ၽွင်းမိူဝ်ႈလူင်းၵဵပ်းသဵၼ်ႈမၢႆႁူဝ်ၵူၼ်း ၼႂ်းမိူင်းယၢင်းၽိူၵ်ႇ ယူႇၼၼ်ႉ သိုၵ်းမၢၼ်ႈ ၸိူဝ်းဢဝ်ႁူမ်ႇလူမ်ႈ ၺႃးၸုမ်းလုၵ်ႉ ၽိုၼ်ႉ ဢဝ်ၶိူင်ႈၵွင်ႈလူင် ယိုဝ်းသႂ်ႇ မီးလွင်ႈမၢတ်ႇၸဵပ်း လူႉတၢႆ – ဝႃႈၼႆ။
ဝၼ်းတီႈ 10/10/2024 ယၢမ်းၵၢင်ၼႂ် 7 မူင်း ၽွင်းလူင်းၵဵပ်းသဵၼ်ႈမၢႆႁူဝ်ၵူၼ်းၼၼ်ႉ သိုၵ်းမၢၼ်ႈ ၸိူဝ်းဢဝ် ႁူမ်ႇလူမ်ႈဝႆႉ တီႈတၢင်းၶဝ်ႈဝၢၼ်ႈဝိၼ်းၸဵင်ႇ (ဝင်းစိန်ကျေးရွာ)၊ ၸႄႈဝဵင်းၽႃဢၢင်ႇ၊ မိူင်းယၢင်းၽိူၵ်ႇ ၺႃးသိုၵ်းယၢင်းၽိူၵ်ႇ (KNLA) တင်း ၸုမ်းႁူမ်ႈႁွမ်း ဢဝ်ၵွင်ႈလူင် RPG သေ ယိုဝ်းသႂ်ႇလႄႈ လူႉတၢႆ 3 ၵေႃႉ၊ မၢတ်ႇၸဵပ်းဢမ်ႇယွမ်း 3 ၵေႃႉ၊ ရူတ်ႉၵႃးလူႉၵွႆ 1 လမ်း – ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ၾၢႆႇသိုၵ်းမၢၼ်ႈတႄႉ ဢမ်ႇပိုၼ်ၽၢဝ်ႇလၢတ်ႈဝႆႉသင်။
ဝၢႆးလင် ၺႃးယိုဝ်းယဝ်ႉၼၼ်ႉ သိုၵ်းမၢၼ်ႈ ၼႂ်းၸႄႈဝဵင်းၽႃဢၢင်ႇ ၶိုၼ်းဢဝ်ဢဵၼ်ႁႅင်း မွၵ်ႈ 100 ထူဝ်းသၢႆ သိုၵ်းၶဝ်ႈ ၵႂႃႇၼႂ်းဝၢၼ်ႈဝိၼ်းၸဵင်ႇသေ မီးလွင်ႈပိုတ်းယိုဝ်းၵၼ် တေႃႇထိုင်ၵၢင်ၶမ်ႈ 6 မူင်း။
ၼႂ်းဝၼ်းတီႈ 2 ပူၼ်ႉမႃးၼႆႉၵေႃႈ KNLA တင်းၸုမ်းႁူမ်ႈႁွမ်း ဢဝ်ၶိူင်ႈမိၼ်တရူၼ်ႊ ပွႆႇမၢၵ်ႇသႂ်ႇ ၼႂ်းဝဵင်းၵျႃႇဢိၼ်း ၸဵၵ်ႉၵျီး (ကြာအင်းဆိပ်ကြီးမြို့) ၽွင်းၽူႈမီးပုၼ်ႈၽွၼ်း သိုၵ်းမၢၼ်ႈၶဝ် တိုၵ်ႉလူင်းၵဵပ်းသဵၼ်ႈ မၢႆႁူဝ်ၵူၼ်း။ မၢၵ်ႇတူၵ်းတႅၵ်ႇသႂ်ႇ ႁိမ်းႁိူၼ်း ၽူႈၵွၼ်းပလိၵ်ႈလႄႈ မေးၼၢင်းၽူႈၵွၼ်းပလိၵ်ႈ တိူဝ်ႉမၢတ်ႇ ၸဵပ်းတီႈမိုဝ်း၊ ၽူႈႁၢပ်ႇၵၢၼ် တီႈလုမ်းၾၢႆႇၽွင်းငမ်း ၵမ်ႈၽွင်ႈၵေႃႈ မၢတ်ႇၸဵပ်းၸွမ်း ဢိတ်းဢွတ်း – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ