မိူဝ်ႈၼႆႉ ဝၼ်းတီႈ 15/10/2024 ယၢမ်းႁူဝ်ၶမ်ႈ 5 မူင်းၶိုင်ႈ သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ် တီႈဝၢၼ်ႈၼမ်ႉၶုမ်ဝဵင်းမႂ်ႇ ၾၢႆႇဢွၵ်ႇဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ႁၢဝ်ႈႁႅင်း။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းၵဝ်ႈၵၢင်ႉတင်း သိုၵ်းမၢၼ်ႈ ယိုဝ်း ၵၼ် တီႈဝၢၼ်ႈၼမ်ႉၶုမ် မၢၵ်ႇသိုၵ်းၵဝ်ႈၵၢင်ႉ တူၵ်းသႂ်ႇႁိူၼ်းယေး ၵူၼ်းဝၢၼ်ႈ ထုၵ်ႇၾႆးမႆႈၵႂႃႇလင်ၼိုင်ႈ ၶႃႈ။ လွင်ႈတုမ်ႉတိူဝ်ႉ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး”- ဝႃႈၼႆ။
ပၢင်တိုၵ်း တင်းသွင်ၾၢႆႇၼႆႉ တႄႇပဵၼ်ယၢမ်းႁူဝ်ၶမ်ႈ 5 မူင်းၶိုင်ႈ တေႃႇထိုင် ယၢမ်းႁူဝ်ၶမ်ႈ 6 မူင်း ၶၢဝ်းတၢင်း ပၢင်တိုၵ်းႁိုင်မွၵ်ႈ 30 မိၼိတ်ႉၼႆႉ။ ဝၢၼ်ႈၼမ်ႉၶုမ် ဝဵင်းမႂ်ႇၼႆႉ မီးၼႂ်းၵႄႈမူႇၸေႊ – 105 လၵ်း ၼႆ ယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ