ၶၢဝ်းတၢင်းပၢင်ယၼ်ႇသိုၵ်း1027 ပွတ်းႁွင်ႇၼႆႉ သိုၵ်းတဢၢင်း TNLA ပိုၼ်ၽၢဝ်ႇ ၵုမ်းလႆႈလၢႆဝဵင်း ၼႂ်းၸိုင်ႈတႆးပွတ်းႁွင်ႇသေ ၶွတ်ႇၽွတ်ႈၾၢႆႇၽွင်းငမ်းၵူႈလွင်ႈလွင်ႈမႃး။ ၼႂ်းၼၼ်ႉ ၾၢႆႇၵဵပ်းၶွၼ်ႇ တႂ်ႈသိုၵ်းတဢၢင်း လူင်းၵဵပ်းၶွၼ်ႇၼႂ်းဝၢၼ်ႈၼႂ်းဝဵင်း ဢၼ်ၶဝ်ၵုမ်းဝႆႉ ၸိူဝ်းၼၼ်ႉ။

မိူၼ်ၼင်ႇ ပွတ်းတၢင်း မိူင်းမိတ်ႈ – မိူင်းၵုတ်ႈ ၸိူဝ်းၼႆႉၵေႃႈ သိုၵ်းတဢၢင်း လူင်းၵဵပ်းၶွၼ်ႇ ၵူၼ်းၶုတ်းၶမ်း ႁူမ်ႈၵၼ်ၼိုင်ႈပီလႂ် ၶမ်း 10 ၸွႆႉ။ ၵူၼ်းလူင်းတိုၼ်း ၼႂ်းၵၢၼ်ၶုတ်းၶမ်း ဢၼ်ဢမ်ႇပွင်ပဵၼ်လႆႈ ႁူမ်ႈပၼ်ၶွၼ်ႇ ၸိူဝ်းၼႆႉၵေႃႈ ႁႃတၢင်းပၢႆႈဢွၵ်ႇမိူင်းၼမ် ၼႆယဝ်ႉ။

ၼႂ်းလိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼႆႉ သိုၵ်းတဢၢင်း TNLA လူင်းၵဵပ်းၶွၼ်ႇ ၵူၼ်းၸိူဝ်းၶုတ်းၶမ်းတီႈ မိူင်းၵုတ်ႈ၊ မိူင်းမိတ်ႈ ၸိူဝ်းၼၼ်ႉ ၼိုင်ႈပီလႂ် တၵ်းလႆႈပၼ်ၶမ်း 10 ၸွႆႉ ၼႆလႄႈ ၵူၼ်းၸိူဝ်းမီးဢွင်ႈ တီႈၶုတ်းၶမ်းဝႆႉ ၸိူဝ်းၼၼ်ႉ ဢွၼ်ၵၼ်ဝႄႈပၢႆႈဝႆႉၼမ် ဝႃႈၼႆ။

ဝဵင်းမိူင်းၵုတ်ႈၼႆႉ သိုၵ်းတဢၢင်း TNLA လႄႈ PDF ႁူမ်ႈၵၼ် လေႃႇတိုၵ်းသိုၵ်းမၢၼ်ႈသေ ၵုမ်းလႆႈ ၼႂ်းဝၼ်းတီႈ 24/07/2024 ။ ဝၢႆးၼၼ်ႉၵေႃႈ ဢဝ်ႁႅင်းၵူၼ်း 13 ၵေႃႉသေ ၶွတ်ႇၽွတ်ႈၸုမ်းၽွင်းငမ်းဝဵင်း မိူင်းၵုတ်ႈဝႆႉ။

ဝၢႆးသိုၵ်းတဢၢင်း ၵုမ်းလႆႈမိူင်းၵုတ်ႈလႄႈ မိူင်းမိတ်ႈမႃးၼႆႉ ၵူၼ်းမိူင်း ၺႃးၾၢႆႇၽွင်းငမ်း ဢၼ်ယူႇတႂ်ႈ သိုၵ်းတဢၢင်း လူင်းၵဵပ်းၶွၼ်ႇႁိူၼ်းယေးရူတ်ႉၵႃး။ ပေႃးပဵၼ်ရူတ်ႉၶိူင်ႈ ၼိုင်ႈလမ်းလႆႈပၼ် 5 မိုၼ်ႇပျႃး၊ ႁိူၼ်းၼိုင်ႈလင် 2 သႅၼ်ပျႃး၊ ႁၢၼ်ႉၶၢႆပူႉ 35,000 ပျႃး၊ ႁၢၼ်ႉၶၢႆၵုၼ်ႇတႄႉ ဢိင်ၼိူဝ် လဵၵ်ႉယႂ်ႇသေ 3 သႅၼ်ၶိုၼ်ႈၼိူဝ် ထိုင် 10 သႅၼ်ပျႃး – ၵူၼ်းပိုၼ်းတီႈ လၢတ်ႈၽူႈတွႆႇႁွၵ်ႈ ၼႂ်းလိူၼ်သႅပ်ႊထႅမ်ႊပိူဝ်ႊ ၼၼ်ႉၼင်ႇၼႆ။

လိူဝ်သေ ၵဵပ်းၶွၼ်ႇႁိူၼ်းယေးရူတ်ႉၵႃးၵူၼ်းမိူင်းယဝ်ႉ ၵူၼ်းၸိူဝ်းလူင်းတိုၼ်း ႁဵတ်းၵၢၼ်ၶုတ်းၶမ်း ၼႂ်းၶွပ်ႇလႅၼ်လိၼ် မိူင်းမိတ်ႈ – မိူင်းၵုတ်ႈ ၸိူဝ်းၼႆႉၵေႃႈ ၺႃးသိုၵ်းတဢၢင်း လူင်းၵဵပ်းၶွၼ်ႇ ၼိုင်ႈပီလႂ် ၶမ်း 10 ၸွႆႉ။ ၸဝ်ႈပၢႆးမၢၵ်ႈမီး ၸိူဝ်းၶုတ်းၶမ်းၶဝ် ၼပ်ႉသွၼ်ႇၵၼ်သေ တူၵ်းၼိုင်ႈၸဝ်ႈလႂ် 10 ၵျၢပ်ႈ။ ၼႂ်းၵႄႈၼၼ်ႉ သင်ဝႃႈ မီးလုၵ်ႈၼွင်ႉ ၵူၼ်း ၶုတ်းၶမ်းဝႆႉၵေႃႈ ႁႂ်ႈတၢင်ႇသဵၼ်ႈၸိုဝ်ႈသၢႆမၢႆဝႆႉ။ ၵိၼ်းၸႂ် လၢႆလွင်ႈလႄႈ ၸဝ်ႈပၢႆးမၢၵ်ႈမီးၶုတ်းၶမ်း ၵမ်ႈၼမ် ပၢႆႈသွၼ်ႈဝႆႉၼႆ ၽူႈၸမ်ၸႂ်ၵူၼ်းၶုတ်းၶမ်း မိူင်း မိတ်ႈ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“မၢင်ၸိူဝ်း ဢမ်ႇပၼ်ၶွၼ်ႇလႆႈသေ ပၢႆႈသွၼ်ႈၵႂႃႇတၢင်းဝဵင်းလိူဝ်ႇပုၼ်ႉဢေႃႈ။ ၾၢႆႇ TNLA တႄႉ ယိုတ်ႈၶၢဝ်းယၢမ်းပၼ် တႃႇၵူၼ်းပႆႇသၢင်းၶွၼ်ႇလႆႈ ၸိူဝ်းၼၼ်ႉ။ ဝႆႉပၼ်ၶၢဝ်းယၢမ်း ထိုင်လိူၼ်ၼႆႉသဵင်ႈ ၼႆဢေႃႈ။ ပေႃးဢမ်ႇပၼ်လႆႈ ၼင်ႇ ၶဝ်ယွၼ်းၵေႃႈ လူဝ်ႇလႆႈဢဝ်ၶိူင်ႈၸၢၵ်ႈ ၽႂ်မၼ်းသေ ဢွၵ်ႇပိုၼ်ႉတီႈၶုတ်းၶမ်း ၸိူဝ်းၼၼ်ႉၵူၺ်းယဝ်ႉ”- ဝႃႈၼႆ။

ၼႂ်းၶၢဝ်းတၢင်း ပၢင်တိုၵ်းသိုၵ်းသိူဝ်ပၼ်းၼၼ်ႈ ၵၢၼ်ငၢၼ်းၶုတ်းၶမ်း ၸိူဝ်းၼႆႉ ဢမ်ႇပၼ်ႇလႆႈလီ၊ ထိုင်တီႈဝႃႈ တူၵ်း ၼိုင်ႈၸဝ်ႈလႂ် တေလႆႈပၼ်ၶွၼ်ႇၶမ်း 10 ၵျၢပ်ႈ ၵူၺ်းဝႃႈၼႆသေတႃႉၵေႃႈ ၽႂ်ဢမ်ႇလူမ် ၸႂ်ပၼ်လႆႈ။ ပေႃႈလဵင်ႉၵမ်ႈၽွင်ႈ ၵမ်ႈၼမ်ဢွၼ်ၵၼ်ပၢႆႈ – ပေႃႈလဵင်ႉၶုတ်းၶမ်း ၵေႃႉၼိုင်ႈ လၢတ်ႈၼင်ႇၼႆ။

မိူၼ်ၼင်ႇ တၢင်းဝဵင်းမၢၼ်ႈပဵင်း ႁိမ်းမိူင်းမိတ်ႈၼၼ်ႉၵေႃႈ သိုၵ်းၶၢင် KIA ၵုမ်းသေ ၵဵပ်းၶွၼ်ႇယူႇသေတႃႉ ဢမ်ႇၼမ်ပဵင်းသိုၵ်းတဢၢင်း TNLA ၵဵပ်း။ တီႈၼိုင်ႈလႄႈ တီႈၼိုင်ႈ သိုၵ်းၸုမ်းၼိုင်ႈလႄႈၸုမ်းၼိုင်ႈ ၵဵပ်းၶွၼ်ႇ ဢမ်ႇမိူၼ်ၵၼ်။ ၵဵဝ်ႇလူၺ်ႈလွင်ႈ သိုၵ်းၵဵပ်းၶွၼ်ႇၸိူဝ်းၼႆႉသေ ၵူၼ်းဝၢၼ်ႈၸိူဝ်းယူႇ ၼႂ်းၵႄႈမိူင်းမိတ်ႈ – မၢၼ်ႈပဵင်း ၸိူဝ်းၼႆႉ ၽွမ်ႉၵၼ်သၢၼ်ၶတ်းၼႄၵၢင်ၸႂ် ၼႂ်းလိူၼ်ၵျုၼ်ႊၼၼ်ႉယဝ်ႉ ၵမ်းၼိုင်ႈၼႆ ၵူၼ်းပိုၼ်ႉတီႈလၢတ်ႈ။

ၵူၼ်းလူင်းတိုၼ်း ႁဵတ်းၵၢၼ်ၶုတ်းၶမ်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ – “တီႈတႄႉမၼ်း ပေႃးမီးၼမ်ႉမၼ်းၸၢၵ်ႈ (ၼမ်ႉမၼ်းတီႊသႄႊ) ၵုမ်ႇထူၼ်ႈတႄႉ ၵၢၼ်ၶုတ်းၶမ်း တေပၼ်ႇလႆႈလီယူႇ။ တႃႇပၼ်ၶွၼ်ႇၵေႃႈ တေႁႃငၢႆႈ။ မိူဝ်ႈလဵဝ် ၼႂ်းမိူင်းတႆးပွတ်းႁွင်ႇၼႆႉ ၼမ်ႉမၼ်းၸၢၵ်ႈ ဢမ်ႇလႆႈငၢႆႈမိူၼ် မိူဝ်ႈဢွၼ်တၢင်း။ ပေႃးမီးၵေႃႈ ပဵၼ်ၼမ်ႉမၼ်း ဢၼ်ၶၢႆ ဢမ်ႇပဵၼ်တၢင်းၵၢၼ်လႄႈ ၵႃႈယႂ်ႇၼႃႇ”- ဝႃႈ ၼႆ။

ၵဵဝ်ႇလူၺ်ႈလွင်ႈ သိုၵ်းတဢၢင်း TNLA ၵဵပ်းၶွၼ်ႇၼႆႉသေ ၸုမ်းၶၢဝ်ႇၽူႈတွႆႇႁွၵ်ႈ သူင်ႇလိၵ်ႈတိတ်း တေႃႇၵပ်းသိုပ်ႇၸူး လူၺ်းယေႇဢူး ၽူႈၶၢၼ်ပၢၵ်ႇ TNLA ယူႇသေတႃႉ ဢမ်ႇႁပ်ႉသၢႆတွပ်ႇသင်ပၼ်။

လိူဝ်သေ ၸဝ်ႈပၢႆးမၢၵ်ႈမီး လူင်းတိုၼ်းၶုတ်းၶမ်းၶဝ် ၺႃးၵဵပ်းၶွၼ်ႇယဝ်ႉ မိူၼ်ၼင်ႇ ၵူၼ်းသေးၶမ်း/ ၶိုင်ၶမ်း ၸိူဝ်းၼႆႉ ၵေႃႈ ၺႃးသိုၵ်းတဢၢင်း TNLA ၵဵပ်းၶွၼ်ႇၼင်ႇၵဝ်ႇ။ ယၢပ်ႇၽိုတ်ႇလၢႆလွင်ႈသေ လႆႈ ၵိုတ်းယင်ႉၵၢၼ်ငၢၼ်းဝႆႉၼႆ – ၵူၼ်းပိုၼ်ႉတီႈလၢတ်ႈၼင်ႇၼႆ။