ၶၢဝ်းတၢင်းသိုၵ်းမၢၼ်ႈၵႆႉဢဝ်မၢၵ်ႇလူင်ပွႆႇသႂ်ႇဢွင်ႈတီႈဢၼ်သိုၵ်းၵဝ်ႈၵၢင်ႉ MNDAA သိုၵ်းတဢၢင်း TNLA ၵုမ်းဝႆႉၸိူဝ်းၼၼ်ႉၼႆႉ  သိုၵ်းၵဝ်ႈၵၢင်ႉ MNDAA လႄႈသိုၵ်းတဢၢင်း TNLA တီႉၺွပ်း ၵူၼ်းၸိူဝ်းဢၼ်ၶဝ်ထၢင်ႇထိူမ်ဝႃႈ ပဵၼ်ၵူၼ်းပၼ်ၶၢဝ်ႇတီႈသိုၵ်းမၢၼ်ႈၼႆသေ ၵူတ်ႇထတ်းထဵတ်ႈထၢမ်ဝႆႉ။ ယၢမ်းလဵဝ်ၵူၼ်းမိူင်းဝဵင်းလႃႈသဵဝ်ႈလၢတ်ႈဝႃႈ -ဢၼ်ၶဝ်တီႉဝႆႉမီးမွၵ်ႈ 30 ၵေႃႉလွင်ႈၼႆႉ ပဵၼ်ၶၢဝ်ႇဢၼ်ၵူၼ်းမိူင်းဝဵင်းလႃႈသဵဝ်ႈလၢတ်ႈမိူၼ်ၵၼ်တင်းဝဵင်း။

ၵူၺ်းၵႃႈၼႂ်းဝူင်ႈဝၢင်ႈၼႆႉ သမ်ႉမီးၶၢဝ်ႇလိုဝ်းၽႄႈၼႂ်းသိုဝ်ႇၼႅင်ႈသၢၼ်ဝႃႈ သိုၵ်းၵဝ်ႈၵၢင်ႉၶႃႈႁႅမ် ၵူၼ်းၸၢဝ်းမၢၼ်ႈ ၸိူဝ်းယူႇဝဵင်းလႃႈသဵဝ်ႈ – ဢၼ်ပွင်ႇၶၢဝ်ႇပၼ်သိုၵ်းမၢၼ်ႈ  ဝႃႈၼႆ။

ၶၢဝ်ႇလိုဝ်းႁူဝ်ၼႆႉ ပဵၼ်ၶျွင်ႉ View of Sue တႅမ်ႈဢွၵ်ႇပိုၼ်ၽႄႈဝႆႉၼႂ်း Telegram ။  မီးၵူၼ်းတိတ်းတၢမ်းဝႆႉ 16000 ပၢႆ  ။ မၼ်းတႅမ်ႈဝႆႉပႃးဝႃႈ – “ ယွၼ်ႉၺႃးသိုၵ်းမၢၼ်ႈပွႆႇမၢၵ်ႇသႂ်ႇသေ မီးလွင်ႈတုမ်ႉတိူဝ်ႉၼမ်ၼႃႇ။ ယူႇတီႈ MNDAA  လႄႈ TNLA ၶဝ်တတ်းလႅင်းၾူၼ်းတင်းမူတ်း  ၊ ၼႄးၵူၼ်းမိူင်း ၸိူဝ်းပဵၼ်ၸၢဝ်းမၢၼ်ႈ ၵပ်းသိုပ်ႇသူင်ႇၶၢဝ်ႇၸူးသိုၵ်းမၢၼ်ႈၼႆသေ ၶႃႈပႅတ်ႈ မွၵ်ႈ 50 ၵေႃႉၼႆႉယဝ်ႉ” – ဝႃႈၼႆ။

ၶၢဝ်ႇလိုဝ်းႁူဝ်ၼၼ်ႉ မီးၵူၼ်းတူၺ်းၵႂႃႇ 33000 ပၢႆ။

လိင်ႉၶ် ၶၢဝ်ႇၽၢမ်း – https://archive.ph/88STC

လိင်ႉၶ်ဢၼ်သိုပ်ႇလၢမ်းၽႄႈၶၢဝ်ႇၽၢမ်းထႅင်ႈ  – https://archive.ph/wUv7p

ၶၢဝ်ႇဢၼ်ၽႄႈယူႇ တီႈၼႂ်းၶျွင်ႉၼၼ်ႉ ယူႇတီႈ MPA တင်း Shan News  လႆႈႁူမ်ႈၵၼ်ၵူတ်ႇထတ်းသေ လႆႈႁူႉဝႃႈပဵၼ်ၶၢဝ်ႇပွမ်ၶၢဝ်ႇၽၢမ်းဝႆႉ။

လၵ်းထၢၼ် ဢၼ်ၵူတ်ႇထတ်းႁၼ်ဝႃႈ ပဵၼ်ၶၢဝ်ႇပွမ်

သိုဝ်ႇၶၢဝ်ႇသူၺ်ႇၽီႇမျေႇတႄႉ တႅမ်ႈတၢင်ႇဝႆႉဝႃႈ ယွၼ်ႉမီးၵူၼ်းၼႂ်းလႃးသဵဝ်ႈ သူင်ႇၶၢဝ်ႇပၼ်သိုၵ်းမၢၼ်ႈလႄႈ သိုၵ်းၵဝ်ၵၢင်ႉ MNDAA ၸင်ႇတတ်းပႅတ်ႈသၼ်ယၢၼ်ႊဢိၼ်ႇတႃႇၼႅတ်ႉ လႄႈ Starlink   ၸိူဝ်းၼႆႉ ဝႃႈၼႆဝႆႉ။

လိင်ႉၶ်ၶၢဝ်ႇ  – https://archive.ph/38Q77

သၼ်ယၢၼ်ႊၾူၼ်းတီႉလႃႈသဵဝ်ႈၼႆႉ ၶၢတ်ႇၵႂႃႇမိူဝ်ႈႁူဝ်လိူၼ်ဢွၵ်ႊထူဝ်ႊပိူဝ်ႊၼၼ်ႉသေ သတႃးလိင်ႉၶ် Starlink တႄႉ တႄႇပိၵ်ႉဢိုတ်းပႅတ်ႈမိူဝ်ႈဝၼ်းတီႈ 5 လိူၼ်ဢွၵ်ႊထူဝ်ႊပိူဝ်ႊၼႆႉ သိုဝ်ႇၶၢဝ်ႇသူၺ်ႇၽီႇႁၢႆးငၢၼ်းဝႆႉၼင်ႇၼႆ။

မိူၼ်ၼႆၼင်ႇၵဝ်ႇ သိုဝ်ႇ RFA ၵေႃႈ ႁၢႆးငၢၼ်းဝႆႉဝႃႈ “  သိုၵ်းၵဝ်ႈၵၢင်ႉ MNDAA ပိၵ်ႉဢိုတ်းပႅတ်ႈ သၼ်ယၢၼ်ႊဢိၼ်ႇတႃႇၼႅတ်ႉလႄႈ သတႃးလိင်ႉၶ် ” – ဝႃႈၼႆ။

သိုပ်ႇဢၢၼ်ႇၶၢဝ်ႇၼၼ်ႉ – https://archive.ph/7v2im

ၵူၺ်းၵႃႈ သိုဝ်ႇၶၢဝ်ႇၼႂ်းမိူင်းလႄႈ သိုဝ်ႇဢၼ်လွတ်ႈလႅဝ်းဝႆႉၸိူဝ်းၼၼ်ႉၵေႃႈ ပႆႇႁၼ်တႅမ်ႈတၢင်ႇလွင်ႈသိုၵ်းၵဝ်ႈၵၢင်ႉၶႃႈႁႅမ် ၵူၼ်းမိူင်းသေဢိတ်း ၊ ပိူင်ယႂ်ႇၵေႃႈ ဢၼ်ပဵၼ်ၶၢဝ်ႇ ၶႃႈႁႅမ်ၵူၼ်းပၼ်ၶၢဝ်ႇသိုၵ်းမၢၼ်ႈ ၸိူဝ်းပဵၼ်ၸၢဝ်းမၢၼ်ႈၼႆၼၼ်ႉ ပႆႇမီးသိုဝ်ႇၶၢဝ်ႇလႂ် ဢွၵ်ႇႁၢႆးငၢႆးပဵၼ်တၢင်းၵၢၼ်။

ၶၢဝ်ႇၽူႈတွႆႇႁွၵ်ႈၵေႃႈ လႆႈတႅမ်ႈတၢင်ႇႁၢႆးငၢၼ်းဝႆႉဝႃႈ သိုၵ်းၵဝ်ႈၵၢင်ႉ MNDAA တေပၼ်တၢမ်ႇတၢႆၵူၼ်းၸိူဝ်းပၼ်ၶၢဝ်ႇသိုၵ်းမၢၼ်ႈၼႆသေ တႅမ်ႈၸွမ်းၼင်ႇၵူၼ်းပိုၼ်ႉတီႈလၢတ်ႈမိူဝ်ႈဝၼ်းတီႈ 8/10/2024 ၼၼ်ႉ။

ၽူႈတွႆႇႁွၵ်ႈ တႅမ်ႈတၢင်ႇႁၢႆးငၢၼ်းဝႆႉဝႃႈ သိုၵ်းၵဝ်ႈၵၢင်ႉ တီႉၺွပ်းဝႆႉ ၵူၼ်းပၼ်ၶၢဝ်ႇသိုၵ်းမၢၼ်ႈ 30 ၵေႃႉ ၊ ယၢမ်းလဵဝ်တႄႉ ပႆႇထိုင်တီႈပၼ်တၢမ်ႇတၢႆၼင်ႇၵဝ်ႇ ဝႃႈၼႆဝႆႉၵူၺ်း။

လိင်ႉၶ်ၶၢဝ်ႇၼၼ်ႉ -https://archive.ph/dDa02

လိင်ႉၶ်ၶၢဝ်ႇၼၼ်ႉ – https://shannews.org/archives/58450

ၶေႃႈထတ်းသၢင်

ၶၢဝ်ႇဢၼ်ဝႃႈ သိုၵ်းၵဝ်ႈၵၢင်ႉ သိုၵ်းတဢၢင်း မီးလွင်ႈတုမ်ႉတိူဝ်ႉၼမ်သေ တတ်းပႅတ်ႈလႅင်းၾူၼ်း လႅင်းဢိၼ်ႇတႃႇၼႅတ်ႉယဝ်ႉၵေႃႈ ၶႃႈတၢႆ ၸၢဝ်းမၢၼ်ႈဢၼ်ပၼ်ၶၢဝ်ႇၸူးသိုၵ်းမၢၼ်ႈဢၼ်ဝႃႈၼၼ်ႉ ပဵၼ်ၶၢဝ်ႇပွမ်ၶၢဝ်ႇၽၢမ်းၵူၺ်း။

ဝၢႆးသိုၵ်းၵဝ်ႈၵၢင်ႉတတ်းၶၢတ်ႇလႅင်းဢိၼ်ႇတႃႇၼႅတ်ႉယဝ်ႉ ၶၢဝ်ႇပွမ်ၶၢဝ်ႇၽၢမ်းၼႂ်းလႃႈသဵဝ်ႈဢွၵ်ႇၼမ် ၽႄႈၸွတ်ႈၼိူဝ်သူဝ်ႊသျႄႊမီႊတီႊယိူဝ်ႊဝႆႉၼမ် ၼႆ သိုဝ်ႇသူၺ်ႇၽီႇမျေႇႁၢႆးငၢၼ်းဝႆႉ။

သိုပ်ႇဢၢၼ်ႇၶၢဝ်ႇႁူဝ်ၼၼ်ႉ – https://archive.ph/iUp2c

ၵဵဝ်ႇလူၺ်ႈ ၽူႈၸိူဝ်းၵမ်ႉထႅမ်သိုၵ်းမၢၼ်ႈ ၸိူဝ်းတႅမ်ႈၶၢဝ်ႇပွမ် ၶၢဝ်ႇၸပ်းၽၢၵ်ႇ လၢတ်ႈလွင်ႈသိုၵ်းမၢၼ်ႈလီ ပိုၼ်ၽႄႈဝႃႇတ ၸိူဝ်းၼၼ်ႉသေ ယူႇတီႈ MPA ယၢမ်ႈတႅမ်ႈဢွၵ်ႇမႃးပွင်ႈၵႂၢမ်းၶၢဝ်ႇဝႆႉယူႇ။ ၶဝ်ႈဢၢၼ်ႇလႆႈတီႈၼႂ်းလိင်ႉၶ် – https://shorturl.at/c4NxM

ၶၢဝ်ႇငၢဝ်းပွမ် လွင်ႈၼႆႉ ဢၼ်ၽႄႈလၢမ်းယူႇၼိူဝ်သိုဝ်ႇၼႅင်ႈသၢၼ်ၼႆႉ ဢမ်ႇမီးၽွၼ်းလီတေႃႇၵူၼ်းမိူင်း။ ၼႂ်းငဝ်းလၢႆးယၢပ်ႇၽိုတ်ႇၵိၼ်းၸႂ်ၸိူင်ႉၼႆ မိူၼ်တင်းႁဵတ်းႁႂ်ႈၵူၼ်းမိူင်းယူႇၼႂ်းၵႄႈလွင်ႈလီၵူဝ် တူၵ်းၸႂ်ယူႇၵူႈၶၢဝ်းယၢမ်း။

ၵွပ်ႈၼႆ ၶၢဝ်ႇဢၼ်လီၵူဝ်လီယုပ်းၽၢၼ်ႈ ဢၼ်ၽႄႈဝႆႉယူႇ တီႈၼိူဝ်သိုဝ်ႇတူင်ႇဝူင်းၵူၼ်း(Social Media) ၸိူဝ်းၼၼ်ႉ ပေႃးဢၢၼ်ႇယဝ်ႉႁႂ်ႈထတ်းသၢင်တူၺ်းလီလီ၊ ႁႂ်ႈၵႂႃႇတူၺ်းပႃးၶၢဝ်ႇ တီႈႁွင်ႈၵၢၼ်ၶၢဝ်ႇယႂ်ႇ၊ ၶၢဝ်ႇလွတ်ႈလႅဝ်း ဢၼ်ယူႇၵၢင် ဢမ်ႇၸွမ်းၾၢႆႇ ၼၼ်ႉထႅင်ႈသေ ၸင်ႇယုမ်ႇသေၵမ်း။

(Fact Check)