ၽူႈမီးၸၼ်ႉသုင် တပ်ႉၼမ်ႉ ၼႂ်းၸုမ်းဢႃႊသီႊယၼ်ႊ ၸိူဝ်းတေၶိုၼ်ႈႁွတ်ႈ ပၢင်ၵုမ်ၽူႈၵွၼ်းတပ်ႉၼမ်ႉ ၸုမ်းဢႃႊသီႊယၼ်ႊ ပွၵ်ႈၵမ်း(18) ၼၼ်ႉ ဢွၼ်ၵၼ်ႁွတ်ႈထိုင်ဝႆႉ တီႈၼေႇပျီႇတေႃႇသေ ႁူပ်ႉထူပ်းဢုပ်ႇဢူဝ်းၵၼ်တင်း ၸွမ် ၸိၵ်းသိုၵ်းမၢၼ်ႈ မိၼ်းဢွင်လၢႆႇ – ဝႃႈၼႆ။ 

ၽူႈမီးၸၼ်ႉသုင်တပ်ႉၼမ်ႉ ၸိူဝ်းႁူပ်ႉထူပ်းၵၼ်တင်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၼၼ်ႉပဵၼ် မိူင်းပရူႊၼၢႆး(Brunei) ၊ မိူင်းၵမ်ႇပူးၶျႃး(Cambodia) ၊ မိူင်းလၢဝ်း (Laos) ၊ မိူင်းဝႅတ်ႉၼၢမ်း (Vietnam) ၊ မိူင်းထႆး (Thailand) ၊ မိူင်းမလေးသျႃး (Malaysia) ၊ မိူင်းဢိၼ်ႊတူဝ်ႊၼီးသျႃႊ (Indonesia) လႄႈ မိူင်းၾိလိပ်ႉပိၼ်ႊသ် (Philippines) ၸိူဝ်းၼႆႉ။

ၼႂ်းပၢင်ႁူပ်ႉထူပ်းၵၼ်ၼၼ်ႉ လႆႈဢုပ်ႇဢူဝ်းၵၼ်ၵႂႃႇ ၵဵဝ်ႇလူၺ်ႈလွင်ႈ ႁူမ်ႈၵၼ်ႁဵတ်းသၢင်း ၵၢၼ်ႁူမ်ႇလူမ်ႈသဵၼ်ႈတၢင်းၼမ်ႉ ၼႂ်းပိုၼ်ႉတီႈ ဢႃႊသီႊယၼ်ႊ၊ လွင်ႈတႃႇတေႁူမ်ႈၵၼ် ႁဵတ်းသၢင်ႈၾိုၵ်းၽွၼ်ႉ တႃႇၵႅတ်ႇၶႄၽေးသၽႃႇဝ၊ တႃႇတေလႅၵ်ႈလၢႆႈလွင်ႈတူဝ်ထူပ်း ၼႂ်းၵၢၼ်ၸွႆႈထႅမ်လႄႈ ၵၢၼ်ၶိုၼ်း မႄးပူၵ်းပွင် လွင်ႈလူႉသုမ်း ယွၼ်ႉၽေးသၽႃႇဝ၊ ၼင်ႇႁိုဝ် တပ်ႉၼမ်ႉ ၸုမ်းဢႃႊသီႊယၼ်ႊၼင်ႇၵၼ် တေၸၢင်ႈၸွႆႈထႅမ်ၵၼ် မိူဝ်ႈၽွင်းႁူပ်ႉၺႃးၽေးသၽႃႇဝ ၸဵမ်ၸိူဝ်းၼႆ။

ပၢင်ၵုမ် ၽူႈၵွၼ်းတပ်ႉၼမ်ႉ ၸုမ်းဢႃႊသီႊယၼ်ႊ ပွၵ်ႈၵမ်း(18) ၼႆႉ မိူင်းမၢၼ်ႈ ႁပ်ႉပဵၼ် ၸဝ်ႈႁိူၼ်းသေ ၸတ်းႁဵတ်း။

တပ်ႉၼမ်ႉ သိုၵ်းမၢၼ်ႈၼႆႉ သုမ်းသိုၵ်းဝႆႉတီႈၼႂ်း မိူင်းရၶႅင်ႇသေ မိူဝ်ႈဝၼ်းတီႈ 5 လိူၼ်သႅပ်ႊထႅမ်ႊပိူဝ်ႊၼၼ်ႉ သိုၵ်းရၶႅင်ႇ (AA) ယိုတ်းလႆႈ တပ်ႉၼမ်ႉသိုၵ်းမၢၼ်ႈ ဢၼ်မီးတီႈၼႂ်းၸႄႈဝဵင်းတၢၼ်ႇတွႆး (သံတွဲမြို့နယ်) မိူင်းရၶႅင်ႇ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။