ၼႂ်းလိူၼ်သႅပ်ႊထႅမ်ႊပိူဝ်ႊ ၾူၼ်တူၵ်းထပ်းၵၼ်ဢမ်ႇထၢတ်ႇလႄႈ ၼမ်ႉယိုင်ႈၶဝ်ႈသူၼ်ႁႆႈၼႃးႁိူၼ်း ယေးၵူၼ်းမိူင်း ၼႂ်းၼွင်ႁၢႆးယႃႈ တေႃႇထိုင်ဝၼ်းမိူဝ်ႈၼႆႉ ၼမ်ႉဢမ်ႇယွမ်းၶိုၼ်း ၵူၼ်းပိုၼ်ႉတီႈ ယၢပ်ႇၽိုတ်ႇတႃႇၽုၵ်ႇသွမ်ႈ ႁႃၵိၼ်လဵင်ႉတွင်ႉယၢပ်ႇ။

ယၢမ်းလဵဝ် ၵူၼ်းမိူင်းၼွင်ႁၢႆးယႃႈ ဢမ်ႇၸၢင်ႈႁဵတ်းၵၢၼ်ၸဝ်ႈၵဝ်ႇ၊ ၺႃးၵၢၼ်သင်ၵေႃႈ ႁဵတ်းၵိၼ်ၵႂႃႇ ဝၼ်းလႂ်ဝၼ်း ၼၼ်ႉ – ဝႃႈၼႆ။

ၼၢင်းယိင်း ၵူၼ်းၼႂ်းၼွင်ႁၢႆးယႃႈ လၢတ်ႈၽူႈတွႆႇႁွၵ်ႈဝႃႈ – “ၼမ်ႉၵေႃႈပႆႇယွမ်း၊ ယွမ်းၼိုင်ႈဝၼ်းၼႆႉ မွၵ်ႈၼိုင်ႈၼိဝ်ႉ ၵူၺ်း၊ ပေႃးၾူၼ်မႃးၶိုၼ်းဢိတ်းဢွတ်းၵေႃႈ ၼမ်ႉပေႃးယိုင်ႈၶိုၼ်ႈၶိုၼ်း ယူႇယဝ်ႉ။ ႁိူၼ်းၸၼ်ႉ လၢင်ႈတိုၼ်းပႆႇၸၢင်ႈယူႇ၊ လႆႈယူႇဝႆႉ ၸၼ်ႉၼိူဝ်ႁိူၼ်းဝႆႉယူႇ၊ ၼမ်ႉထူမ်ႈလိူၼ်ပၢႆယဝ်ႉလႄႈ ၶူဝ်းဢၼ်မီးဝႆႉ တီႈတင်းတႂ်ႈလၢင်ႈ ၸိူဝ်း ၼၼ်ႉၵေႃႈ ၵွႆမူတ်းယဝ်ႉယူဝ်ႉ”- ဝႃႈၼႆ။

တေႃႇထိုင်ယၢမ်းလဵဝ် ၵူၼ်းမိူင်းၼွင်ႁၢႆးယႃႈ ထုၵ်ႇၽေးၼမ်ႉထူမ်ႈ လႆႈယူႇဝႆႉတီႈၵျွင်းမုၼ်ၸဝ်ႈ၊ မၢင်ၸိူဝ်း ပၢႆႈၵႂႃႇယူႇ ႁိူၼ်းပီႈႁိူၼ်းၼွင်ႉတီႈလွတ်ႈၽေးဝႆႉ၊ လႆႈပိုင်ႈဢိင် ၸဝ်ႈတႃႇၼ တီႈၸမ်တီႈၵႆ။ ပေႃးဢမ်ႇမီး ၸဝ်ႈတႃႇၼၵေႃႈ ၺႃး ၵၢၼ်ဢၼ်လႂ် ႁဵတ်းၵႂႃႇဢၼ်ၼၼ်ႉ တႃႇၽုၵ်ႇသွမ်ႈၵေႃႈ ဢမ်ႇမီးငိုၼ်းတိုၼ်း လၢင်းၶိုၼ်းလႄႈ ပဵၼ်ဢၼ်လႆႈယၢပ်ႇ ၸႂ်ဝႆႉ။

ၼၢင်းယိင်း ၵူၼ်းမိူင်းၼွင်ႁၢႆးယႃႈ ပၢႆႈၽေးၼမ်ႉ ယူႇဝႆႉတီႈဝဵင်းယွင်ႁူၺ်ႈ လၢတ်ႈၽူႈတွႆႇႁွၵ်ႈဝႃႈ –

“တေႃႈလဵဝ် ဢမ်ႇၸၢင်ႈႁဵတ်းၵိၼ်ၵၢၼ်သင်လႄႈ လႆႈႁႃၽၵ်းၵမ်ႇၸွၼ်း (ၽၵ်းဝုင်ႈ) ၶၢႆ၊ ပဵၼ်ၶၢဝ်းၽုၵ်ႇ သွမ်ႈလႄႈ တေႁၢင်ႈႁႅၼ်း တႃႇတေၽုၵ်ႇသွမ်ႈၵေႃႈ ဢမ်ႇငၢႆႈ၊ ၼမ်ႉဢမ်ႇယွမ်းၶိုၼ်း ငိုၼ်းၶဝ်ႈၵေႃႈ ဢမ်ႇမီးလႄႈ ၶၢႆၽၵ်းၵမ်ႇ ၸွၼ်းၵူၺ်း တေႁဵတ်းႁိုဝ်ၵုမ်ႇထူၼ်ႈ တႃႇၵူၼ်းတင်းႁိူၼ်း၊ တႃႇတေၽုၵ်ႇသွမ်ႈၵေႃႈ ၸိူဝ်ႉၽၼ်းၵေႃႈၵႃႈ၊ ဢမ်ႇမီးတိုၼ်းလၢင်း”- ဝႃႈၼႆ။

ယၢမ်းလဵဝ် ၵူၼ်းပိုၼ်ႉတီႈၼႂ်းၼွင် လူဝ်ႇတၢင်းၸွႆႈထႅမ် ၼမ်ႉၵိၼ်လႄႈ ယႃႈယႃဝႆႉၼႆ ၼၢင်းယိင်းၵေႃႉ ဢၼ်လူင်းပိုၼ်ႉတီႈ ၸွႆႈထႅမ်ၼၼ်ႉ လၢတ်ႈၽူႈတွႆႇႁွၵ်ႈဝႃႈ-

“ယၢမ်းလဵဝ် ဢၼ်လူဝ်ႇသေပိူၼ်ႈတႄႉ တေပဵၼ်ၼမ်ႉ၊ ယႃႈယႃ။ ၸၢၵ်ႈၼမ်ႉဢၼ်ပိူၼ်ႈမႃးလူႇဝႆႉ မီးသွင်ဢၼ်သေတႃႉ၊ ဢၼ်ၼၼ်ႉၵေႃႈ ပႆႇၸႂ်ႉလႆႈ ပႆႇႁဵတ်းၵၢၼ်၊ ၾႆးၵေႃႈဢမ်ႇမႃး ၼမ်ႉၼႂ်းၼွင်ယၢမ်းလဵဝ် ဢမ်ႇမူတ်းသႂ်လႄႈ ၵူၼ်းပိုၼ်ႉတီႈ ပဵၼ်တၢင်းပဵၼ်တွင်ႉၵၼ်”- ဝႃႈၼႆ။  

ၽွင်းၼမ်ႉထူမ်ႈၼမ်ႉၼွင်းလႄႈ သူၼ်မၢၵ်ႇၶိူဝ်သူမ်ႈ ၵူၼ်းပိုၼ်ႉတီႈ ၼွင်ႁၢႆးယႃႈ လူႉသုမ်းတင်းၼမ် ယၢမ်းလဵဝ် ၵႃႈ ၶၼ်မၢၵ်ႇၶိူဝ်သူမ်ႈ ၶိုၼ်ႈ 1 ၸွႆႉထိုင် 3,500 ပျုးထိုင် 4,000 ပျုး ဝႃႈၼႆသေတႃႉ မၢၵ်ႇၶိူဝ်သူမ်ႈၼႂ်းၼွင်ၸမ်ဝၢႆးယဝ်ႉ ဝႃႈ ၼႆ။

ၼႂ်းၼွင်ႁၢႆးယႃႈၼႆႉ မီး 445 ဝၢၼ်ႈ ၼႂ်းၼၼ်ႉ 175 ၼႆႉ ထုၵ်ႇၼမ်ႉထူမ်ႈၼမ်ႉၼွင်းသေ ၵူၼ်းပိုၼ်ႉတီႈ ပၢႆႈၽေးၼမ်ႉ ၵႂႃႇယူႇၸွမ်းၵျွင်းမုၼ်ၸဝ်ႈ ဢၼ်မီးၼႂ်းဝၢၼ်ႈၽႂ်မၼ်း ၼိုင်ႈၵျွင်းၼႆႉ ၵူၼ်းတေမီး 300 ပၢႆ ဝႃႈၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)