မိူဝ်ႈၼႆႉ ဝၼ်းတီႈ 14/10/2024 ယၢမ်းၵၢင်ၼႂ် 12:10 မူင်းပၢႆ (တဵင်ႈၶိုၼ်းၸၢႆႉ) သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇ တီႈဝၢၼ်ႈဢီႇၼၢႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆ 3 ၵေႃႉ မၢတ်ႇၸဵပ်း 2 ၵေႃႉ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်မၢၵ်ႇၶိူင်ႈမိၼ် သိုၵ်းမၢၼ်ႈ မႃးပွႆႇထႅင်ႈ တင်းမူတ်း 7 လုၵ်ႈ ၼႂ်းၼၼ်ႉ မၢၵ်ႇလူင်ဢၼ်မီးၼမ်ႉၼၵ်း 500 ပွင်ႇ 2 လုၵ်ႈ။ ၸၢၵ်ႇမၢၵ်ႇ တိူဝ်ႉၺႃး ၵူၼ်းမိူင်းလူႉတၢႆ 3 ၵေႃႉ မၢတ်ႇၸဵပ်း 2 ၵေႃႉ”- ဝႃႈၼႆ။
ဢိင်ၼိူဝ် လွင်ႈၼႆႉ တီႈသိုဝ်ႇၶၢဝ်ႇၼႂ်းပိုၼ်ႉတီႈ (လားရှိုးမြို့ ပြန်လည်ထူထောင်ရေး) တႄႉ ဢွၵ်ႇဝႆႉဝႃႈ မၢၵ်ႇၶိူင်ႈမိၼ် သိုၵ်းမၢၼ်ႈ မႃးတူၵ်းသႂ်ႇ တိူဝ်ႉၺႃးၽူႈၸၢႆး လူႉတၢႆ 3 ၵေႃႉ။ ထဝ်ႈယိင်း ၼိုင်ႈၵေႃႉလႄႈ လုၵ်ႈဢွၼ်ႇ ဢႃယု 4 ၶူပ်ႇ လႆႈတိူဝ်ႉမၢတ်ႇၸဵပ်းၸွမ်း ဝႃႈၼႆ။
လိူဝ်ၼၼ်ႉ ၸၢၵ်ႇမၢၵ်ႇတိူဝ်ႉသႂ်ႇႁိူၼ်းယေး ၵူၼ်းဝၢၼ်ႈလႅဝ်ၽႅဝ်ႉ (ယွၵ်းယွႆ) 5 လင်၊ တိူဝ်ႉၺႃး ၵျွင်းၶရိတ်ႉယၢၼ်ႇၶၢင်လႄႈ ႁူင်းႁဵၼ်းၸၼ်ႉဢွၼ် (မူကြိုကျောင်း) ၸိူဝ်းၼႆႉထႅင်ႈ။
မိူဝ်ႈဝၼ်းတီႈ 12/10/2024 ယၢမ်းႁူဝ်ၶမ်ႈ သိုၵ်းမၢၼ်ႈ မႃးပွႆႇမၢၵ်ႇတီႈဢိူင်ႇၼမ်ႉပွင်ႈ ၸႄႈဝဵင်းလႃႈသဵဝ်ႈ ၼၼ်ႉၵေႃႈ တိူဝ်ႉၺႃး ႁူင်းႁဵၼ်းလူႉၵွႆထႅင်ႈ။
“ၸႂ်ႈၶႃႈဢေႃႈ သိုၵ်းမၢၼ်ႈ မႃးပွႆႇမၢၵ်ႇ တိူဝ်ႉၺႃး ႁူင်းႁဵၼ်းဝၢၼ်ႈၶမ်းတိူၼ်း လူႉၵွႆလင်ၼိုင်ႈလႄႈ ယဝ်ႉၵေႃႈ တီႈၵၢတ်ႇဝူဝ်းၵၢတ်ႇၵႂၢႆးၼၼ်ႉထႅင်ႈ။ သိုၵ်းမၢၼ်ႈၼႆႉ ၶဝ်ထၢင်ႇဝႃႈ သိုၵ်းၵဝ်ႈၵၢင်ႉ မီးတီႈလႂ်ၵေႃႈ မႃးပွႆႇမၢၵ်ႇသႂ်ႇ ၸိူင်ႉၼၼ်ၶႃႈ ဢေႃႈ။ ဢၼ်လူႉတၢႆမၢတ်ႇၸဵပ်းတႄႉ ပဵၼ်ၵူၼ်းမိူင်းလၢႆလၢႆၶႃႈယဝ်ႉ။ မၢင်ၸိူဝ်း မီးငိုၼ်းၵေႃႈ ပၢႆႈၵႂႃႇတၢင်းပွတ်း ၸၢၼ်း၊ မၢင်ၸိူဝ်း ဢမ်ႇမီးငိုၼ်းၵေႃႈ ယူႇၸွမ်းဝၢၼ်ႈၸွမ်းသူၼ်သေ ပေႃးသဵင်မၼ်းယဵၼ်ၵေႃႈ ၸင်ႇပွၵ်ႈမႃးၶိုၼ်း ႁိူၼ်းႁဵတ်းၼၼ်ၶႃႈဢေႃႈ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
တႄႇဢဝ် လိူၼ်သႅပ်ႊထႅမ်ႊပိူဝ်ႊ ၼၼ်ႉမႃး ႁၢၼ်ႉတေႃႇထိုင် ၵၢင်လိူၼ်ဢွၵ်ႊထူဝ်ႊပိူဝ်ႊၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ တီႈဝဵင်းလႃႈသဵဝ်ႈၼႆႉ ဢမ်ႇယွမ်း 10 ပွၵ်ႈယဝ်ႉ။ မိူဝ်ႈၼႂ်းလိူၼ်သႅပ်ႊထႅမ်ႊပိူဝ်ႊ ပူၼ်ႉမႃးၼႆႉ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းလူႉတၢႆမွၵ်ႈ 10 မၢတ်ႇၸဵပ်း 40 ပၢႆ – ၵူၼ်းပိုၼ်ႉတီႈ လၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ