မိူဝ်ႈၼႆႉ ဝၼ်းတီႈ 11/10/2024 ယၢမ်းၵၢင်ၼႂ်မွၵ်ႈ 5:50 မူင်း လုၵ်ႈႁဵၼ်းၶႄႇ ဢွၼ်ႇၸၢႆး ဢႃယုမွၵ်ႈ 14 ပီ ၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ တီႉၺွပ်းႁဵတ်းတူဝ်ယိူဝ်ႇ (ပြန်ပေးဆွဲ) ၽွင်းၵႂႃႇၶိုၼ်ႈႁူင်းႁဵၼ်းၶႄႇ ၼႂ်းဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်လုၵ်ႈႁဵၼ်း ၽွင်းၵႂႃႇၶိုၼ်ႈႁူင်းႁဵၼ်း ၶႄႇၼၼ်ႉ ၺႃးတီႉၺွပ်းႁဵတ်း (ပြန်ပေးဆွဲ) ဢေႃႈ။ ပဵၼ်မိူဝ်ႈၼႆႉ ယၢမ်းၵၢင်ၼႂ်မွၵ်ႈ 6 မူင်းၼႆႉ။ ၵူၼ်းႁၢႆႉ ဢၼ်မႃးတီႉၵႂႃႇၼၼ်ႉ မႃးၵၼ်လၢႆၵေႃႉ ႁဵတ်းႁိုဝ်မႃးတႄႉ ပႆႇႁူႉၶေႃႈမုလ်းမၼ်းလီလီၶႃႈ”- ဝႃႈၼႆ။

လုၵ်ႈႁဵၼ်း ဢွၼ်ႇၸၢႆး ဢၼ်ၺႃးတီႉၺွပ်း ဢဝ်ၵႂႃႇႁဵတ်းတူဝ်ယိူဝ်ႇၼၼ်ႉ ပဵၼ်လုၵ်ႈဢွၼ်ႇပၢႆႈၽေးသိုၵ်း လုၵ်ႉဝဵင်းပၢင်ႇသၢႆးၼၼ်ႉသေ ပၢႆႈမႃးၸွမ်းပေႃႈမႄႈ မႃးၶၢတ်ႈယူႇဝႆႉ တီႈပွၵ်ႉၵၢတ်ႇ ဝဵင်းမူႇၸေႊၼႆႉ တင်ႈတႄႇ မိူဝ်ႈပၢင်တိုၵ်း 1027 ၼၼ်ႉမႃး ဝႃႈၼႆ။  

မိူဝ်ႈဝၼ်းတီႈ 26/09/2024 ယၢမ်းၵၢင်ဝၼ်း 11 မူင်းပၢႆ ဢွၼ်ႇႁဵၼ်းသွင်ပီႈၼွင်ႉ ၺႃးၸူၼ်ၸွမ်းတၢင်း ၾၢႆႇၼႃႈယေးငိုၼ်း ၵမ်ႇပေႃးၸ မၢႆ (1) ပွၵ်ႉၼိူဝ် ဝဵင်းမူႇၸေႊ သုမ်းၵႂႃႇၾူၼ်းလုၵ်ႈၼိုင်ႈလႄႈ ရူတ်ႉၶိူင်ႈ လမ်းၼိုင်ႈ ၼၼ်ႉၵေႃႈ ဢွၼ်ႇႁဵၼ်း ၸၢႆးယီႈ ဢႃယု 16 ပီ ၵေႃႉၼိုင်ႈ ၺႃးၵွင်ႈယိုဝ်းသႂ်ႇ တီႈၶႃၾၢႆႇသၢႆႉ ၼႆယဝ်ႉ။