မိူဝ်ႈၼႆႉ ဝၼ်းတီႈ 14/10/2024 ယၢမ်းၵၢင်ၼႂ် ၽူႈယိင်းဢွၼ်ႇ 2 ၵေႃႉ သွၼ်ႉရူတ်ႉၶိူင်ႈ မႃးၸွမ်းၵၼ် လမ်းၼိုင်ႈသေ ပဵၼ်ၽေးၵိုင်ႉၵၢင်ႉ ပလၢတ်ႈလူမ်ႉ တီႈသဵၼ်ႈလူင် လွႆသထူင်ႇ ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ လႅၼ်လိၼ်တႆး – ထႆး ၵေႃႉသွၼ်ႉတၢင်းလင်ၼၼ်ႉ ၺႃးၵႃးၽႃႇသႂ်ႇ လူႉတၢႆထင်တီႈ။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၽူႈယိင်းဢွၼ်ႇ 2 ၵေႃႉ သွၼ်ႉရူတ်ႉၶိူင်ႈ ၵႂႃႇၸွမ်းၵၼ် လမ်းၼိုင်ႈ ၵႂႃႇတၢင်းႁူင်းႁဵၼ်းမေႇတေးၼၼ်ႉ ယွၼ်ႉသဵၼ်ႈတၢင်းမိုၼ်ႈ ပလၢတ်ႈလူမ်ႉၵႂႃႇ ၵေႃႉသွၼ်ႉတၢင်းလင် ၼၼ်ႉ ၺႃးၵႃး ဢၼ်မႃးတၢင်းလင်ၶဝ်ၼၼ်ႉ ၽႃႇသႂ်ႇဢိတ်ႇဢဝ်ၵွၵ်းႁူဝ် မၼ်းၼၢင်းၵႂႃႇသေ ထိုင်တီႈလႆႈလူႉတၢႆ ၶႃႈဢေႃႈ။ ပိူင်ပဵၼ်မၼ်းၼႆႉ ယွၼ်ႉသဵၼ်ႈတၢင်းမိုၼ်ႈ လူၺ်ႈၶီႈၵူမ်ႇ ဢၼ်ၵိုတ်းၶမ်ဝႆႉ ၸိူဝ်းၼၼ်ႉၶႃႈယဝ်ႉ”- ဝႃႈၼႆ။

ယၢမ်းလဵဝ် တီႈဝဵင်းတႃႈၶီႈလဵၵ်းၼႆႉ ၶီႈၵူမ်ႇၶီႈငႂ်ႈ ၵိုတ်းၶမ်ႁႅင်း ယူႇတီႈ ၽူႈမီးပုၼ်ႈၽွၼ်း သိုၵ်းမၢၼ်ႈ ပလိၵ်ႈမၢၼ်ႈၶဝ် ၸိူဝ်းၼၼ်ႉၵေႃႈ ဢမ်ႇသႂ်ႇၸႂ်ၽဵဝ်ႈလၢင်ႉ ႁဵတ်းတႄႉႁဵတ်းဝႃႈ ၼႆယဝ်ႉ။

“တီႈတႃႈၶီႈလဵၵ်းၼႆႉ ပဵၼ်ဝႆႉၸိူင်ႉၼႆ ၾၢႆႇလိူမ်ႈလႆႇၶဝ် ၽဵဝ်ႈၼႆၵေႃႈ ၶဝ်ၽဵဝ်ႈၸွမ်းတႃႈၸွမ်းတၢင်း ၸိူင်ႉၼၼ်ၵူၺ်း ။ ၶီႈၵူမ်ႇဢၼ်ၶဝ်ၽဵဝ်ႈၼၼ်ႉ တၢင်ႇၵႃးလူင်သေၵႂႃႇပႅတ်ႈ မိူဝ်ႈၽွင်းတၢင်ႇၵႂႃႇၼၼ်ႉ ၶီႈၵူမ်ႇၸိူဝ်းၼၼ်ႉ တူၵ်းၸွမ်းသဵၼ်ႈတၢင်း ႁဵတ်းႁႂ်ႈသဵၼ်ႈတၢင်းမိုၼ်ႈသေ ႁဵတ်းႁႂ်ႈရူတ်ႉၶိူင်ႈ ပလၢတ်ႈလူမ်ႉၼႆႉ မီးၵူႈဝၼ်းယဝ်ႉ။ ယွၼ်ႉတၢင်းမိုၼ်ႈၼႆႉသေ ႁဵတ်းႁႂ်ႈၵူၼ်းမိူင်း လူမ်ႉရူတ်ႉၶိူင်ႈ လူႉတၢႆမီး 2 ၵေႃႉယဝ်ႉ”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼႄၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 11 ယၢမ်းၵၢင်ၼႂ်မွၵ်ႈ 7 မူင်းၶိုင်ႈ ရူတ်ႉၶိူင်ႈ ၶူးသွၼ်ၵေႃႉၼိုင်ႈ ၸိုဝ်ႈႁွင်ႉ ဢူးတိၼ်ႇၼၢႆႇထုတ်ႉ ဢႃယု 68 ပီ ၼၼ်ႉၵေႃႈ ရူတ်ႉၶိူင်ႈလူမ်ႉ ယွၼ်ႉတၢင်းမိုၼ်ႈၼႆႉသေ ၺႃးရူတ်ႉၶိူင်ႈ ဢၼ်မႃး ၸွမ်းတၢင်းလင် မၼ်း ၸၢႆး လမ်းၼိုင်ႈၼၼ်ႉ ၽႃႇသႂ်ႇသေ လႆႈလူႉတၢႆၵႂႃႇ – တီႈသိုဝ်ႇၶၢဝ်ႇ Tachileik News Agency ဢွၵ်ႇဝႆႉၼင်ႇၼႆ။

ဝဵင်းတႃႈၶီႈလဵၵ်းၼႆႉ ၺႃးၼမ်ႉသၢႆ လုပ်ႇထူမ်ႈႁၢဝ်ႈႁႅင်း မိူဝ်ႈလိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼၼ်ႉသေ ယၢမ်းလဵဝ် ၼမ်ႉယွမ်းလူင်းၶိုၼ်းယဝ်ႉသေတႃႉ ၵူၺ်းၵႃႈ ၶီႈၵူမ်ႇၶီႈငႂ်ႈ ဢၼ်ၵိုတ်းၶမ်ဝႆႉ ၼႂ်းဝဵင်းတႄႉ တိုၵ်ႉၵိုတ်းဢုင်ဝႆႉ တင်းၼမ်။

ၽူႈယိင်း ဢႃယု 40 ပၢႆ ၵေႃႉၼိုင်ႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၼႆႉ ဢမ်ႇ ႁၼ်ၶဝ် ႁဵတ်းသင်ၶႃႈ တီႈတႃႈၶီႈလဵၵ်းၼႆႉ လုၵ်ႉဢဝ်တီႈဝတ်ႉသၢႆမိူင်းသေ ႁၢၼ်ႉတေႃႇထိုင် ႁိမ်းၵၢတ်ႇသၼ်သၢႆးၼၼ်ႉ ၼမ်ႉၼႆႉ ယင်းပႆႇယွမ်းလူင်းလႃးလႃး တိုၵ်ႉယိုင်ႈဝႆႉယူႇ။ ယွၼ်ႉၶီႈၵူမ်ႇၶီႈငႂ်ႈ ထူမ်ႈတဵမ်ဝႆႉ ၼႂ်းႁွင်ႈၼမ်ႉ ဢၼ်လႆၸူးၼမ်ႉမႄႈသၢႆၼၼ်ႉ ပႅတ်ႈမူတ်းလႄႈ ႁဵတ်းႁႂ်ႈၼမ်ႉ ဢမ်ႇၸၢင်ႈလႆ။ ၾၢႆႇလိူမ်ႈလႆႇသမ်ႉ ဢမ်ႇၵႂႃႇၵႄႈၶႆၽဵဝ်ႈလၢင်းႁွင်ႈ ၸိူဝ်း ၼၼ်ႉလႄႈ ၵွပ်ႈၼႆ ၼမ်ႉဢမ်ႇယွမ်းလူင်းၶႃႈ”- ဝႃႈၼႆ။

ပီၼႆႉ ၼမ်ႉလုပ်ႇထူမ်ႈ တီႈဝဵင်းတႃႈၶီႈလဵၵ်းၼႆႉ ဢမ်ႇယွမ်း 9 ပွၵ်ႈယဝ်ႉ တႄႇဢဝ်လိူၼ်ဢေႃႊၵတ်ႊသ်မႃး ႁၢၼ်ႉတေႃႇထိုင် ႁူဝ်လိူၼ်ဢွၵ်ႊထူဝ်ႊပိူဝ်ႊၼႆႉ။ ဢိင်ၼိူဝ် လွင်ႈၼမ်ႉထူမ်ႈၼႆႉသေ ဝၢႆးၼမ်ႉယွမ်းလူင်းယဝ်ႉ ယူႇတီႈ ၸုမ်းပရႁိတ ၼႂ်းပိုၼ်ႉတီႈ လူင်းၵူတ်ႇထတ်း ၸိူဝ်းလိၼ်ၵူၼ်ႇတဵင်ႁိူၼ်းယေး ထူပ်းႁၼ်တူဝ်တၢႆ ၵူၼ်းမိူင်း ဢမ်ႇယွမ်း 15 ၵေႃႉ ဝႃႈၼႆ။