ဝၼ်းတီႈ 14/10/2024 ယၢမ်းႁူဝ်ၶမ်ႈ 6 မူင်းၶိုင်ႈ သိုၵ်းမၢၼ်ႈ ဢဝ်ၶိူင်ႈမိၼ်ပွႆႇမၢၵ်ႇ တၢင်းလွႆၶမ်း တီႈႁိမ်းပၢင်ႇရူတ်ႉၵႃး ၼႃးမၢၵ်ႇၶေႃ တူၵ်းတိူဝ်ႉၵူၼ်းပိုၼ်ႉတီႈ ဢၼ်တိုၵ်ႉႁေႃႈရူတ်ႉဝႆႉ လူႉတၢႆ တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈလႃႈသဵဝ်ႈ လၢတ်ႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ မၢၵ်ႇတူၵ်းမႃး 3 လုၵ်ႈ တၢင်းလွႆၶမ်း တီႈ ႁိမ်းပၢင်ႇရူတ်ႉၵႃး ၼႃးမၢၵ်ႇၶေႃ ၼႆဢေႃႈ။ မၢၵ်ႇတႅၵ်ႇတိူဝ်ႉသႂ်ႇ ၺႃးၵူၼ်းၵေႃႉၼိုင်ႈ ဢၼ်တိုၵ်ႉၶီႇရူတ်ႉ ၶိူင်ႈမႃးၼၼ်ႉ လႆႈတၢႆ ၵႂႃႇ၊ ၵေႃႉၼိုင်ႈသမ်ႉ မၢတ်ႇၸဵပ်းႁၢဝ်ႈႁႅင်း၊ ၸွင်ႇၶိူင်ႈမိၼ် တေမႃးထႅင်ႈႁိုဝ် ဢမ်ႇႁူႉ ဝူၼ်ႉသေၵူဝ်ဝႆႉယူႇယဝ်ႉ”- ဝႃႈၼႆ။
ၼႂ်းဝၼ်းတီႈ 14 ဝၼ်းလဵဝ်ၵူၺ်း သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ 2 ပွၵ်ႈ၊ မိူဝ်ႈၵၢင်ၼႂ်ၸဝ်ႉ ပွၵ်ႈၼိုင်ႈ၊ ယၢမ်းႁူဝ်ၶမ်ၼႆႉ ၼိုင်ႈပွၵ်ႈ။ မၢၵ်ႇသိုၵ်းမၢၼ်ႈ ဢၼ်မႃးတူၵ်းၼၼ်ႉ သဵင်မၼ်းလင်ၼႃႇလႄႈ ၵူၼ်းမိူင်း လၢမ်းၶၢတ်ႈဝႃႈ လႅပ်ႈပဵၼ်မၢၵ်ႇသႅၼ်း 500 ပွင်ႇ။
မိူဝ်ႈဝႃး ယၢမ်းၵၢင်ၼႂ်ၼႆႉ သိုၵ်းမၢၼ်ႈ မႃးပွႆႇမၢၵ်ႇ တီႈဝၢၼ်ႈဢီႇၼၢႆး ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ 3 ၵေႃႉ မၢတ်ႇၸဵပ်း 2 ၵေႃႉ။ ၸၢၵ်ႇမၢၵ်ႇတိူဝ်ႉသႂ်ႇႁိူၼ်းယေး ၵူၼ်းဝၢၼ်ႈယွၵ်းယွႆ 5 လင်၊ တိူဝ်ႉၺႃး ၵျွင်းၶ ရိတ်ႉယၼ်ႇၶၢင်လႄႈ ႁူင်းႁဵၼ်းၸၼ်ႉဢွၼ် (မူကြိုကျောင်း) ၸိူဝ်းၼႆႉထႅင်ႈ။
တႄႇဢဝ် လိူၼ်သႅပ်ႊထႅမ်ႊပိူဝ်ႊ ၼၼ်ႉမႃး ႁၢၼ်ႉတေႃႇထိုင် ၵၢင်လိူၼ်ဢွၵ်ႊထူဝ်ႊပိူဝ်ႊၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းလႃႈသဵဝ်ႈၼႆႉ ၶႂ်ႈဝႃႈမီးၵူႈဝၼ်း။ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ 10 ပၢႆ မၢတ်ႇၸဵပ်းၸမ် 50 – ၵူၼ်းပိုၼ်ႉတီႈ လၢတ်ႈၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ