ဝၼ်းတီႈ 13/10/2024 ပူၼ်ႉမႃးၼႆႉ ႁူဝ်ၼႃႈ ဢႃႊသီႊယႅၼ်ႊ တုၵ်းယွၼ်းမိူင်းမၢၼ်ႈဝႃႈ ႁႂ်ႈၵိုတ်းၵၢၼ်တိုၵ်းၵမ်းလဵဝ်သေ ၸတ်းႁဵတ်းပၢင်ဢုပ်ႇဢူဝ်း ဢၼ်ပႃးၵူႈမူႇၵူႈၸုမ်း ဝႃႈၼႆ။
ပၢင်ၵုမ် ဢႃႊသီႊယႅၼ်ႊ (ASEAN) ဢၼ်ပႃး ႁူဝ်ၼႃႈၸိုင်ႈမိူင်း တီႈၸဵင်ႇၸၢၼ်းဝၼ်းဢွၵ်ႇၵုၼ်ၶဵဝ်ဢေႊသျႃႊ (Asian) လႄႈ ၽူႈတႅၼ်း တီႈမိူင်းဢမေႊရိၵၼ်ႊ(American)၊ ရတ်ႉသျႃႊ (Russia)၊ ၶႄႇ(China)၊ ၵျပၢၼ်ႊ(Japan)၊ ဢိၼ်ႊတီႊယိူဝ်ႊ(India)၊ ၵူဝ်ႊရီႊယိူဝ်ႊၸၢၼ်း (South Korea) ၼႆႉ ယဝ်ႉတူဝ်ႈ ၵႂႃႇယဝ်ႉ။
ၵဵဝ်ႇၵပ်းပၢင်ၵုမ်ၼႆႉ ဢွၵ်ႇၶေႃႈပိုၼ်ၽၢဝ်ႇမႃး ၼႂ်းၼၼ်ႉ ၵဵဝ်ႇၵပ်းမိူင်းမၢၼ်ႈသေ ပႃးဝႆႉဝႃႈ – ႁႂ်ႈၵိုတ်းပၼ်ႁႃ ပတိၵ်ႈၶၢတ်ႈ ဢၼ်ႁဵတ်းႁႂ်ႈလိူတ်ႈယၢင်တူၵ်း၊ ႁႂ်ႈသၢင်ႈ ၼင်ႇႁိုဝ်တေလႆႈတၢင်းၵမ်ႉၸွႆႈလႄႈ မိူင်းမၢၼ်ႈ ၵေႃႉဢွၼ်ႁူဝ်သေ ၸတ်းႁဵတ်းၵႂႃႇပၢင်ဢုပ်ႇဢူဝ်း ပတ်းပိုၼ်ႉမိူင်းႁူမ်ႈတုမ်ၼႆ ယူႇတီႈ ဢႃႊသီႊယႅၼ်ႊ တုၵ်းယွၼ်းၵႂႃႇၼင်ႇၼႆ။
ယၢမ်းလဵဝ် ၵူၼ်းမိူင်းမၢၼ်ႈ မွၵ်ႈ 3 ပုၼ်ႈ 1 ပုၼ်ႈပၢႆ ႁူဝ်ၵူၼ်း 18 လၢၼ်ႉပၢႆၼႆႉ လူဝ်ႇတၢင်းၸွႆႈထႅမ် ဝႆႉၼႆ လၢမ်းၶၢတ်ႈဝႆႉၼင်ႇၼႆ။ လိူဝ်ၼၼ်ႉ ၼႂ်းႁၢင်ပီၼႆႉ မိူင်းထႆး တေဢွၼ်ၼမ်းၸတ်းႁဵတ်းၵႂႃႇ ပၢင်ဢုပ်ႇဢူဝ်းၵဵဝ်ႇၵပ်းမိူင်းမၢၼ်ႈ ဢၼ်ပႃးမိူင်းဢႃႊသီႊယႅၼ်ႊ။ ဢိင်ၼိူဝ် လွင်ႈၼႆႉသေ ဢႃႊသီႊ ယႅၼ်ႊၵေႃႈ ၵမ်ႉထႅမ်ပၼ်ႁႅင်းၸွမ်းယူႇ ဝႃႈၼႆဝႆႉ။
တႃႇၵႄႈလိတ်ႈပၼ်ႁႃ မိူင်းမၢၼ်ႈၼႆႉ ဢႃႊသီႊယႅၼ်ႊ တမ်းဝၢင်းမႃး ၶေႃႈတူၵ်းလူင်း 5 ၶေႃႈ၊ ၵူၺ်းၵႃႈ ဢမ်ႇပဵၼ်ၸတ်းႁဵတ်း ၼႄၼမ်ႉၼႄတူဝ်လႆႈလႄႈ ယူႇတီႈဢႃႊသီႊယႅၼ်ႊ ႁႄႉႁၢမ်ႈသိုၵ်းမၢၼ်ႈ ဢမ်ႇပၼ်ၶဝ်ႈႁူမ်ႈပၢင်ၵုမ်ၸၼ်ႉသုင် – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ