်ႈပၼ်ၵူၼ်းဝၢၼ်ႈသေ ၵူၼ်းဝၢၼ်ႈဢမ်ႇၸၢင်ႈလၢတ်ႈသင်။
ပူၼ်ႉမႃးသွင်လိူၼ် ၽွင်း PNO ၸတ်းႁဵတ်းပွႆးလူင်းပၢင်သွၼ်ၵၢၼ်သိုၵ်းၼၼ်ႉ ဢဝ်ဢဵၼ်ႁႅင်းၵူၼ်းၸၢႆးၼပ်ႉႁူဝ်မိုၼ်ႇမႃးၼႄ။ ၽွင်းၼၼ်ႉ ၵူၼ်းပိုၼ်ႉတီႈလၢတ်ႈဝႃႈ ၵဵပ်းငိုၼ်းတီႈၵူၼ်းမိူင်း ၼိုင်ႈလင်ၶႃးႁိူၼ်း ငိုၼ်း 5 မိုၼ်ႇပျႃး။ ၶူဝ်းတႃႇၼုင်ႈတီႈပၢင်လူင်းပၢင်သွၼ်ၵၢၼ်သိုၵ်းၼၼ်ႉၵေႃႈလႆႈသိုဝ်ႉဢဝ်ႁင်းၵူၺ်းဝႃႈၼႆ။
တႅမ်ႈ- ယိင်းသဵဝ်ႈၶၢဝ် ( ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ