ပၢင်တိုၵ်း တီႈဝဵင်းသီႇပေႃႉၼႆႉ ယူႇတီႈ တပ်ႉသိုၵ်းတဢၢင်း TNLA လႆႈၸႂ်ႉၶၢဝ်းယၢမ်း 2 လိူၼ်ပၢႆသေ ယိုတ်းၵုမ်းလႆႈဝႆႉ တင်းဝဵင်းယဝ်ႉ – ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်းၵၢၼ်ၼင်ႇၼႆ။  

တႄႇဢဝ် ဝၼ်းတီႈ 20/07/2024 ၼၼ်ႉမႃး ႁၢၼ်ႉတေႃႇထိုင် 13/10/2024 ၼႆႉ တပ်ႉသိုၵ်းတဢၢင်း TNLA တင်း သိုၵ်းမၢၼ်ႈ ယိုတ်းမိူင်း ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇသေ ယူႇတီႈ တပ်ႉသိုၵ်း TNLA ယိုတ်းၵုမ်းလႆႈ တပ်ႉသိုၵ်းမၢၼ်ႈၶမယ 503 ၊ ၶမယ 504 လႄႈ ၶလယ 23 ႁူမ်ႈလူၺ်ႈ ႁူင်းပလိၵ်ႈမၢၼ်ႈလႄႈ ႁွင်ႈၵၢၼ်ၾၢႆႇၽွင်းငမ်း ၵူႈႁွင်ႈၵၢၼ် ၸိူဝ်းၼႆႉ တင်းမူတ်းယဝ်ႉ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ တပ်ႉသိုၵ်းတဢၢင်းၼၼ်ႉ ဢွၵ်ႇဝႆႉဝႃႈ – “ပၢင်တိုၵ်း တီႈဝဵင်းသီႇပေႃႉၼႆႉ ယူႇတီႈ သိုၵ်းမၢၼ်ႈ ၸႂ်ႉၶိူင်ႈမိၼ် Jet Fighter ယိုဝ်းၸွႆႈ (105) ၵမ်း၊ ၶိူင်ႈမိၼ် Y 12 (167) ၵမ်း၊ ၵွင်ႈလူင်ယိုဝ်းၸွႆႈ 1,893 ၵမ်း။ ယဝ်ႉ ၵေႃႈ မၢၵ်ႇလူင်ထႅင်ႈလၢႆလၢႆသႅၼ်း။ လိူဝ်ၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ် တေႃႇသူင်ႇမၢၵ်ႇမိုဝ်ႈ ၸိုၼ်းယၢမ်းပၼ်သမ်ႉ Y 12 (79) ၵမ်း၊ Y8 (2) ၊ Mi17 (5) ၵမ်း။ မၢၵ်ႇမိုဝ်ႈၸိုၼ်းယၢမ်း ဢၼ်မႃးသူင်ႇပၼ် သမ်ႉ 440 ထူင်”- ဝႃႈၼႆ။

ယွၼ်ႉပၢင်တိုၵ်းၼႆႉသေ ဢၼ်ၵူၼ်းမိူင်းၺႃးၸၢၵ်ႇလူႉတၢႆၸွမ်းသမ်ႉ 33 ၵေႃႉ၊ မၢတ်ႇၸဵပ်း 80 ၵေႃႉ၊ ႁူင်းႁဵၼ်းလူႉၵွႆ 2 လင်လႄႈ ႁိူၼ်းယေး ၵူၼ်းမိူင်းထုၵ်ႇမၢၵ်ႇတူၵ်းသႂ်ႇလူၵွႆ ၺႃးၾႆးမႆႈ တင်းမူတ်း 47 လင် ဝႃႈၼႆ။

ပၢင်တိုၵ်း တီႈသီႇပေႃႉၼႆႉ ပဵၼ်ၵႂႃႇ 2 လိူၼ်ပၢႆ။ တီႈပွၵ်ႉတူင်ႈၸၢင်ႉၼႆႉ ႁိူၼ်းယေး ၵူၼ်းဝၢၼ်ႈ ဢၼ် ဢမ်ႇၺႃးၸၢၵ်ႇမၢၵ်ႇၼႆႉ ဢမ်ႇမီးသေလင်။ ပွၵ်ႉတူင်ႈၸၢင်ႉၼႆႉ ဢိူမ်ႈၸမ်တပ်ႉသိုၵ်းမၢၼ်ႈ 23 ဝႆႉ – ၵူၼ်းပိုၼ်ႉတီႈ ဝဵင်းသီႇပေႃႉလၢတ်ႈ။

ယွၼ်ႉၽႅၼ်ၵၢၼ်ယၢၼ်ႇသိုၵ်း 1027 တွၼ်ႈသွင် တေႃႇထိုင်ဝၼ်းတီႈ 13 လိူၼ်ၼႆႉ ယူႇတီႈ တပ်ႉသိုၵ်းတဢၢင်း TNLA ယိုတ်းၵုမ်းလႆႈ – ဝဵင်းၼွင်ၶဵဝ်၊ ဝဵင်းမိူင်းၵုတ်ႈ၊ ဝဵင်းမိူင်းမိတ်ႈ၊ ဝဵင်းၵျွၵ်ႉမႄး၊ ဝဵင်းသီႇပေႃႉ ၸိူဝ်းၼႆႉယဝ်ႉ – ယူႇတီႈ တပ်ႉသိုၵ်း TNLA ပိုၼ်ၽၢဝ်ႇဢွၵ်ႇဝႆႉ ၼင်ႇၼႆ။